1 Makabergu 14 - Khoekhoegowab New Translation 2020 (KKG20)

Demetriub ge ǃkhōsis ǃnâ ra ūhe

1 ǀGuikaidisi tsî hûdisiǀgamǀaǁî kurib ǃnâb ge gao-aob Demetriub ǀGamǁîba hoaraga toroǂnubis âba ǀhaoǀhao tsî Mediab ǃoa Trifob ǃoagub nî dīse ī torob ǃaroma huiba ge ôa. 2 Persiab tsî Mediab di gao-aob Arsakeb ǃNaniǁîb ge Demetriub ge ǁîb ǀkharib ǃnâ ǂgâxa ǃkhaisab ge ǁnâu, o ǁîb ǂgaeǂgui-aogu di ǀguiba, toroǃkhamaogu ǀkha Demetriuba nî ûitsamase ǃkhō tsî hā-ūse ge sî. 3 ǁÎgu ge Demetriub di toroǂnubisa ǁnāǂam tsî ge dan, tsî gu ge Demetriuba ǃkhō tsî gao-aob Arsakeb tawa ge sī-ū tsîb ge gao-aoba ǁîba ǃkhō-oms ǃnâ ge aoǂgā.

4 Judeab ge Simonni ge ûitsama is kōse ǂkhîba ge ūhâ i. ǁÎb di hoaraga ǂgaeǂguis ǃnâb ge īǁkhā as kōse gere dītsâ ǁîb di khoena ǃgâiba khami dīsa tsîn ge ǂgaeǂgui-aob ase ǁîba hoaǁae ǃgôasiba ge ūba hâ i. 5 ǁÎb di ǃgôasiba nî ǀaroseb ge Jopasa doe-ommâ-aise ge ūbasen tsî Grike ǃnāǃnuidi ǃoa daoba ge ǁkhowa-am. 6 ǁÎb ge ǁaes âb ǃaroma ǀkhariba harahara tsî hoaraga ǃhūba gere ǂgaeǂgui. 7 Xaweb ge ǂgui ǃkhōsabena oahā-ū tsî Gesers, Betsurs tsî Jerusalems di ǁkhui-ommi tsîna ge ūbasen. ǁÎb ge ǁkhui-omma ge ǃanuǃanu tsî i ge ǀgui khoe-i tsîna ǁîba mâǃoa tama ge i.

8 Jodeǁîn ge ǂkhîb ǃnâ ǁîn di ǃhanagu ǃnâ gere sîsen. ǃHūb ge ǃhanaǂûna gere mā tsî di ge haide gere ǂûtani. 9 Kaira aogu ge ǃgangu ǃnâ ǂnû tsî ǃgâi tsēdi xa gere ǁgam tsî gu ge ǂkham khoega ǁîgu di anusa torosaragu ǃnâ gere ǃgûma. 10 Simonni ge ǃās khoena ǂûn tsî ǁkhaubasenūn nî ǁâtanin tsîna ge mā. ǁÎb di ǃgôasib ge harase ge ǂansa. 11 ǁÎb ge ǂkhîba ǃhūb ǃnâ ge hā-ū tsîs ge Israelǁaesa kaise gere ǃgâiaǂgao. 12 Mâ-i hoa-i ge ǂkhîb ǃnâ ǁî-i di draibeǃhanagu tsî ǀnomahaidi ǁaegu gere ǃgûma tsî i ge khoe-i xare-e ǁîna ge ǃaoǃao tama hâ i. 13 Khākhoexasiba ge ūhâ i gao-aogu hoagu ge ge hîkākāhe tsîb ge ǀguib tsîna Jodeǁîn ǃoagu nî torodīse ǃhūb ǃnâ ge ǃgau tama hâ i. 14 Simonni ge ǁîb khoen ǁaegu ge hâ i ǀgâsa khoen hoana huiba gere mā, tsîb ge Moseb ǂhanub xa ǂgaeǂguihe hâse eloxoresa tsî ǂhanuo khoegu hoaga ge dībē. 15 ǁÎb ge Tempela anu-anu tsî ǂgui xapade ǀgoreǃoabadi tawa nî sîsenūhese ge ǀaro.

16 Jonatanni ge ǁō ǃkhais ge Romes tsî Spartas hâra ǃnâ a ǁnâuhe, ob ge kai ǃoaba ǁnā ǃāra ǃnâ ge hâ i. 17 Xawe Spartaǁîn ge Simonni ge ǃgâsaba ǀgapipristerse saoǃgon tsî hoaraga ǃhūb tsî ǃās tsîra ra ǂgaeǂgui ti a ǁnâu, 18 on ge ǂkhîb ǃgaeǀhaos hîan ge ǁîb di ǃgâsakha, Judab tsî Jonatanni hâkha ǀkha dī hâ isa ǀasa kaisa brons ǂgapagu ai xoa tsî ǁîba ge sîba. 19 Nēn ge Jerusalems di ǀhûhâsiba ge khomaibahe. 20 Nēb ge Spartanǁîn ge sî sîǂkhanis di xoaǁnâba:

“Spartanǁîn tsî ǁîn ǂgaeǂgui-aoga xu, ǀgapipristeri Simonni tsî Jodeǁîn di ǂgaeǂgui-aogu tsî pristergu tsî hoaraga Jodeǁî ǃgâsan ǃoa hâ tawedes. 21 ǂNûǁkhaebaǃnans sida khoen ǃoats ge sîs ge sats mâtikōse a ǃgôaǃgôasa tsî ǂanǂansa ǃkhaisa hā ge mîba da. ǁÎgu di hās ge sida ge ǃgâiaǂgaoba kai 22 tsîs ge saris âga sida di xoaǁguigu ǃnâ sao rase ge xoamâihe: ‘Antioxub ôab Numeniub tsî Jasonni ôab Antipateri, Jodeǁîn di ǃgôahesa ǂnûǁkhaeba-aokha ge ǁîgu di khoexaǃnâsib di ǃgaeǀhaosa nî ǀasaǀasase sida tawa ge hā. 23 ǀHûhâsib ge nē khoekhan ge ǃgôasib ǀkha ǃkhōǃoa tsî xoaǁguigan ge aibekam ǁaeb di xūn di sâuǃnâǃkhaib ǃnâ sâu ǁkhā i tsîn Spartaǁîn di xoahesa xoaǁnâ-e ūhâ ǁkhā ǃkhais xa gere ǃgâiaǂgao. Nē ǁgauǁgauǂkhanis di ǁgâiǁnâbab ge Simonni hîa ge ǀgapiprister iba ge dībahe.’ ”

24 Nēs khaoǃgâb ge Simonna, Numeniuba korokaidisi kiloxramgu ǃgomma ūhâ kai ǃhuniǀuri ǁkhaukhōs ǀkha Jodeǁîn ge Romeǁîn ǀkha ūhâ i ǃgaeǀhaosa nî ǁapoǁapose Romes ǃoa ge sî.

25 Israelǁîn ge nēn hoanan ge ǁnâu, o ǁîn ǃnâ ge dîsen: “Mâti da Simonni tsî ǁîb di ôaga nî gangan? 26 ǁÎb, ǁîb ǃgâsagu tsî ǁgûb di hoaraga omaris ge sida ǁaesa ǀgaisase ge mâba i. ǁÎgu ge sida khākhoena ǃkhambē tsî ǁaesa ge ǃnoraǃnora.”

ǁÎn ge Simonni ge dī xūna brons ǂgapagu ai xoaǂgā tsî Sionǃhommi ai mâ ǀuiǂkhâǃnâgu ai ge mâi. 27 Nē ǂgapagu ai i ge saorase ge xoasa i:

“ǀGuikaidisi tsî hûdisiǀgamǀaǁî kurib ǃnâ, Elulǁkhâb di disiǁkhaisaǀaǁî tsēs ai, ǀgapipristeri Simonni di ǃnonaǁî ǂgaeǂguis kurib ǃnâ, 28 kai ǂnû-i pristergu, ǁaes, ǂamkhoegu tsî ǃhūb ǂgaeǂgui-aogu tsîn ge ǀhao hâ i-i tawa gu ge sao ra xoaǁguiga ge ǂanǂanhe. 29 Torogu ge ǃhūb ǃnâ tsoatsoa, ob ge Matatiab ôab Simonni, Joarib omarisa xu hâ pristeri tsî ǁîb ǃgâsagu tsîna sida ǁaes, sida Tempeli tsî sida ǂhanuba khākhoen ǃoagu nî ǁkhaubase, ǁîgu ûiba ǃaorosasib ǃnâ ge mâi. ǁÎgu ge kai ǃgôasiba sida ǁaesa ge hā-ūba. 30 Jonatanni ge sida khoena ǀhaoǀhao tsî ǁōb nîs aiǃâ ge ǀgapiprister kai. 31 Jodeǁîn di khākhoen ge ǃhūba ǁnāǂam tsîn nî Tempela ǀuriǀuri ǃkhaisa gere ǀapeǀape. 32 Ob Simonna ǂgaeǂguis sida toroǂnubis disa ū tsî ǃhūb âba ge ǃkhamba. ǁÎb ge ǁîb ǂhunuma mari-e sîsenū tsî ǁaes di toroǃkhamaoga ǁâtanina mâ tsî gere matare. 33 ǁÎb ge Judeab di ǃāde ge omǂnami. ǃGōsaseb ge Betsurs, hîa ǃhūǀgoras tawa ǁgoes, khākhoen ge aiǃâ ǁâtanina gere sâuǃnâs tsîna omǂnami tsî toroǃkhamaoga ǁnāpa ge hâ kai. 34 ǁÎb ge huri-am ǃās Jopas tsî Gesers, Asotub ǃhūǀgoras ǀgūse ǁgoes hîa ge ǂguro khākhoetoroǃkhamaogu di hâǃkhai is tsîna ge omǂnami. ǁNāpab ge Jodeǁîna xūna dī-unus ǃaroma ǂhâbasa xūna mā tsî ge hâ kai. 35 Khoen ge Simonni di ǂgomǂgomsasib tsî mâtib ǁîb di ǁaesa ǃgôasiba ra hā-ūba ǂgao ǃkhaisan ge mû, o ǁîba ǂgaeǂgui-ao tsî ǀgapipristerse ge dī. ǁÎn ge nēsa hoan hîab ge îǂhôasib tsî ǂhanu-aisib, ǁîb ǁaes ǃaromab ge sīǃnâb ǃaroma ge dī. ǁÎb ge mâ ǀgaub hoab ai ǁaes âbab nî ǃgôasiba hā-ūba ǃkhaisa gere dītsâ.

36 “ǁÎb di ǂgaeǂguis ǃnakan ge Jodeǁî tamana ǃhūba xu ge ǁgariǂuihe. Khākhoe toroǃkhamaogu ge Tempeli di ǀapasǀkhāb ai gu ge kuru hâ i hâǃkhaib, ǁîba xu ǂoaxa tsî gu ge ǃanu Tempela gere ǀuriǀuriba xu ge ǁgariǂuihe. 37 Simonni ge Jodeǁîna nē hâǃkhaib ǃnâ hâ kai tsî ǁîba ǃhūb tsî Jerusalem tsîra di ǃnorasasib ǃaroma ǀgaiǀgai tsî ǃās ǂnamipe hâ ǂnubiǂgoaga ge ǀgapiǀgapi. 38 Nēs ǃaromab ge gao-aob Demetriuba, Simonni di ǀgapipristersisa ǁapoǁapo 39 tsî ǁîba ‘Gao-aob di ǀHōsab’ ti hâ ǂgaiǂams tsî kai ǃgôasiba ge mā. 40 Demetriub ge nēsa, Romeǁîn ra Jodeǁîna ǀhōsan, ǁîb ǀkha ǃgaeǀhaosa ūhân tsî ǃgâsan ti ǂgai tsîn ge Simonni di ǂnûǁkhaebaǃnansa ǀoasa ǃgôasib ǀkha ǃkhōǃoa ǃkhaisab ge ǁnâu xui-ao ge dī.

41 “ǁNā-amagan ge Jodeǁîn tsî ǁîn pristergu tsîna Simonni tsî ǁîb surib tsînan ǁîn di ǂgaeǂgui-ao tsî ǀgapipristergu ase, ama kēbo-aob di hās kōse ūhâ ǃkhais xa gere ǃgâiaǂgao. 42 Simonni ge ǁîn ǃhūba gaoǂam, Tempela mûǂam tsî nî ǁîn toroǂnubis di ǃkhōdana-ao. ǁKhātib ge hâǃkhaigu, ǁâtanin tsî sîsengu tsîna nî mûǂam. 43 Khoen ge hoa xūn ǃnâ nî ǁnâuǀnam bi. ǂHanub di ǃgaeǁaredi hoadi ge ǁîb di ǀons ǃnâ nî ǂgaekhâihe. ǁÎb ge gaosarana ana tsî ǃhuniǀuri ǃgaesenna ǃhōb ai nî ǁgui.

44 “ǀGui khoe-i tamas ka io prister-i tsîn ge ǁîb di mîǁguiba ǁauǁaus, ǁîb ra mî xūna mâǃoas, mā-ams ose ǂnû-e nē ǃhūb ǃnâ gowaǀîs, gaosaraba anas tamas ka io ǃhuniǀuri ǃgaesenna ǃhōb ai ǁguisa mā-amhe tama hâ. 45 Nē ǂnûiǂgāde ra ǁnâuǀnamoǃnâ tamas ka io ǁnākhao-i khoe-i hoa-i ge nî ǁkharahe.

46 “Hoaraga khoen ge ǀguiǃnâxase Simonni nî nē ǂnûiǂgādi ǃoa sîsen ǃkhaisa ge ǃkhō-am. 47 Simonni ge ǀgapi ǂgaeǂgui-ao, ǀgapiprister, toroǂnubis di ǃkhōdana-ao tsî Jodeǁîn tsî pristergu di ǂgaeǂgui-aose mâihesa ge ūǃoa.”

48 ǁÎn ge nē gowaǂuis nî brons ǂgapagu ai xoahe tsî mûhe ǁkhā ǃkhai-i Tempeli di-i ai mâihe 49 tsî gu ǁgâiǁnâga Tempeli di ǁuiǂgaes ǃnâ, Simonni tsî ǁîb ôagu hō ǁkhā ǃkhaib ai nî sâuhe ǃkhaisa ge mîǁgui.