Romes tsî Spartas ǀkha hâ ǃgaeǀhaodi
1 Jonatanni ge xūn hoan ǁîb di ǃgâib ǃoa ra ǃgû ǃkhaisab ge mû, o khoega ǁhûi tsî khoexaǃnâsib ǁîgu ǁaegu ge hâ iba gu nî ǁapoǁapo tsî ǀasaǀasaga Romes ǃoa ge sî. 2 ǁÎb ge ǁkhāti ǁkhā haisi-ams ǀguisa ūhâ sîǂkhanide Spartas tsî ǀnî ǃkhaidi tsîn ǃoa ge sî. 3 ǁÎb di khoegu ge Romes ǃoa ǃgû tsî ǀApemāǃnans di ommi ǃnâ ǂgâ tsî “ǀGapipristeri, Jonatanni tsî Jodeǁîn ge ǀnai da ge ūhâ i khoexaǃnâsib tsî ǃgaeǀhaos tsîra ge nî ǀasaǀasaga sige go sîǀkhī” ti ge mî. 4 Romeǁî ǀapemā-aogu ge ǃkharuǃnâ gu ra ǃās hoas di ǂgaeǂgui-aogu ǃaroma sîǂkhanide, ǁîgu di ǃgûs Judeab kōse hâsa gu nî ǂkhîb ǃnâ ǃgû ǃkhaisa nî ǁapoǁapose ge māsaohe.
5 Nēb ge Jonatanni ge Spartaǁîn ǃoa xoa sîǂkhanis di xoaǁnâba:
6 “ǀGapipristeri Jonatanni, ǀApemāǃnans di ǂgaeǂgui-aogu, pristergu tsî ǃgau hâ Jodeǁîn tsî sige ǃgâsagu Spartas ǃnâ hâgu ǃoa hâ tawedes. 7 ǀNaib ge sadu gao-aob Ariuba sida di ǀgapipristeri Oniaba sada ǁaera a khoeǃgâgu, tib ǀaro hâ ǁgâiǁnâb ǀkha, sîǂkhani-e sida ge sîba. 8 Oniab ge kai ǃgôasib ǀkha ǂhanuǂnûǁkhaeba-aob tsî sîǂkhanis hîa ǃgāsa gowaǂuis ǃgaeǀhaos dis tsî khoexaǃnâsiba ra ǂanǃgâǃnâhesa ge ǃkhōǃoa. 9 ǃAnu ǂkhanide da sada ǃomgu ǃnâ ǂgaoǂgaoǃnâs ǃaroma ūhâ xui-ao da ge nē xūna ǂhâba tama hâ. 10 Sige ge nē sîǂkhanide ǃgâsasis tsî ǃgaeǀhaos tsîna da nî sadu ǀkha ǀasaǀasaga ge xoa. ǀŪgu khoen khami da nî gaxuse ǃhoaǁare tamase hâ ǃkhaisa ge ge ǂgao tama hâ. 11 ǁNā-amaga ge ge mâ ǃnās hoasa sida di ǁâudīgu tsî ūǃoasa tsēdi, ǁguibadi hîa da ra ǁguibadi tsî sida ǀgoredi ǃnâ ǃgâsan ase sadu xa ra ǂâiǂâisen. 12 Tsî da ge ǁnā gommi ge sadu tawa hā ǃkhais tsîn xa ra ǃgâiaǂgao. 13 Xawe gu ge sida ǁgoeǂnami hâ ǁaedi di gao-aogu xa ǃaromahe hâse ǂgui ǂōǂōsigu tsî toroga sida ge hāǂam. 14 Nē torogu di ǁaeb ǃnâ da ge sadu tamas ka io ǁîn ǀkha da ǃgaeǀhaosa ūhâ khoen tsî horesan tsîna ge ǂhani ǂgao tama hâ i, 15 ǃKhūb di huib ǀkha da ge khākhoena dan xui-ao. 16 ǁNā-amaga ge ge Antioxub ôab Numeniub tsî Jasonni ôab Antipateri hâkha ǁhûi tsî ǂhanuǂnûǁkhaeba-aose Romes ǃoa, aibekam khoexaǃnâsib tsî ǃgaeǀhaode nî ǀasaǀasase Romeǁîn ǁga ge sî. 17 Sige ge ǁîkha sige di tawededi tsî nē sîǂkhanis sige di ǃgâsasi ǃgaeǀhaos xa ra ǃgûs tsîna gu nî sago ǃoa ǃgû-ū ǃkhaisa ge mîmā. 18 Tsî ge ge nēsi ǃereamsa ǁîs ai ǂhâba hâ.
19 “Sao rab ge aiǃâ ge xoahe hâ i sîǂkhanis, Oniab ǃoa ge sîhes di xoaǁnâba:
20 “ ‘Spartas gao-aob Ariuba xu Oniab ǀgapipristeri ǃoa hâ tawedes. 21 Sige ge Spartaǁîn tsî Jodeǁîn xa hâ xoaǁgui-i, sada a khoeǃgâgu tsî hoatsama Abrahammi di suriba xu hâ, ti ra mî-e ge hō. 22 Nēsa da ge ǁnâu, o ga ǃgâi ǃkhais ge sadu di mâsib xa go nî sige xoabasa. 23 Sadu di barden tsî hoa xūn a sida dis ǁkhās khamin ge sida dina a sadu di, ti ge ge sago ge xoaba. Sige ge nē xūn xa gu nî sago ǀoasa ǃnuriba mā ǃkhaisa sida ǂhanuǂnûǁkhaeba-aoga ge mîmā.’ ”
Jonatanni tsî Simonni hâkha di ǀapemādi
24 Jonatanni ge Demetriub di ǂamkhoegu ge ǂguros ǃgâ-ai kai toroǂnubis ǀkha, toroba nî ǁîb ǃoagu dīse oahā ǃkhaisa ge ǁnâu. 25 ǁÎb ge ǁîgu nî ǁîb ǀkharib ǃnâ ǂgâxa ǃkhaisab ǂgao tama amaga Jerusalemsa xu ge ǂoa, îb ǁîgu ǀkha Hamatǀkharib ǃnâ sī ǀhao. 26 Jonatanni ge ǃkhē-aoga khākhoegu di hâǃkhaib ǃnâ ge sîǂgā, tsî gu ge ǁîga khākhoegu Jodeǁîna gu tsuxuba nî ǁnāǂamsa ra ǀape ǃkhaisa hā ge ǂanǂan bi. 27 Sores di ǂgâb ǀkhab ge Jonatanna ǁîb di toroǃkhamaogu nî ǂkhaikari hâ tsî ǁâtanina ǂhomisase ūhâ, tsuxub ǃnâ nî dīhe ǁnāǂams ǃaroma ǃkhaisa ge mîmā. ǁÎb ge ǁkhāti ǃûi-aoga hâǃkhaib ǂnamipe ge mâ kai. 28 Khākhoetoroǃkhamaogu ge Jonatanni tsî ǁîb aogu torob ǃaroma ǂhomisase hâ ǃkhaisa gu ge ǁnâu, o ǃao tsî ǀaede ǁîgu hâǃkhaib ǃnâ khau tsî ge ǃkhoeni. 29 Jonatanni tsî ǁîb khoegu tsîn ge ǀaede gu ge mû, xawe nau ǁgoagas kōse tare-i go ī ǃkhaisa ge ǀū i. 30 Jonatanni ge ǁîga ge ǃgôaǃgon, xaweb ge ǀnai gu ge Eleuteruǃāba ǃgâu hâ i xui-ao ǁîga saoǁare tama ge i. 31 Jonatanni ge dabasen tsî Arabiaǁîn hîa Sabadeaǁîn tis tsîna gere ǀonǂgaihena ǁnāǂam, hîkākā tsî ǁîn ge di xūna ge ǁkhâuǁnâ. 32 Tsîb ge hâǃkhaiba khôaǁnâ tsî Damaskus ǃoa garuse, ǁnā hoaraga ǀkharib ǃnâ-ū ge ǃkharu.
33 ǁKhā ǁaeb ǃnâb ge Simonni tsîna ǁkhāti hoaraga ǃhūb ǃnâ-ū Askelons tsî ǂnamipeb ǃnâ ge ǁgoe i ǀgaisa hâǃkhaigu kōse ge sī. ǁÎb ge Jopas ǃoa dabasen 34 tsî khoen ra Demetriub di toroǃkhamaoga Jopas di ǀgaisa hâǃkhaiba mā ǂgao ǃkhaisab ge ǁnâu, xui-ao toroǃkhamaogu âba hâǃkhaiba nî ǃûise ǁnāpa ge hâ kai.
35 Jonatanni ge oahāb ge, o ǁaes di ǀapemāǃnans ǂgaeǂgui-aoga ǂgaiǀhao tsî ǁîgu ǀkha Judeab ǃnâ gu nî ǀgaisa hâǃkhaiga om 36 tsî Jerusalems ǂnamipe hâ ǂnubiǂgoaga ǀgapiǀgapi tsî ǀgapi ǂnubiǂgoaba ǁkhui-ommi tsî ǃās tsîna nî ǀgorase ǂnubi ǃkhaisa ge ǀapeǁgui. Nēs ge ǁkhui-ommi nî ǀguri ūhâhe tsî gu khākhoega xūna ǁama tamas ka io ǁamaxū tidega ge dīhe. 37 Khoen ge aiǂoasǀkhāb di ǃâb, Kidronǃgoaǃnāb xōǀkhā mâ ǂnubiǂgoab dib ge ǃkhom hâ i xui-ao, nē ǃās tsî ǁkhāti Kafenataǃâs tsînan nî kuruǂganga ǀhao tsî gere sîsen. 38 Simonni ge ǁkhāti ǃhommi ǂai-am ge ǁgoe i ǃās, Adidasa ǁkhawa ge ǂnubikhâi. ǁÎb ge ǁîsa omǂnami tsî ǀurigu ǀkha dao-amde ge dība.
Trifob ge Jonatanna ǃkhōsis ǃnâ ra ū
39 Gao-aob Trifob ge Siriab di gao-aoseb gere ǁî-aitsama mâisen tsî kronsa ǀgapa ǂgao xui-ao, gao-aob Antioxuba mâǃoasa ge ǀapeǀape. 40 ǁÎb ge Jonatanni ǁnāsa mā-am tide tsî ǁnāsab nî ǁkhaega ǁîb ǃoagu toroba nî dī ǃkhaisa gere ǃao. Trifob ge ǁîb di toroǂnubisa ǂhomi tsî Jonatannab nî ǃkhōsis ǃnâ ū tsî ǃgam ti hâ ǂâis ǀkha Betsans ǃoa ge dāǁnâ. 41 Xaweb ge Jonatanni tsîna ǃgâise ǁkhāǁkhāmâisa hakadisiǀoadisi toroǃkhamaogu ǀkha Betsans ǃoa ge hā. 42 Tsîb ge Trifoba, mâtikō kai toroǂnubis ǀkhab go Jonatanna a hā ǃkhaisab ge mû, o ǃkhamsa ge ǃao. 43 ǁÎb ge Jonatanna kai ǃgôasib ǀkha ge ǃkhōǃoa tsî ǁîba hoaraga ǀapemā-aoga mâi-aiǃâ, ǀkhaexūna mā tsî ǀapemā-aogu tsî toroǃkhamaogu ǁîba gu ǁnâuǀnam hâ khami nî ǁnâuǀnam bisa ge mîmā. 44 ǁÎb ge Jonatanna ge dî: “Tare-i ǃaromats nētikō ǂgui toroǃkhamaoga, sakhom ǁaegu i toro-e ǀkhai hîa go ǀhupuǀhupuba? 45 Tare-i xats ǁîga sîǁaru tama? ǀOro khoegu sa ǀkha nî hâga ǁhûi, î Ptolemais ǃoa ǃgûǀkhā te. Tita ge ǃās, ǃgau hâ ǀgaisa hâǃkhaigu, toroǂnubidi tsî ǂammâisagu tsîna sa ai nî ǁkhaeǁnâ. Tsî ta ge dabasen tsî nî oa. ǁNās ge ǁîsa ta nēba hâba ǃkhaisa.” 46 Jonatanni ge ǁîba ǂgom tsî ǁîb ge mî khami toroǃkhamaogu âba Judeab ǃoa ge sî-oa. 47 ǁÎb ge ǃnonaǀoadisi khoega ǁîb ǀkha ge ūsao, xaweb ge ǀgamǀoadisiga Galileab ǃnâ ge hâ kai tsî gu ge ǀguiǀoadisi khoegu ǀguiga ǁîba ge ǃgûǁnū. 48 Xawe Jonatanni ge Ptolemais ǃnâ ǂgâ, on ge khoena dao-amde ǂganam, ǁîba ǃkhōsis ǃnâ ū tsî ǁîb ǀkha ge hā khoegu hoaga ge ǃgam.
49 Ob ge Trifoba hātoroǃkhamaogu tsî ǀnūtoroǃkhamaogu tsîna Galileab tsî Jesreelǃgoaǃnāb ǁga, ǃgau ge toroǃkhamaogu Jonatanni diga nî ǃgamse ge sî. 50 Jodeǁî toroǃkhamaogu ge Jonatanni ge ǁîb ǀkha ge hâ i khoegu hoagu ǀkha ǃkhōsis ǃnâ ūhe tsî ǃgamhe ǃkhaisa ge ǂan i, xawe gu ge ǁîǃnābe ǂgaoǂgaoǃnâgu tsî ǃkhammi ǃoa ǂhomisen hâse, ǀhaosase ge dāǁnâ. 51 Xawe khākhoetoroǃkhamaogu ge Jodeǁîgu, ǁîgu di ûiba nî ǃkhambase ǂhomisen hâ ǃkhaisa gu ge mû, o dabasen tsî ge oa. 52 Jodeǁî toroǃkhamaogu ge ǃnorasase gu ge Judeab ǃnâ oasī, xawe kaise ge ǃao hâ i. Hoaraga ǁaes ge Jonatanni tsî ǁîb ǀkha ge hâ i khoegu hoagu ge ǃgamhe xui-ao ǃoab ǃnâ ge hâ i. 53 ǁÎn ǂnamipe ge ǁan hâ i ǁaedi di hoadi ge nēsi ǁîna gere hîkākāsa ǂgao. ǁÎn ge Jodeǁîn ǂgaeǂgui-aon tamas ka io hui-aona ǃaruǀî ūhâ tama tsîb go ǁaeb ǁîna hîkākās dib tsî ǁîn di ǃnaeǃkhaide ǀamǀams diba ǀoa ti ge ǂâi.
© Khoekhoegowab Elobmîs © Bible Society in Namibia, 2020.
