ǃKhūba ǂgomǂgomsase ûiba
1 Tsî Xristub* ge sorosise tsâ amaga du ǁkhāti ǁkhā ǂâis ǀkha ǁâtanisen; sorosise ra tsâ-i ge ǁoreba ǀû hâ-e. 2 ǃAruǀî du ǁkhāti khoesi turagu ǃoa ûi tide tsî noxopa du soros ǃnâ ǃgaubahe hâ ǁaeba Elob di ǂâis ǃoa nî ûise. 3 Sadu kom ǂâu hâ ǁae-e ǀūben khami ge ûi hâ io. Sadu ge xorexūsasib, turagu, āǀhorob, ǁgauoǃnâ ǃgâiǃgâisengu tsî ǁgaiǁgaisa ǂūǁoasiga gere sao tsî ǁkhāti ǁgaisi ǁgôa-elogu tsîna gere ǀgoreǀî.
4 ǀŪben ge ǁî xūn ǂama ra buru, ǁkhā ǁgauoǃnâ ûib ǃnâ du ǁîn ǀkha ǃgû tama ǃkhaisa tsîn ge sado ra ǃkhāǃkhā. 5 Xawe ǁîn ge ǃereamsa Eloba nî mā, ǁnāb ûitsaman tsî ǁō hân tsîna ǀgoraǃgâsa ǂhomisenba hâba. 6 ǁNā-amagas ge ǃGâiǂhôasa ǁō hân tsîna ge aoǁnâbahe, khoesi ǀgaub ǃoan ga ǀgoraǃgâhe, xawen nî gagas ǃnâ Eloba ûibaga.
Elob mādi di ǃgâi mûǂamaon
7 Tsî ǀams xūn hoan dis ge go ǀgū. ǃGāsase tsî ǂkhaikari hâ re ǀgoresa ǃoa. 8 Î hoan ǂamai ǀaexase ǀnamgu, ǀnammi ra ǂgui ǁorena ǃgū-ai xuige. 9 ǃKhōǃoa khoena sa oms ǃnâ, ǀaras ose.
10 Mâ-i hoa-i, Elob di ǃgâi mûǂamaose ǃkharagaǃnâgu māde Elob ǀkhomma xu māhe hâ-i hoa-e, a i nē māde naun di ǃgâiba ǃoa sîsenū. 11 Khoe-i ga ǃhoas di ǁkhāsiba ūhâo, a i Elob di mîsa aoǁnâ. Tsî khoe-i ga ǃoaba, a i Elob ra ǀkhae ǀgaiba xus ase ǃoaba, îb Eloba xūn hoan ǃnâ koahe Jesub Xristub ǃnâ-u. ǁÎb ǂkhaisib tsî ǀgaib tsîkha anu hâba ǀamosib kōse. Amen.*
Xristeǁî-i khami tsâ
12 ǀNamsabedo, tā buru nē tsûsa ǃgomsigu hîa du ra tsâgu, ǃâitsâhe du nîse ra hāǂam du gu xa, ǃhao xū-i xa du go hāǂamhes ase. 13 ǃGâiaǂgao re Xristub di tsâb ǃnâ du ra amǃnâxa xui-ao, î du ǁnās khaoǃgâ ǁkhāti ǁîb ǂkhaisib ga ǂhaiǂhaiheo ǃgâiaǂgao tsî dâ ǁkhā.
14 ǃKhāǃkhāhe du ka Xristub di ǀons ǃaroma, o du ge ǀkhaehe hâ, ǂkhaisib di Gagab Elob dib ge sadu ai hâ. 15 Xawe i khoe-i xare-e tā ǃgamaose, ǃnari-aose, ǂkhabadī-aose tamas ka io nau-i di xū-i ǀkha ra ǁaeǁaesense tsâ. 16 Xawe i ga Xristeǁîse kara tsâo, a i tā ǁnās ǂama tao, î-i Eloba ǂkhaiǂkhai Xristub di ǀonsa i tani hâ amaga. 17 Nēb ge ǁaeb ǀgoraǃgâs nî Elob ommi tawa tsoatsoaba. Tsîs ga ǀgoraǃgâsa sida ǀkha tsoatsoao, mâsa kha ǀams Elob di ǃGâiǂhôasa ǁnâuǀnam taman disa? 18 Tsî
“ǂHanu-ai-i ga ǃgomse ǀgui ǃgâiǃō kaiheo,
mâpa i kha eloxoresa-i tsî ǁore-ao-e nî ǂhai?”
19 ǁNā-amaga an Elob di ǂâis ǃoa ra tsâna, ǀomdi ana māǁnâ tsî ǀû tamase ǃgâi sîsenga dī, ǂgomǂgomsa Kuru-aob ǃnâ.
© Khoekhoegowab Elobmîs © Bible Society in Namibia, 2020.
