Taras tsî aob tsîra di ǃgame ûib
1 ǁNās ǁkhās xase saso taraso, saso aoga ǃgamǃgamsenba, ǀnîgu ga Elob di mîsa ǁnâuǀnam tama i xawe, î gu taradi di tanisens ǀkha mî-i ose danhe, 2 saso di ǃanu tsî eloǃaoǃgâxa tanisensa gu ga mûǂano. 3 Tā sa ǃaugab di tanisens ǂama kaise ǂâiǂhansen, ǀûǂgapus, ǃgomǀgausa ǃhuniǀuri anixūna ǁgās tsî anusa sarana anas ǃnâ, 4 xawe ab sa îsasiba ǂgaoba xu hâ kāǁoasa îsasib, tsamtsiǃnâ tsî ǃnōsa gagas diba xu hâ, ǁnāb ge Elob aiǃâ a ama-ai. 5 ǁNāti di ge ǃanu tarade hūga gere anisen, Elob ai ǃâubasen tsî gere ǁîdi aoga ǃnaka hâbade. 6 Aiǁgaus ase. Saras hîa Abrahamma ǁnâuǀnam tsî ǁîba ǃgôahesatse ti gere ǂgais ǁkhās khami so ge saso ǁîs di ôa, ǃgâidī tsî so ga xū-i xare-e ǃao tama io.
7 ǁNās ǁkhās ase sago aogo, ǁnâuǃāxase ǁîdi ǀkha ûiǁare, î go ǁîde ǃgôasib ǀkha sîsenū, ǁîdi sago xa ǂkhabusa xawe sago ǁkhāgo ǀkha ǀkhommi hōsa nî ǃkhōǃoa xuige, o di ge sago ǀgorede ǂhanihe tide.
ǃGâidīgu ǃaroma hâ tsâb
8 Î du ǀunis ai sadu hoado ǀguiǂâixa, ǀkhomxaǃnâ, ǃgâsaǀnamxa, ǃgâiǂgaoxa tsî ǃgamǃgamsenxa. 9 Tā ǂkhaba-e ǂkhaba-i ama mādawa tsî ǃkhāǃkhā-e ǃkhāǃkhā-i ama. Î du ǁnās ǃoagu ǀkhae. ǀKhaeba ǀumisa ǃoa du ge ǂgaihe xuige. 10 Xoas ra mî amaga:
“ǁNā-i ûiba ǀnam tsî ǃgâi tsēde ra mû ǂgao-e,
a-i nammi â-e ǂkhababa xu ǁkhae
tsî amǁgaukha â-e gāxaǃnâsiba ǃhoasa xu.
11 A i ǂkhababa xu dabasen tsî ǃgâiba dī
î-i ǂkhîba ôa tsî ǁîba sauruǃgon.
12 ǃKhūb di mûra ge ǂhanu-ain ai hâ xui-ao,
tsî ǁîb di ǂgaera ge ǁîn di ǀgores ǃaroma ǁkhowa-amsa.
Xawe ǃKhūb di ais
ge ǂkhababa ra dīn ǃoagu hâ.”
13 Tsî tari-e sadu ǂkhôa-e a dī ǁkhā, ǃgâise dīsa du ga ǀaexabao? 14 Tsî ǂhanuse du ra dīn ǃaroma du ga tsâ, xawe du ge ǀkhaehe hâ. ǁÎn di ǃaoǃaosa tā ǃao, î ǁkhāti tā ǂâiǂhansen. 15 Xawe sadu ǂgaogu ǃnâ Xristuba* ǃaoǃgâba ūhâba, î ǁîba ǃKhūb ase ǃgôa. Î hoaǁae ǂhomisen hâse hâ, ǁnān hîa ǃâubasens di ǂhôas hîats ūhâs xa ra ǂan ǂgaona ǃereams ǃaroma, 16 xawe ǁnāsa tsamtsiǃnâsib tsî ǃgôasib tsîkha ǀkha. Tsî sadu ǃanu ǂgaoǂansa ūhâ, în ǁnān hîa sadu ǃgâi tanisensa ra ǃkhāǃkhāna taotaohe, sadu hîa Xristub saoǃgonaodu ase īdu ǃaroma. 17 ǁNās ǃgâ-ai i kom ǃgâio, Elob di ǂâis kao, ǃgâidī rase tsâsa, ǂkhabadī rase tsâs xa.
18 Xristub tsîn ge ǀgui ǃnās ama sada ǁoren ǃaroma a ǁō xui-ao. ǁÎb ǂhanu-aiba ǂhanuoǃnâ khoen ǃaroma. Elob tawab nî sado ūsīga tsî sorosiseb ge ǃgamhe, xaweb ge Gagab xa ge ûi-ûihe. 19 Tsîb ge ǃkhō-oms ǁga ǃgû tsî ǁnāpa ǁîb dansa gagade sī gere aoǁnâba. 20 ǁNādi Eloba ge ǁnâuǀnam tama hâ ide, Elob ge ǃnūǃnâxasib ǀkha Noaxi tsēdi ai gere ǃâuo, arki gere omhe ǃnubai, ǁîb ǃnân ge ǀoro khoen, ǃgôab ǃnâ ǁîb ǀkha ǁkhaisana, ǁgamma xu ge sâuhe. 21 Nē ǁgammi dâus ge ǁāǁnâs sado ra sâus khami ī, ǁîs ge sorosi ǀurisasib di ǁāǁnâ tama, xawe Elob ǃoa dabasen ǃgâi ǂgaoǂans ǀkha, Jesub Xristub ge ǁō hâna xu khâi xui-ao. 22 ǁÎb ge ǀhommi ǃoa ge ǃapab tsî Elob amǀkhāb ǁôab tawa sī ǂnôab, ǀhomǃgāgu, ǀgaigu tsî ǁkhāsigu tsîgu ǁîb ǃnaka dīhe hâba.
© Khoekhoegowab Elobmîs © Bible Society in Namibia, 2020.
