Eliab ge ǀkhuruba ra aimûǀgaru
1 Kēbo-aob Eliab, Gileadi ǃnâ ǂnôa ǃās Tisbets dib ge gao-aob Axab ǃoa ge mî: “ǃKhūb, Israeli di Elob, ǁîb di ǃoabas ǃnâ ta mâb a ûitsama ǃkhais ao i ge nē ra sao kurigu ǃnâ ǀaub kas, ǀnanub kas hoasa ǁnā tide tita nî mîs kōse.” 2 ǁNās khaoǃgâb ge ǃKhūba Eliab ǃoa ge mî: 3 “Nēpa xu aiǂoasǀkhāb ǁga ǃgû, îts Keritǃārob, Jordanǃāb nauǀkhāb ai ǁgoeb tawa sī gaugausen. 4 ǁNā ǃārob di ǁgam-ets ge nî ā tsî tita ge gorana go mîmā, în ǂûna ǁnāpa sī-ūba tsi.”
5 Ob ge Eliaba ǃKhūb ge mîmā bi khami ǃgû tsî Keritǃārob tawa sī ge hâ. 6 On ge gorana mâ ǁgoas tsî ǃuis hoasa pere-i tsî ǁgan-i tsîna gere sī-ūba bi tsî ǁgam-eb ge ǃāroba xu gere ā. 7 ǁAero-i khaoǃgâb ge ǀapi tama i ge hâ i xui-ao ǃāroba ge ǂnâ.
Eliab ge ǃoatarasa ra hui
8 Ob ge ǃKhūba Eliab ǃoa ge mî: 9 “Sidons ǀgūse ǂnôa ǃās Sarefats ǁga ǃgû, î ǁnāpa sī hâ. Tita ge ǁnāpa ǁan hâ ǃoatarasa go mîmā, îs ǃkhōǂhomi tsi.” 10 Tsî Sarefats ǁga ǃgû tsîb ǃās di dao-ams tawab ra sī hîab ge ǃoataras ǀaena ra sā-aisa a mû, ob ge ǁîsa ǃoa “ǁGam-e xaparo-i ǃnâ hā-ūba te re, î ta ā” ti ge mî. 11 ǁÎ-es sī nî ūba bises ra ǃgû hîab ge “Î ǁkhāti perero-i tsîna toxopa hā-ūba te re” ti ge mî.
12 Os ge ǁîsa ge ǃeream: “ǃKhūb sa Elob a ûitsama ǃkhais ao ta pere-i xare-e ūhâ tama, ǃomǃnâsǀoa melro-i ǀgui-e ta ge xapas ǃnâ ūhâ tsî ǂkhari oliro-i ǀgui-e oli-i xapab ǃnâ. Nēsi ta ge ǀaerona hā goro sā-ai, î ta tita tsî ti ôab tsîma ǂûxūro-e aiǂhomiba. ǁÎ-em ga hapus khaoǃgâm ge ǃâs xa nî ǁō.”
13 Ob ge Eliaba ǁîs ǃoa ge mî: “Tā ǂâiǂhansen, î ǃgû tsî ǂû-i âsa sī aiǂhomi, xawe aibe perero-e dī, î hā-ūba te, î ǁnās khaoǃgâ ǀgui sas tsî sa ôab tsîro ǂûxū-e dība. 14 Nētib ra ǃKhūb, Israeli di Eloba mî xui-ao ‘Mel-i xapas ǃnâ hâ i tsî oli-i xapab ǃnâ hâ i tsîn hoan ge tita ǃKhūta ǁkhawa ǀapiba nî sîs kōse toa tide.’ ”
15 Os ge ǁîsa ǃgû tsî Eliab go mîba si khami ge dī; tsîn ge ǁîn hoana ǂâu hâ ǂû-e ǂomxa ǁaeba ge ūhâ i. 16 ǃKhūb ge Eliab ǃnâ-u mîmâi khami i ge mel-e xapas ǃnâ tsî oli-e xapab ǃnâ ge toa tama hâ i.
17 ǁNā ǁaeb ǃnâb ge nē ǃoataras ǀgôaba ge ǀaesen; ǁîb ge kaise ǃgomse ǀaesen tsî ge ǁō. 18 Os ge ǁîsa Eliab ǃoa ge mî: “Elob aotse, tare-i ǃaromats nēti tita ǀkha go dī? Ti ǁoreba Eloba ǂâiǂâiǃnâ tsîts ti ôab ǁōba nî ǃaromabasets go hā?”
19 Ob ge Eliaba “ǀGôab âsa mā te” ti mî tsî ǀgôaba ǁîsa xu ū, ǀgapise hâ ǃnā-oms, ǁîb gere hâǃnâs ǃoa ǂoa-ū tsî kharob ai ge ǁgui. 20 Tsîb ge Eliaba nēti ǃgarise ge ǀgore: “ǃKhū, ti Elotse tare-i ǃaromats nē ǃoataras, ǁîs tawa ta hâsa nēti ǃgomse ra tsâ kai ǁîs ôaba ǃgams ǀkha?” 21 Tsîb ge ǃnona ǃnāde ǀgôab ǂama khoraǁguisen tsî “ǃKhū, ti Elotse, nē ǀgôaba ǁkhawa ûi-ûi re” ti ge ǀgore. 22 Ob ge ǃKhūba Eliab ǀgoresa ge ǁnâu-am tsîb ge ǀgôaba ǀomtsoatsoa tsî ǁkhawa ge ûi.
23 Ob ge Eliaba ǀgôaba ǀgapise hâ ǃnā-omsa xu ǁgôa-ū tsî ǁîba ǁgûsa mā tsî “Kō re, ûitsama a ǀgôab âs ge” ti ge mî.
24 Os ge ǁîsa “Nēsi ta ge a ǂan Elob aots a tsîb ǃKhūba sats ǃnâ-u ra ǃhoa ǃkhaisa” ti ge ǃeream.
© Khoekhoegowab Elobmîs © Bible Society in Namibia, 2020.
