Davidi ge Sauli ûiba ra sâu
1 Sauli ge Filisteǁîn ǀkha torodīsa xu a oaǀkhī, ob ge Davidi ǃgaroǃhūb Engedib ǃnâ hâ ǃkhaisa ge mîbahe. 2 Ob ge Saula ǃnonaǀoadisi ǁhûiǂuisa aoga Israeli hoaba xu ū tsî ge ǃgû, Davidi tsî ǁîb aogab ǁKhâiseǃhaob ai sī nî ôase. 3 Tsîb ge daob amǃgâ ǁhoab ǀgūse mâ gūǃharadi tawab ge sī, o ǃgaroǂnûb sī nîga ǁhoab ǃnâ ge ǂgâ. Davidi tsî ǁîb aogu tsîn ge ǃgamse ǁhoab ǃnâ ǂgana ge gauǂnôa i. 4 O gu ge Davidi aoga ǁîb ǃoa ge mî: “Nēs ge sa ǃēsa. ǃKhūb ge satsa ǃoa ge mî: ‘Sa khākhoeba ta ge sa ǃomǁae nî mā, ots ge ǁîba satsa i ǃgâiba khami nî dī-ū.’ ” Ob ge Davida ǀkhurisī tsî ǂanhe tamab hâse Sauli sarab ǂaoba ge ǃgaoǁnâ. 5 Xaweb ge Davida ǁnās khaoǃgâ ǂgaoǂans âb xa ge ǂhanihe, Sauli sarab ǂaobab ge ǃgaoǁnâ ǃkhais xa. 6 ǁÎb ge khoegu âb ǃoa ge mî: “Ab ǃKhūba ǁnāsa xu sâu te, î ta tā ti gao-aob, ǃKhūb di ǀnausabeba ǂkhôadī. A ta ǁîba tā ǂkhôadī, ǁîb ge ǃKhūb xa ǁhûihe hâ gao-aoba xuige.” 7 Davidi ge ǁîb aoga Saula ǁnāǂamsa mā-am tama ge i.
Tsî Sauli ge ǁhoaba xu ǂoa tsî daob âba ge ǃgû. 8 Davidi on ge ǁhoaba xu ǂoa tsî Saula ge ǂgaiǃgon: “ǃGôahesa gao-aotse!” Tsî Sauli ge ǂnan, ob ge Davida ǃgôasib ǃoa ǃhūb kōse ge ǃgamǃgâ. 9 Tsîb ge Davida Sauli ǃoa ge mî: “Tare xū-i ǃaromats, ǂkhôadī tsi ǂgao ta ra, ti ra mî khoena ra ǃgâ? 10 Nētsēts ge aitsama go mû, ǃKhūb go ǁhoab ǃnâ ti ǃomǁae māǁnâ tsi ǃkhaisa. ǀNîgu go a ta ǃgam tsi ti a mî, xawe ta ge tita satsa ǀkhom tsî go mî ǂkhôadī tsi ta tidesa, ǃKhūb xa ǀnauhe hâ gao-aots a amaga. 11 Kō re ti îtse, kō re, sa sarab ǂaoba ti ǃommi ǃnâ. Sa sarab ǂaob ǀguiba ta go ǃgaoǁnâ, satsa ǃgam tamase ǃkhais xats ge ǂkhaba ǂâi-i tamas ka io mâǃoaxasi-e ta sats ǃoagu ūhâ tama ǃkhaisa a mû ǁkhā. Tita ge satsa mâǃoa tama hâ, xawets ge satsa tita ra ǃgôaǃgon, ǃgam tets nîga. 12 Ab ǃKhūba sakhom ǁaegu ǀgoraǃgâ, tarib a ǀhapixasa, îb satsa ǁkharaba te, xawe tita ge satsa xū-e dī tide. 13 ǀOro ǂkhoamîs ra mî khami: ‘ǂKhabadīn ge ǂkhabadī-aona xu ra ǀkhī’ xawe tita ge satsa ǂkhôadī tide. 14 Tari-i ǂamab Israeli gao-aoba go ǂoaxa? Tari-eb ra ǃgôaǃgon? ǁŌ hâ ari-e? ǀGui ǃaedas ǀguisa? 15 ǃKhūb ge nî ǀgoraǃgâ tsî mîǀgui tarib a ǀhapixasa. ǁÎb ge tita sats ǃoagu ǂnoaguba tsî sa ǀgaiba xu nî huiǂui te.”
16 Davidi ge nēn hoana Saula mîbatoa, ob ge Saula ge dî: “Satsa nē ra ǃhoatsa ti ôa Davitse?” Tsîb ge Saula ǃgarise ā 17 tsî Davidi ǃoa ge mî: “Sats ge tita xa ǃnāsase a ǂhanu-ai. Sats ge tita ǃgâiba go dīdawa-am tita ge tsūdī tsi xawe. 18 Nētsēts ge go ǁgau te mâtikō ǃgâisets go dī-ū tesa, ǃKhūb go tita sa ǃomǁae māǁnâ xawets go ǃgam te tama is ǀkha. 19 Khoe-e kha ǁî-i khākhoe-e ǀhao-ū tsî xū-e ǁî-e dī tamase ǃgû kai i nî? Ab ǃKhūba ǃgâidī tsi nētsēts go tita ǀkha dī ǃgâi dīgu ǃaroma. 20 Nēsi ta ge a ǂan sats amase nî gao-ao kai tsî Israeli gaosis sa ǂgaeǂguis ǃnaka nî mâǁaposa. 21 Xawe nēsi ǃKhūb ǀons ǃnâ mîmâiba te re ti suribats ti ǁōb khaoǃgâ hîkākā tide, tsî ti ǀons tsî ti îb surib hoaragase kāǃari tidesa.” 22 Davidi ge Saula mîmâibas khaoǃgâb ge Saula oms ǁga ge oa, xawe Davidi tsî ǁîb khoegu tsîn ge sâusenǃkhais ǃhommi dis ǃoa ge ǃapa.
© Khoekhoegowab Elobmîs © Bible Society in Namibia, 2020.
