Elob ôan
1 Mû re tarebe ǀnammab ǁGûba sada ra mā ǃkhaisa, Elob ôan ti da nî ǂgaihese. ǁNā-amagab ge ǃhūbaiba sada a ǀū, ǁîbab ge ǀū i xui-ao. 2 ǀNamsabedo, nēsi da ge a Elob ôa, xawe i ge noxopa ǃgāsa tama hâ sada nî tare kai ǃkhaisa. Xawe da ge a ǂan ǁîb ga ǂhai, o da nî ǁîb khami ī ǃkhaisa, ǁîba da īb a khami nî mû xui-ao. 3 Tsî i ge mâ-i hoa-i nē ǃâubasensa ūhâ-e ra ǃanuǃanusen, ǁîb a ǃanus ǁkhās khami.
4 Mâ-i hoa-i hîa ra ǁore-i ge ǁkhāti ǁgauoǃnâsib ai a ǀhapixa, ǁoreb ge a ǁgauoǃnâsi. 5 Tsî du ge a ǂan ǁîb ge ǁorenab nî ūbēse ǂhai tsî-i ǁore-e ǁîb ǃnâ ǀkhai ǃkhaisa. 6 Mâ-i hoa-i hîa ǁîb ǃnâ hâ-i ge ǁore tama; tsî mâ-i hoa-i hîa ra ǁore-i ge ganupe ǁîba mû tama tsî ǁkhāti a ǀū. 7 ǀGôarodo, tā i khoe-i xare-e ǂgaeǂhapu du! ǁNā-i hîa ǂhanu-aisiba ra dī-i ge a ǂhanu-ai, ǁîb a ǂhanu-ais ǁkhās khami. 8 Tsî ǁnā-i hîa ra ǁore-i ge a ǁgâuab* di, tsoatsoasa xub ǁgâuaba ra ǁore amaga. Tsî nēs ǃaromab ge Elob Ôaba* ge ǂhai, ǁgâuab sîsengab nî hîkākāse.
9 Eloba xu ǃnae hâ-i hoa-i ge ǁore tama, Elob di ǂūsib ǁî-i ǃnâ hâ xui-ao, ǁî-i ge a ǁore ǁoa, Eloba xu i ǃnae hâ amaga. 10 Nēs ǃnâ i ge Elob ôan tsî ǁgâuab ôan ǁaegu ǂansa: Mâ-i hoa-i ǂhanu-aisiba dī tama-i tsî ǁkhāti ǁî-i di ǃgâsa-e ǀnam tama-i ge Elob ôa tama hâ.
ǃGâsaǀnamgus
11 Nēs ge ǂhôas hîa du ge tsoatsoasa xu ǁnâusa: A da ǀnamgu 12 Kainni hîa ǂkhabab dib tsî ǃgâsaba ge ǃgammi khamis ose. Tare-i ǃaromab kha ǁnâi ǁîba ge ǃgam? ǁÎb di sîsengu ge ǂkhaba i tsî ǃgâsab diga ǂhanu-ai i xui-ao.
13 Tā buru re ǃgâsado, ǃhūbaib ga sado ǁkhano. 14 ǂAn da ge a ǁōba ǃkharuǀkhā tsî da ge ûib ǃnâ ǃgûǂgâ ǃkhaisa, ǃgâsana da a ǀnam xui-ao tsî ǁnā-i hîa ǀnam tama-i ge ǁōb ǃnâ ra hâhâ. 15 Mâ-i hoa-i hîa ǁî-i di ǃgâsa-e ǁkhan hâ-i ge a ǃgamao, tsî du ge a ǂan mâ ǃgamao-i hoa-i ǁî-i ǃnâ ǀamo ûiba ūhâ tama ǃkhaisa. 16 Nēn ai da ge ǀnamma ge ǂan, ǁîb ge sada ǃaroma ûib âba a ǁguiba ǃkhaisa. Sada tsîn ge ǁkhāti sada ǃgâsan ǃaroma sada ûiba nî ǁguiba. 17 Tsî khoe-i ga ǃhūbaib di xūna ūhâ tsî ǁî-i di ǃgâsa-i ǂhâb ǃnâ hâ ǃkhaisa mû tsî ǁî-i ǃoagu ǂgaob â-e ǂganamo, mâtib Elob di ǀnamma ǁî-i ǃnâ nî hâhâ? 18 ǀGôarodo, tā da mîs tsî nams tsîra ǃnâ ǀgui ǀnam re, xawe sîsenǂuib tsî amab ǃnâ.
Elob aiǃâ ǁkhoaǂgaoxa
19 Tsî da ge nēs ǀkha nî ǂan amaba xu da hâ ǃkhaisa; tsî da ge nē ǀgaus ai Elob aiǃâ sada ǂgaoga ǁkhawa nî ǁapoǁapo. 20 Tsîs ga sada ǂgaoǂansa sada ǀgoraǃgâ, ob ge Eloba sada ǂgaoǂans xa a kai tsî hoaragana a ǂan. 21 ǀNamsabedo, sada ǂgaoǂans ga sada ǀgoraǃgâ tama i, o da ge ǁkhoasiba Elob aiǃâ ūhâ. 22 Tsî da ge tare-i ǀgui-i ka xawe da ga ǂgano, ǁîba xu ra ǃkhōǃoa, ǁîb mîmāde ǁnâuǀnam tsî da ǁîba ǃgâibana ra dī xui-ao. 23 Tsî nēs ge mîmās, ǁîb Ôab Jesub Xristub* di ǀons ǃnâ ǂgom tsî da nî ǀnamgu ǃkhais disa, ǁîb ge mîmā da khami. 24 ǁÎb di mîmāde ra ǁnâuǀnam-i hoa-i ge ǁîb ǃnâ ra hâ tsî ǁîba ǁî-i ǃnâ; tsî da ge nēna xu a ǂan, ǁîb sada ǃnâ hâ ǃkhaisa, sadab ge mā Gagab ǃnâ-u.
© Khoekhoegowab Elobmîs © Bible Society in Namibia, 2020.
