Jerobeammi ôab di ǁōb
1 ǁNā ǁaeb ǃnâb ge gao-aob Jerobeammi ôab, Abiaba ge ǀaesen. 2 Ob ge Jerobeamma taras âb ǃoa ge mî: “Khoe-i xare-i mûǃā si tidese ǀkharaǀkharasen, î Silos ǁga ǃgû. Kēbo-aob Ahiab, nē ǁaes ǂama ta nî gao-ao kai ti ge mîb, ge ǁnāpa ǁan hâ. 3 Disi peregu, tsamperen tsî ǀgui xapab dani-i tsîna ūsao, î sī ǁîba dî, ob ge tare-i ǀgôab ǀkha nî ī ǃkhaisa nî mîba si.”
4 Os ge ǁîsa ǂhomisen tsî Silos ǁga Ahiab oms ǃoa ge ǃgû. Ahiab ge kairasib âb xab ge ǂgī i xui-ao ge mû ǁoa i. 5 Xaweb ge ǃKhūba Jerobeammi taras, ǀgôab âs di ǀaesenni ǂamas nî dî bise ǁîb ǃoa ra hā ǃkhaisa ge mîba bi. ǃKhūb ge Ahiaba tare-eb nî mî ǃkhaisa ge mîba.
Tsî Jerobeammi taras ge hās geo, ǀkhara khoe-i khami ge dīsen. 6 Xaweb ge Ahiaba dao-ams ǃnâs ra ǂgâxa ǃkhaisab ge ǁnâu, o ge mî: “ǂGâxa re, Jerobeammi tarase. Tarexas ǀkhara khoe-i khami ra dīsen? ǃGom ǂhôa-e ta ge ūba si hâ. 7 Jerobeamma sī mîba, nētib ge ǃKhūb, Israeli di Eloba ra mî: ‘Tita ge satsa khoen ǁaeguba xu ǁhûiǂui tsî ti ǁaes Israels ǂgaeǂgui-aose ge mâi. 8 Tita ge gaosisa Davida xu ūbē tsî satsa ge mā, xawets ge satsa ti ǃgāb Davidi, tita ǂgomǂgomsase ǃoaba, ti mîmāde ǁnâuǀnam tsî ti mûǁae ǂhanun ǀguina gere dīb khami ī tama ge i. 9 Sats ge sa aiǃâ ge hâ igu hoagu ǃgâ-ai ge tsūdī. Tita ǁnāxū tsîts ge ǀkhara elogu tsî ǁgôa-elo-īgu tsîna titats nî ǁaiǁaise ge dībasen. 10 ǁNā-amaga ta ge tsūǀkhāba sa surib ǂama nî hā kai tsî ta ge aoregu sa surib digu hoaga, kaiba xu ǂkhammi kōse nî ǃgam. Tita ge sa surib din hoana nî hîkākā; ǁîn hoana ta ge ǂhaub ra ǀnapubēhe khami nî ǀnapubē. 11 Sa surib di-i, ǃās ǃnâ ga ǁō-i hoa-i ge arin xa nî ōhe tsî ǃaub ǃnâ ga ǁō-i hoa-i ge kai-anidi xa nî ǂûhe. Tita, ǃKhūta ge ǁîsa go mî.’ ”
12 ǃAruǀîb ge Ahiaba Jerobeammi di taras ǃoa ge mî: “Oa nēsi oms âs ǁga. ǃĀs ǃnâs ra ǂgâ hîab ge ǀgôab âsa nî ǁō. 13 Israeli din hoan ge ǁîba āba tsî nî ǁkhō. Jerobeammi surib hoab ǃnâb ge ǁîba a hū, ǁkhōhe nîba; ǁîb ǀguib ǀkhab ǃKhūb, Israeli di Eloba ǂkhîǂâixa amaga. 14 Jerobeammi gaosisa nî ǀamǀam gao-aobab ge ǃKhūba Israeli ǂama nî mâi. 15 ǃKhūb ge Israela nî ǁkhara tsîb ge ǂāb ra dâu ra ǁgammi xa gongonhe khami nî gongonhe. ǁÎb ge Israeli khoena nē ǃgâi ǃhūb, ǁîn aboxagab ge māba xu ūǂui tsî Eufratǃāb nauǃanib kōse nî ǀgaruǀgaru, ǁgôa-elo-īgu Aseras digan ge ǁîban nî ǁaiǁaise dī amaga. 16 ǃKhūb ge Jerobeammi ge ǁore tsî Israeli khoen ona ǁore kai ǃkhais ǃaroma Israela nî ǁnāxūǃgâ.”
17 Os ge Jerobeammi tarasa Tirsas ǁga ge oa. Tsî oms âs ǃnâs ra ǂgâ hîab ge ǀgôaba ge ǁō. 18 On ge Israeli khoen hoana ǁîba āba tsî ge ǁkhō, ǃKhūb ge ǁîb di ǃgāb, kēbo-aob Ahiab ǃnâ-u mî hâ i khami.
Jerobeammi di ǁōb
19 Jerobeammi ge dī xūn hoan, ǁîb di torogu tsî ǁîb ǂgaeǂguis tsîn hoan ge ǃNaeǃkhaidi ǂKhanis Israeli Gao-aogu dis ǃnâ a xoamâisa. 20 Jerobeammi ge ǀgamdisiǀgamǀa kuriga ge gao. ǁÎb ge ge ǁō tsîb ge ǁîb ôab Nadaba ǁîb khaoǃgâ ge gao-ao kai.
Rehabeammi ge Judab ǂama ra gao-ao kai
(2 Kroniks 11:5—12:15)21 Salomob ôab Rehabeammi ge hakadisiǀguiǀa kurixab a hîa Judab ǂama ge gao-ao kai. ǁÎb ge ǃKhūb ge Israeli hoab ǃnâ, ǁîs ǃnâb nî ǀgoreǀîhese ǁhûiǂuibasen ǃās Jerusalems ǃnâ disihûǀa kuriga gao-aose gere ǂgaeǂgui. ǁÎb îs ge Naamas, Amonǁîsa.
22 Judab khoen ge ǃKhūb ǃoagu gere ǁore tsîn ge ǁîn di aboxagu gere dīs ǃgâ-ai ǁîba ǃnāsase ge ǁaixa kai. 23 ǁÎn ge ǁkhāti ǀgoreǀîǃkhaide ge dībasen tsî ǀgapi ǀuigu tsî Aseras īgu tsîna ǃhomgu ai tsî ǃam haidi ǃnaka ge dī. 24 ǁNāpa gu ge aore ǀai-aogu tsîna ge hâ i. Judab khoen ge ǃKhūb ge Israeli khoen aiǃâ ǃhūba xu ǁgariǂui khoen gere dī taotaosa xūn ǁkhāna gere dī.
25 Koroǁî kurib Rehabeammi gaosis dib ǃnâb ge gao-aob Sisaki, Egipteb diba Jerusalemsa ge ǁnāǂam. 26 Tsîb ge Tempeli di ǁuigu tsî gao-ommi di ǁuigu hoagu tsî ǁkhāti ǃhuniǀuri ǁkhaukhōdi Salomob ge dī hâ idi tsîn hoana ge ū. 27 Ob ge gao-aob Rehabeamma ǁnā ǁkhaukhōde brons ǁkhaukhōdi ǀkha ge ǃkhōǃkhuni tsî ǁîde gao-ommi dao-amde ra ǃûi ǂamkhoega ǃûiǃgâ gu nîse ge mā. 28 Gao-aob ge Tempeli ǁga gere ǃgû ǃnās hoasa gu ge ǃûi-aoga ǁîde gere tani tsî ǁîde ǁkhawa sâuǃnâ-ommi ǁga gere oa-ū.
29 Rehabeammi gere dī xūn hoan ge ǃNaeǃkhaidi ǂKhanis Judab Gao-aogu dis ǃnâ a xoamâisa. 30 Rehabeammi tsî Jerobeammi tsîkha ǁaegub ge toroba hoaǁae ge hâ i. 31 Rehabeammi ge ǁō tsî ǁîb îgu tawa Davidi ǃĀs ǃnâ ge ǁkhōhe. ǁÎb îs ge Naamas, Amonǁîsa. ǁÎb ôab Abiab ge ǁîb khaoǃgâ ge gao-ao kai.
© Khoekhoegowab Elobmîs © Bible Society in Namibia, 2020.
