1 ǃGāb ge ǃgû, ob ge Samuela ǀkheraǁnui-i xaparoba ū tsî ǁî-e Sauli danas ai ǂnâǂui tsî ǁoa bi tsî ge mî: “ǃKhūb ge ǁîb di ǁaes, Israels ǂama gao-aose go ǀnau tsi. Sats ge ǁîna ǂgaeǂgui tsî khākhoen ǃoagu nî ǁkhauba. 2 Nētsēts ga tita xu a ǃgû, ots ge Raxels di ǀhobas tawa, Benjaminni ǀkharib ǃnâ Selsaxs tawa ǀgam khoekha nî ǀhao-ū. ǁÎkha ge nî mîba tsi dâukidi hîats goro ôadi go hōhe tsîb sa îba dâukidi xa ǂâiǂhansenǀû tsî sats xa ǂâiǂhansen tsî ra dîsa: ‘Tare-e ta nî dī, î ta ti ôaba hō?’ 3 Tsî ǁnāpa xuts ga ǃkharu, ots ge Tabors tawa mâ aikehais tawa nî sī. ǁNāpats ge ǃnona khoegu, Eloba gu nî ǀgoreǀîse Betels ǃoa garuga nî ǀhao-ū; ǀguiba ǃnona pirirona ūhâse, ǀguiba ǃnona perega tani hâse tsî nauba ǃgapas ǂauxûi-e tani hâse. 4 ǁÎgu ge tawede tsi tsî ǀgam perekha nî mā tsi, ots ge ǁîkha nî ū. 5 ǁNās khaoǃgâts ge Elob ǃhommi Gibeas tawa hâb tawa, Filisteǁîn di toroǃkhamaogu hâpa nî sī. ǃĀs ǃnâts ga sī, ots ge ǀguipa hâ kēbo-aogu ǀkha nî ǀhao. ǁÎgu ge ǀgapib ai hâ altarsa xu nî ǁgôaxa, harpdi, ǃkhomǃkharurudi, ǂnunigu tsî lirdi ai ra ǀkhōse tsî gu ge ǂnā tsî nî kēbo. 6 Ob ge ǃKhūb gagaba ǀgaisase sats ǃnâ nî sîsen, tsîts ge ǁîgu ǀkha ǂnā tsî kēbo tsî nî ǀkhara khoe kai. 7 Nē saodi xats ga hāǂamhe, o ǂhanu a tits ra ǂâi xū-i hoa-e dī, Elob sats ǀkha hâ xuige. 8 Tsîts ge ti aiǃâ Gilgals ǁga nî ǃgû; tsî tita ge ega, khauǁguibadi tsî ǂkhîbagusǁguibade ta nî ǁguibase nî sī. Hû tsēdets ge ǁnāpa nî ǃâu, tita sī tsî tare-ets nî dīsa nî ǂanǂan tsis kōse.”
9 Tsî Samuela xub nî ǃgûgab ra dabasen hîab ge Eloba Sauli ǂgaoba ge ǀkharaǀkhara tsî di ge nē saodi hoade ǁnātsē ge ī. 10 Gibeas tawa kha ge Sauli tsî ǃgāb âb tsîkha a sī, o gu ge ǀguipa hâ kēbo-aoga ǁîkha ge ǃgûǃoa. Ob ge Elob gagaba ǀgaisase Sauli ǃnâ ge sîsen tsîb ge ǁîgu ǀkha ǂnā tsî gere kēbo. 11 ǁÎba ge ǀnai ǂan in hoan ge nēsin ge mû bio gere dîgu: “Tare-e kha Kisi ôab ǀkha go ī? Sauli tsîna kha go kēbo-ao kai?” 12 Ob ge ǁnāpa gere hâ aoba ge dî: “Tsî nē kēbo-aogu hoaga mâpa xu ra hā?” ǁNā-amagas ge nē mîsa ge ǂkhoamî kai “Sauli tsîna kha a kēbo-ao?” ti ra mîsa. 13 Sauli ge kēbo-aogu ǀkha ǂnā tsîb ge kēbotoa, o ǀgoreǀîǃkhaib ǃoa ge ǃgû.
14 Sauli di ǁnaob ge ǁîb tsî ǃgāb âb tsîkha ge dî: “Mâǀî kho ge ǃgû hâ i?”
Ob ge Saula ge ǃeream: “Dâukide khom ge ôa hâ i, xawe khom ge xū-e hō tama i, o khom ge Samueli tawa ge sī.”
15 Ob ge Sauli ǁnaoba ge mî: “Mîba te re tare-eb go Samuela a mîba kho ǃkhaisa.”
16 “ǁÎb ge dâukidi ge hōhe ǃkhaisa go mîba khom” tib ge Saula ge ǃeream, xaweb ge ǁîb nî gao-ao kai ǃkhais, Samueli ge mîba bis xa xū-i xare-e khom tama ge i.
Sauli ge gao-aose ra ǁgaumâihe
17 ǁNās khaoǃgâb ge Samuela, ǁaesa ǃKhūb tawan nî ǀhaose Mispas ǁga ǂgai 18 tsî ǁîn ǃoa ge mî: “Nētib ge ǃKhūb Israeli di Eloba ra mî: ‘Tita ge sado Egipteba xu ge ǂgaeǂguiǂui tsî Egipteǁîn di ǀgaiba xu tsî ta ge sado gere ǁgâiǀā gaosigu hoaga xu ge huiǂui du. 19 Tita ge sado ge hoa tsūǀkhāgu tsî ǁgâiǀāga xu a huiǂui ta, xawe du ge tita, sadu Elota nēsi go aoxū, gao-ao-e mā da ti du go mîs ǀkha. Hā ǁnâi, î du ǃKhūb di ais aiǃâ hā mâ sadu ǃhaode ǃoa tsî sadu ǀaokhoeǃnande ǃoa.’ ”
20 Samueli ge Israels ǃhaodi hoade ǀgū kaio, os ge Benjaminni ǃhaosa ǃKhūb xa ge ǁgauǂuihe. 21 Tsî Benjaminni ǃhaosab ge ǀaokhoeǃnande ǃoa hā kaio, os ge Matrib ǀaokhoeǃnansa ǃKhūb xa ge ǁgauǂuihe. ǁÎsa xub ge Sauli, Kisi ôaba ge ǁgauǂuihe tsî Matrib ǀaokhoegu ge ôa bi gu ge xawe hō bi tama ge i. 22 On ge ǃKhūba ge dî: “ǀNî khoeba noxopa nî hā?”
Ob ge ǃKhūba ge ǃeream: “ǁÎb ge ǀnai nēpa hâ; ǁîb ge ǀhaoǀhaosa xūn ǃgâb ai sâusen hâ.”
23 On ge ǃkhoe tsî ǁnāpa xu sī Saula ū tsî ǁaes ǁaegu hā ge mâ kai bi. ǁÎb ge danas âb ǀkha gaxusib ǃnâ ǁaes din hoana gere ǃnā. 24 Ob ge Samuela ǁaes hoas ǃoa ge mî: “Mû du ra, tari-eb go ǃKhūba ǁhûiǂui ǃkhaisa? ǁÎb khami ī khoeb ge ǁaes hoaragas ǃnâ a ǀkhai.”
Os ge ǁaes hoasa dâ tsî ge mî: “Ab gao-aoba ǂomxase ûi re.”
25 Samueli ge gao-aob di ǂhanub tsî ǁgui-aidi tsîna ǁaesa ǂanǂan, ǁîna ǂkhanis ǃnâ xoamâi tsî ǃKhūb aiǃâ ge ǁgui. ǁNās khaoǃgâb ge Samuela ǁaes hoasa ge ǃgû kai, mâ-i hoa-e ǁî-i oms ǁga. 26 Sauli on ge Gibeas ǃoa, oms âb ǁga ge oa. ǀNî ǁkhoaǂgaoxa khoegu, Elob xa ǂgaoǂgaoǃnâhe hâgu ge ǁîb ǀkha ge ǃgû. 27 Xawe ǀnî ǂkhabaǂâixan ge ge dî: “Mâ ǀgaus aib nē khoeba nî huiǂui da?” ǁÎn ge Saula ǃharaxū tsî ǀkhaexū-i xare-e hā-ūba bi tama ge i, xaweb ge Saula nēn ǀkha ǁae tama ge i.
© Khoekhoegowab Elobmîs © Bible Society in Namibia, 2020.
