Aleksander Epifaneb ge Jonatanna ǀgapipristerse ra mâi
1 ǀGuikaidisiǃnanidisiǁî kurib ǃnâb ge Antioxub Hakaǁîb di ôab Aleksander Epifaneba ǂgaus ǀkha hā tsî Ptolemais ǃnâ ge ǁan hā. Khoen ge ǁîba ǁîn di gao-aose ge ǁkhoreǁhare. 2 Gao-aob Demetriub ge nē ǃkhaisab ge ǁnâu, o kai toroǂnubisa ǀhaoǀhao tsî Aleksander Epifaneb ǃoagu nî torodīse ge ǂoa. 3 ǁNā ǁaeb ǃnâb ge Demetriuba, Jonatanna ǃgâise nî tsâ kai bi mîde ūhâ sîǂkhanisa ge sîba. 4 ǁÎb ge Jonatannab nî ǁîb ǀkhāb ai hō tsî Jodeǁîn ǀkha, Aleksanderi nî ǁîn ǀkha ǃgaeǀhaosa ǁîb ǃoagu dīs aiǃâ ǂkhîba kuru ga nēsa ge dī. 5 Demetriub ge hoa tsūxūn hîab ge Jonatanni, ǁîb ǃgâsagu tsî Jodeǁîn ǃoagu dīnab nî Jonatanna ǂâihō ti ge ǂâi hâ i. 6 ǁÎb ge Jonatanna toroǂnubisa ǀhaoǀhao tsî ǁâtanina māsa ge mā-am. ǁKhātib ge ǃkhōsaben, hîa ge Jerusalems di ǁkhui-ommi ǃnâ ǃkhōsis ǃnâ ūhe hâ inab nî Jonatanna māǁnâhe ǃkhaisa ge mîmā. 7 Tsîb ge Jonatanna Jerusalems ǃoa ǃgû tsî nē sîǂkhanisa hoaraga khoen tsî ǁkhui-ommi ǃnâ ge hâ i khoegu tsîna ge khomaiba. 8 Nē khoegu ge Jonatanni ge gao-aob xa toroǂnubisa ǀhaoǀhaosa mā-amhe ǃkhaisa gu ge ǁnâu, o kaise ge ǃhuri. 9 ǁÎgu ge ǃkhōsabena Jonatanna ge māǁnâ tsîb ge ǁîna, ǁîn di îna ge mā-oa.
10 Jonatanni ge Jerusalems ǃnâ hâǃkhaiga dībasen, ǃāsa ǁkhawa ǂnubikhâi tsî ge ǀasaǀasatsoatsoa. 11 ǁÎb ge ǂnubi-aoga ǃās di omǂnamib tsî Sionǃhomma nî ǁkhaeba ǂnubiǂgoaba gu nî hakaǀkhāxa ǀuidi ǀkha ǂnubi ǃkhaisa ge mîmā. Tsî gu ge ǁnāti ge dī. 12 Baxideb ge kuru hâ i ǀgaisa hâǃkhaigu ǃnâ ge hâ i ǃhaokhoegu ge ge ǃkhoeni. 13 Mâb hoab ge hâb ge i ǃkhaiba ǁnāxū tsî ǁîb di ǂhunuma ǃhūb ǃoa ge oa. 14 Xawen ge ǀnî Jodeǁîn hîa ge Moseb di ǂhanub tsî mîmāde ǁnāxūna, Betsurs hîa ǃhūsaben di hâǃkhaib ase gere sîsenūhes ǃnâ ge hâ-oa.
15 Gao-aob Aleksanderi ge Demetriub ge Jonatanni ǀkha dī mîmâidi xa ge ǁnâu. ǁKhātib ge Jonatanni ǂûb, ǁîb ge ǃkham torogu, ǁîb di ǁkhoaǂgaoxa sîsengu tsî ǃgomsigu ǁîb tsî ǁîb ǃgâsagu ge tsâgu xas tsîna ge ǁnâu. 16 ǁÎb ge tātsēs tsînab ǀnî khoeb, Jonatanni khami ība hō tide ǃkhaisa ge ǂan i tsî ǁnā-amaga ǁîbab nî ǀhōsase ū tsî ǁîb ǀkha ǃgaeǀhaosa dī ti ge mîǁgui. 17 ǁÎb ge Jonatanna sîǂkhanisa ge xoaba:
18 “Gao-aob Aleksandera xu ǁîb di ǃgâsab Jonatanni ǃoa; tawedes. 19 Tita ge sats a ǃgari-ao tsî gao-aob di ǀhōsasisa a anu ǃkhaisa ge ǁnâu. 20 Nētsē ta ge sa ǁaes di ǀgapipristerse go ǁgaumâi tsi tsî Gao-aob di ǀHōsab ti hâ ǂgaiǂamsa ra mā tsi. Sats ge sida ǀkha ǃgaeǀhaosa dī tsî nî ǂkhâǃnâda.”
ǁÎb ge ǁkhāti Jonatanna gaosarab tsî ǃhuniǀuri krons tsîra ge sîba. 21 Jonatanni ge ǀgapipristersis di ǃanu saraba ǀguikaidisiǃnanidisiǁî kurib di hûǁî ǁkhâb ǃnâ ǁHaodi ǁÂudīb tawa ge ana. ǁÎb ge toroǂnubisa ǂnubikhâi tsî ǁîga ǂgui ǁâtanina ge mā.
Jonatanni ge Aleksander Epifaneba ra mâxōǀkhā
22 Demetriub ge nēsab ge ǁnâu, o nē ǃkhais xa ǀhū tsî ge mî: 23 “Tare-e da ge dī, ob Aleksandera sada aiǃâ, ǁî-aitsamab nî ǁîb di mâǃhūsa ǀgaiǀgai ga Jodeǁîn ǀkha khoexaǃnâsib ǃgaeǀhaosa ge dī? 24 Tita tsîn ge ǁîn ǃoa khoexaǃnâsib sîǂkhanis, ǁîs ǃnâ ta ǁîna ǃgôasib tsî ǀkhaexūna ra mîmâiba tsî mâxōǀkhā tesa ra ǂganǃnâsa nî xoa. 25 Tsîb ge nēti ge xoa:
“Gao-aob Demetriuba xu Jodeǁîn ǃoa; tawedes. 26 Sida ǀkhats ge dī ǃgaeǀhaosa ǃkhōǀgaipe, sa khoexaǃnâsib sida ǀkhats ūhâba aiǃgû-ū tsîts sida khākhoen ǀkha ǁaeǁaesen tama ǃkhaisa da ge ǁnâu, o da ge kaise ge ǃgâiaǂgao. 27 Tsîts ga nēsi sida ǃoagu îǂhôase hâhâ, o da ge ǃgâi mādawa-amsa nî mā tsi. 28 Sida ge satsa ǂgui ǁgui-aimarina matare kai tide tsî ǀnî aiǂhanuga nî mā-am tsi. 29 Nēs ǀkha ta ge hoaraga Jodeǁîna ǁnaetisa ǁgui-aimarin, ǂō-i di ǁgui-aimarin tsî ǀnî ǀō-aisa ǁgui-aimarin tsîna xu ra ǃnoraǃnora. 30 ǃAruǀî ta ge nētsēsa xu ǃnonaǁîǃâs ǃhorob dis tsî ǃkhare ǃâb ǃhanaǂûn dib hîats nî matarese ina xus tsîna nî ǃnoraǃnora tsi. Tita ge ǁîna Judeab tamas ka io ǃnona ǀkharigu hîa Samariab tsî Galileab tsîkha xu Judeab tawa ǀarohe hâgu tsîna mataresa ǁgui-ai tide. 31 Jerusalems tsî ǁîs ǂnamipeb ge ǃanu ǃās ase nî ǃgapaǀîhe tsî hoa ǁgui-aimarina xu nî ǃnoraǃnorahe. 32 Tita ge ǁkhāti Jerusalems ǃnâ mâ ǁkhui-ommi di gaoǂamsisa māǁnâ tsî ǀgapipristeri hîa ǁîb ra ǂgao khoe-e ǁnāpa mûǂams ǃaroma nî mâib ai nî ǁkhaeǁnâ. 33 Tsî ta ge hoaraga Jodeǁîn hîa ti gaosib ǃnâ ǃkhōsis ǃnâ hâna nî ǃnora kai. ǁÎn hoan ge ǁîn di ûitsama xūn ai hâ ǁgui-aimarina xus tsîna nî ǃnora kaihe. 34 ǁGui-aimari-i xare-i tsîn ge Jodeǁî-e xu Sabbattsēdi, ǀAsa ǁkhâb di ǁÂudīgu tsî ǀnî ǃanu tsēdi ai ǀhaoǀhaohe tide. ǃAruǀî, i ge ǁgui-aimari-e ǃnona tsēde ǁâudīb aiǃâ tamas ka io ǁnās khaoǃgâ ǀhaoǀhaohe tide. 35 ǀGui khoe-i tsîn ge nē tsēdi di ǀguis ai khoe-e mataresa ǂgaoǀkhās tamas ka io ǀnî ǀgaub ai xū-e ǂgaoǀkhās di ǂhanu-e ūhâ tama.
36 “Jodeǁîgu ge ǃnonadisiǀoadisi khoegu kōse gao-aob di toroǂnubis ǃnâ nî xoaǂgāhe tsî gu ge gao-aob di toroǃkhamaogu ǀkha ǀguitikōse nî matarehe. 37 ǀNîgu ǁîgu digu ge ǀgaisa hâǃkhaigu gao-aob digu ǃnâ nî hâ kaihe tsî ǀnîga ǂgomǂgomsa ǃkhaidi ǂhanub didi ǃnâ nî mâihe. ǁÎgu ge Jodeǁîga ǂgaeǂgui-ao tsî danakhoegu ase nî ūhâ tsî ǁîgu di ǂhunuma ǂhanugu tsî ǁnaetiga gu nî sao ǃkhaisa, gao-aob ge Judeab ǃnâ mîmā khami nî mā-amhe.
38 “Samariab di ǀkhariba xu ge Judeab tawa ǀarohe ǃnona ǀkharigu ge ǀoasase Judeab tawa ǃkhōǂgāhe tsî ǀgapipristeri ǀguib di gaoǂams ǃnaka nî hâ. 39 Ptolemais tsî xōǀkhā ǁgoe ǀkhariba ta ge Jerusalems ǃnâ mâ Tempela, māǂuideb nî ǀoroǀoroga ǀkhaeb ase ge mā. 40 Tsî ta ge kurikorobe ta nî ǁkhāti gao-aob di ǁuiǂgaesa disikoroǀaǀoadisi ǀhaiǀuri maride ǀkhaeb ase mā ǃkhaisa ra mîmâi. 41 Tsî hāǀaro ra marin hîa gu ge ǂhanub di ǂammâisaga, ǂguro kurigu ǃnâ gu gere dī khami matare tama hâ in ge nēsisa xu Tempelǃoabadi ǃaroma nî māhe. 42 Tempeli di hōǂgāsa xu gere kurikorobe ǃkhōǃoahe koroǀoadisi ǀhaiǀuri maridi ge ǃaruǀî ǂgaoǀkhāhe tide. Nē mari-i ge a Tempeli ǃnâ ra ǃoaba pristergu di. 43 Hoan hîa Jerusalems di Tempeli tamas ka io ǀnî ǁhaiǁhâǃkhai-i ǃnâ, gao-aoban surude hâ xui-ao ra hân ge nî ǃnora kaihe tsî ǁîn di xūna nî mā-oahe. 44 Tempeli di ǁkhawa ǂnubikhâihes tsî ǀasaǀasahes ai ge hâ mâǂuidi ge gao-aob ǁuiǂgaesa xu nî matarehe. 45 ǁNās ǁkhās xase di ge Jerusalems ǂnubiǂgoagu, ǁîs ǂnamipe ǁgoe ǀgaisa hâǃkhaigu tsî Judeab ǃādi ǂnubiǂgoaga ǁkhawa ǂnubikhâis di māǂuidi tsîna gao-aob ǁuiǂgaesa xu nî matarehe.”
46 Jonatanni tsî khoen tsîn ge Demetriub di mîden ge ǁnâu, o ǁîb ge Israelǁaes ǃnâ dī tsūxūn tsî ǁînab gere ǁgâiǀā ǀgausa ǂâihō tsî ǁîde ǂgom tamas ka io ūǃoa tama ge i. 47 ǁÎn ge Aleksandera, ǁîb ge ǂguro ǂkhîb di mîde ǁîn ǃoa mî xui-ao ge ūǃoa, tsîn ge ǁîb di ûitsēdi hoade ǁîb ǀkhan ge dī ǃgaeǀhaosa ge ǃkhōǀgaipe.
48 Gao-aob Aleksanderi ge kai toroǂnubisa ǂnubikhâi tsî Demetriub ǃoagu nî ǃkhamse ge ǂhomisen. 49 Xawe nē gao-aokha di toroǂnubira ge ǃkhams ǃnâ ǀhao, o gu ge Aleksanderi toroǃkhamaoga dabasen tsî ge ǃkhoeni. Demetriub ge ǁîga ǃgôaǃgon tsî toroba ge dan. 50 Aleksanderi ge ǁnātsē sores ǂgâb kōse ǀgaisase ǃkham tsî Demetriuba ge ǃgam.
51 Aleksanderi ge ǂhanuǂnûǁkhaeba-aoga Ptolemib ǃNaniǁîb, Egipteb di gao-aob ǃoa nē haisi-ams ǀkha ge sî:
52 “Tita ge ti gaosib ǃoa oahā tsî ti aboxagu di trons ai go ǂnû hā. Tsî ta ge ǂhanuba ūǃkhuni tsî nēsi ǃhūba ra ǂgaeǂgui. 53 Tsî ta ge Demetriub ǃoagu torodī, ǁîb tsî ǁîb toroǂnubisa dan tsî ǁîb gaosiba go ūǃkhuni. 54 Nēsi ta ge ǃgaeǀhaosa dīs ǃaroma a ǂhomisa. Sa ôasa mā te, î ta ǁîs ǀkha ǃgame, î ta saro hoaro ǂhâba ro hâs kōse ǀkhaexūna mā.”
55 Ob ge gao-aob Ptolemiba ge ǃeream: “Kais ge ǁnā tsēs, sa aboxan ǃhūb ǃoa oahā tsîts go trons ai ǂnû hāsa. 56 Tita ge sa aoǁguiba ra ūǃoa, xawe aibe Ptolemais tawa hā re, î khom ǀhao, o ta ge ti ôasa ǃgame-ūts nîse nî mā tsi.”
57 ǀGuikaidisiǃnanidisiǀgamǀaǁî kurib ǃnâ ra ge Ptolemib tsî ǁîb ôas Kleopatras hâra Egipteba xu ǃgû tsî Ptolemais ǃnâ ge sī. 58 Gao-aob Aleksanderi ge ǁîra ǀkha ge ǀhao, tsîb ge Ptolemiba ǁîb ôas Kleopatrasa ǃgame-ūb nîga Aleksandera ge mā, tsîb ge ǃgameǁâudība gao-aosi ǂkhaisib ǀkha Ptolemais ǃnâ ge tsēdīhe.
59 ǁNās khaoǃgâb ge gao-aob Aleksandera, Jonatanni ǃoa ǁîb ǀkhab nî ǀhaoga sîǂkhani-e ge xoa. 60 Jonatanni ge ǂkhaisib ǃnâ Ptolemais ǃoa ǃgû tsî ǁnāpa ǀgam gao-aokha ǀkha sī ge ǀhao. ǁÎb ge ǁîkha ǀhaiǀurib tsî ǃhuniǀurib tsîna ǀkhae tsî ǁîkha ge ǃgûǀkha hâ i danakhoega ǁkhāti ǂgui ǀkhaexūna ge mā. ǁÎgu ge khoexaǃnâsiba ǁîb ǃnâ ge hō. 61 ǁKhā ǁaeb ǃnâ gu ge eloxoresa Jodeǁîgu hîa Jonatanna tsūtsūba tsî gere ǀanaǃgâ ǂgaoga ge ǀhao, xaweb ge gao-aob Aleksandera ǁîgu ǀkha ǁaeǁaesen tama ge i. 62 ǁÎb ge Jonatanni gaosaraba anab nîse nî māhe ǃkhaisa mîmā 63 tsî ǃgôasib ase ǁîb xōǀkhā ge ǂnû kai bi. Aleksanderi ge ǁîb di danakhoega, Jonatanna gu nî ǃās di ǁaegub kōse ǃgû-ū ǃkhaisa ge mîba. Tsî ǀgui-i tsîn ǀgui xū-i ǃaromas tsîna ǀhapiǂgā-am-e ǁîb ǃoagu hā-ū tsî ǁîba ǂōǂōsi-e hā-ūba tide ǃkhaisa nî ǂanǂan. 64 Tsî ǂgā-amaon ge ǁîb ra māhe ǃgôasiba mû, ǂanǂansa ǁnâu tsîn ge gaosarabab ana hâ ǃkhaisa a mû, o hoatsama ge ǃkhoeni. 65 Gao-aob ge ǃaruǀî ǃgôasiba ǁîba mā tsî ge ǁîba ǃgôaǃgôasa ǀhōsagu ǁîb digu ǃnâ xoaǂgā tsî ǀkharib di ǂammâisa tsî ǂgaeǂgui-aose ge ǁgaumâi. 66 Jonatanni ge ǂkhîb tsî ǃgâiaǂgaob ǀkha Jerusalems ǃoa ge oa.
Apoloniub ge Jonatanni xa ra danhe
67 ǀGuikaidisiǃnanidisikoroǀaǁî kurib ǃnâb ge Demetriub ǂGurob di ôab Demetriub ǀGamǁîba, Kretasa xu ǃgû tsî ǁîb di aboxan ǃhūb, Siriab ǃnâ ge sī. 68 Gao-aob Aleksanderi ge nēsab ge ǁnâu, o kaise ge ǂâiǂhansen tsî Antioxs, Siriab di danaǃās ǃoa ge oa. 69 Demetriub ge Apoloniuba ǁkhawa Kai Siriab di gowoniase ge ǁgaumâi. Apoloniub ge kai toroǂnubisa ge ǂnubikhâi tsî hâǃkhaiga Jamnias ǀgūse dībasen tsî sao ra haisi-amsa Jonatanni hîa ge ǀgapiprister iba ge sîba.
70 “Sats ǃaroma ta ge ǃhōhe tsî ra taotaohe. Tare-i ǃaromats ǀgaibats sida ǃoagu ǃhomgu ǃnâ ūhâ ti ra ǂama. 71 Amasets ga ǂgomǃgâsa sa toroǂnubis ǃnâ ūhâ, o ǂgāb ai ǁgôaxa, î hā ǃkham, î khom sakhom ǀgaiba ǁnāpa ǃâi, tita ge ǃāde xu hâ ǀgaiba ūhâ xuige. 72 Tita a tari tsî sida ra huin a tari ǃkhaisa dî, î ǁkhāǁkhāsen. Sa aiǃgû-aogu ge ǀnai ǀgam ǃnāra ǁîgu ǂhunuma ǃhūba xu ge ǃkhoeni hâ i, xui-aon ge khoena sigets mâǃoa ǁoa ǃkhaisa nî mîba tsi. 73 O mâtits nî ǁnâi ti hātoroǃkhamaogu tsî toroǂnubis tsîna ǂgāb ai dan? Nēpan ge ǁîn ǃgâb ai nî gauhe ǀuiro-i tamas ka io ǃkhoeniǂoahe nî ǃkhai-i tsîna a ǀkhai.”
74 Tsî Jonatanni ge nē haisi-amsab ge Apoloniuba xu hō, o ge ǁaixa. ǁÎb ge disiǀoadisi toroǃkhamaoga ǁhûi tsî Jerusalemsa xu ge ǃgû, tsîb ge ǁîb di ǃgâsab Simonna ǁîba nî huise ǁîb ǀkha ge ǀhao. 75 ǁÎb ge hâǃkhaiga Jopas ǃauga ge ǂnaumâi. Apoloniub di toroǃkhamaogu ge ǁnāpa hâ i xui-aon ge ǃās di khoena ǁîga ǃās ǃnâ gu nî ǂgâ ǃkhaisa mā-am tama ge i. 76 Jonatanni ge nē ǃkhais ǃoagu ge ǃkham, tsîn ge ǁanǂgāsabenna ǃao tsî dao-amde ge ǁkhowa-am tsîb ge Jonatanna Jopasa ge ūbasen. 77 Apoloniub ge nēsab ge ǁnâu, o ǃnonaǀoadisi hātoroǃkhamaogu tsî kai toroǂnubis tsîna ū tsî ǀnî ǀkhāb ǃoa garu khami Asotus ǃoa ge ǃgû. ǁÎb di hātoroǃkhamaogu di ǀgaib ai ǂgomaiǂnûi tsî toroǂnubis ǀkha ǂgāb ǃnâ ge ǂgâ. 78 Jonatanni ge Asotus kōse ge ǃgôaǃgon bi tsî ra ge toroǂnubira ǁnāpa ge ǃkham. 79 Apoloniub ge ǂganǃgâsib ǃnâ ǀguiǀoadisi hātoro-aoga khaosǀkhāb ai ge ǁnāxū. 80 Jonatanni ge ǃgâbǀkhāb aib ǁgoe-amhe ǃkhaisa ge ǂan. ǁÎb di toroǃkhamaogu ge ge ǁgoeǂnamihe hâ i, tsî gu ge khākhoega ǁgoasa xu ǃoes ǁga, ǁîga ǂāgu ǀkha gere ǁkhâu. 81 Xawe gu ge Jonatanni di toroǃkhamaoga ǁîb ge mîmā khami ge mâǀgai tsî gu ge khākhoegu di hāga sī ge tsau. 82 Tsî hātoroǃkhamaogu ge ǂkhabu, ob ge Simonna ǁîb di toroǃkhamaogu ǀkha ge ǂkherexa tsî khākhoega ge ǁnāǂam. Khākhoegu ge ǀgaru tsî ge ǃkhoeni. 83 Nē ǀgaru ge hātoroǃkhamaogu ge Asotus ǃoa ǃkhoeni tsî ǁîgu di ǁgôa-elob, Dagonni di tempeli ǃnâ, ǃnorasasib ǃaroma sī ge ǂgâ. 84 Xaweb ge Jonatanna Asotus tsî Dagonni di tempeli tsîna ge ǃkhāǂhubi tsîn ge ǁnāǀî ge ǁhaiǁhân hoana ge ǂhubiǁō. ǁÎb ge ǁkhāti ǂnamipeb ǃnâ ǁgoe ǃāde ǁkhâuǁnâǃnâ tsî ge ǃkhāǂhubi. 85 ǁNā tsēs ain ge ǁaubexa ǁkhaisaǀoadisina torob ǃnâ ge ǃgamhe tamas ka io ge ǂhubiǁō. 86 Jonatanni ge Asotusa xu ǃgû tsî hâǃkhaiba Askelons tawa sī ge ǂnaumâi, tsîn ge khoena ǃāsa xu ǂoaxa tsî kai ǃgôasib ǀkha ge ǁkhoreǁhare bi. 87 Jonatanni tsî ǁîb di toroǃkhamaogu ge ǂgui xūn, ǁkhâuǁnâ gu gen ǀkha Jerusalems ǃoa ge oa.
88 Gao-aob Aleksanderi ge Jonatanni ge dī xūnab ge ǁnâu, o ǃnāsa ǃgôasiba ge mā bi. 89 Tsî ǁîba ǃhōs ai ra ǂnûihe ǃhuniǀuri ǃgaesenni hîa gu ǁnāgu “Gao-aob di ǀGūkhoeb” ti hâ ǃgôasib di ǂgaiǂamsa ūhâgu ǀguiga ra māheba ge sîba bi. ǁKhātib ge Jonatanna Ekrons tsî ǁîs ǂnamipe ǁgoe ǀkharib tsîna ge mā.
© Khoekhoegowab Elobmîs © Bible Society in Namibia, 2020.
