Pristergu di ǃgamhes
1 Davidi ge Gatsa xu ǃhū tsî Adulammi ǁhoab ǁga ge ǃkhoeni. Tsî ǃgâsagu âb tsî ǁîb surib hoab ge ǁnâun geo, ǁnāǀî ǁîb ǃoa ge ǃgû. 2 Tsî mâ khoeb ǃgomsiba ūhâb, surudeba ūhâb tsî ǂkhîoǃnâb hoab ge ǁîb tawa ge ǀhaoǀhaosen, tsîb ge ǁîba ge ǁîgu ǂgaeǂgui-ao kai. ǁÎb tawa gu ge ǁaubexa hakakaidisi khoega ge ǀhao hâ i.
3 ǁNāpa xub ge Davida Moab ǃnâ ǂnôa ǃās Mispas ǃoa ǃgû tsî Moab di gao-aoba ge ǂgan: “A ra ti îra toxopa, tare-eb Eloba nî dī-ū tesa ta nî ǂans kōse sats tawa hā hâ re.” 4 Davidi ge ǁîra Moab di gao-aob tawa ge ǁnāxū, tsîra ge Davidi ge ǁhoab ǃnâ gau hâ i ǁaeb hoaba ǁîb tawa ge hâ.
5 Xaweb ge kēbo-aob Gada Davida ge ǃkhâikhom: “Tā ǁhoab ǃnâ hâ, ǂoa îts Judab ǃhūb ǃoa ǃgû.” Ob ge Davida ǂoa tsî haiǀgoms Herets ǁga ge ǃgû.
6 Sauli ge Gibeas tawab ǃnâus ai dabehais ǃgao, ǁhâigôaba ǃomǁae ūhâse ǂnôa tsî gu ǁîb ǂamkhoega ǁîb ǂnamipe mâ hîa, Davidi tsî ǁîb khoegu ge hōhe ǃkhaisa ge ǁnâu. 7 Ob ge Saula ǁîb ǂamkhoegu ǁîb tawa mâga ǃoa ge mî: “ǃGâ re, Benjaminǁîgo, Isaib ôaba xareb sago hoago ǃhanaǃhūgu tsî draibeǃhanagu tsîna nî mā, tsî sago hoagob toroǂnubidi danase nî mâi? 8 Sago hoago ge ti ǃoagu ge ǀapeǀhao. ǀGuib sago dib tsîn ge ǂanǂan te tama hâ, ti ôab ge ǃgaeǀhao-e Isaib ôab ǀkha dī ǃkhaisa. ǀGuib sago dib xaweb ge tita xa ǂâiǂhansen tama; ǀguib xaweb ge mîba te tama, ti ôab ǂûb ge ti ǂamkhoeba tita ǃoagu khâikhâiǃnâsa titab nî ǃâuǁgoese, nētsē i ī khami.”
9 Ob ge Edomǁîb Doegi, Sauli ǂamkhoegu tawa mâba ge mî: “Tita ge Isaib ôab Davidi ge Nobs tawa Ahitub ôab Ahimelexi tawa a sī ǃkhaisa ge mû. 10 Ahimelexi ge ǃKhūba ge dî, Davidi tare-e nî dī ǃkhaisa; tsîb ge daob ǂûn tsî Filisteǁîb, Goliati gôab tsîna ge mā bi.”
11 Ob ge gao-aob Saula pristeri Ahimelexi tsî ǁîb surib digu hoagu, Nobs ǃnâ ge prister iga ge ǂgai kai, tsî gu ge hoatsama gao-aob tawa ge hā. 12 Ob ge Saula ge mî: “ǃGâ re, Ahitub ôatse!”
Ob ge “ǃGâ ta ge ra, ǃgôahesatse” ti ge ǃeream.
13 Ob ge Saula ǁîb ǃoa ge mî: “Tare-i ǃaroma kho sats tsî Isaib ôab tsîkho tita ǃoagu ge ǀapeǀhao? Tare-i ǃaromats ǁîba daob ǂû-i tsî gôab tsîna mā tsî Elob ai ge ǀapeǂganba? ǁÎb ge tita ǃoagu khâikhâisen tsî nētsē tita ǃâuǁgoe ǃgam teb nîga.”
14 Ob ge Ahimelexa gao-aoba ge ǃeream: “Tariba sa ǂamsagu hoagu ǃnâ Davidi, gao-aots ǀuiǀgôab khami a ǂgomǂgomsaba? ǁÎb ge satsa ra ǃûi khoegu dana tsî sa ommi din hoan mûǁae a ǀgapiǃgôasa. 15 ǂGuro ǃnāsa nēsa, ǁîba ta ge Elob ai dîbasa? Ats gao-aotsa tā tita tsî ti surib hoaba ǀhapimā, tita ge xū-i xare-e nē ǃkhais xa ge ǀū i xuige.”
16 Xaweb ge gao-aoba ge mî: “Ahimelextse, sats tsî sa surib digo hoago ge amase nî ǁō.” 17 Tsîb ge gao-aoba ǁîb tawa mâ ǃûi-aoga ge mîmā: “Mâǂnami, î go ǃKhūb di pristerga ǃgam, ǁîgu ge Davidi ǀkha ǀapeǀhao xuige. ǁÎgu ge ǃgâise gu go ǂan i Davidi go ǃhū ǃkhaisa, xawe mîba te tama go i.” Xawe gu ge gao-aob ǃûi-aoga ǃommi xaweba khui ǂgao tama ge i, ǃKhūb pristerga gu nî ǃgamse. 18 ǁNās khaoǃgâb ge gao-aoba Edomǁîb Doegi ǃoa ge mî: “Satsa ǁîga ǂgâǃnâ tsî ǃgam!” Ob ge Edomǁîb Doega ǁîga ǂgâǃnâ tsî hoaga ge ǃgam. ǁÎb ge ǁnātsē ǁkhaisadisikoroǀa pristergu, efoda ra anaga ge ǃgam. 19 Pristergu ǃās, Nobs din on ge gôab ǀkha ge hîkākāhe; khoegu tsî khoedi, ǀgôan tsî dairan, goman, dâukin tsî gūn kōse.
20 Xaweb ge Ahitub ôab, Ahimelexi ôagu di ǀguib, Abiatara ûiǂoa tsî Davidi ǁga ge ǃkhoeni. 21 Abiatari ge Davida Sauli ge ǃKhūb pristerga a ǃgam ǃkhaisa a mîba, 22 ob ge Davida Abiatara ǃoa ge mî: “Edomǁîb, Doega ta ge ǁnātsē ǁnāpa mû, o ta ge Saulab hoa xūna nî ǂanǂan ǃkhaisa ge ǂan. Tita ge a ǃaroma, sa surib hoab go ǃgamhesa. 23 Tita ǀkha hâ, î tā ǃao; tita ra ǃgam ǂgaob ǁkhāb ge sats ona ra ǃgam ǂgaoba xuige, xawe tita tawats ge ǃnorasase nî hâ.”
© Khoekhoegowab Elobmîs © Bible Society in Namibia, 2020.
