Horesa ǂgomsabe-e ǀgoraǃgâǃkhaib ǁga ī-ūs
1 ǀGui ǂgomsabe-i ga nau-i ǃoagu ǂhanusiǁhō-e ūhâo, o i kha tare-i ǃaroma ǁî-e ǂhanuoǃnâ ǀgoraǃgâ-aogu tawa nî sī, ǃanun tawas ose? 2 ǂAn tama du kha hâ Elob khoen nî ǃhūbaiba ǀgoraǃgâ ǃkhaisa? Tsî sadu xab ga ǃhūbaiba ǀgoraǃgâheo, ǁnâi anu tama du hâ ǂkhari xūna ǀgoraǃgâsa? 3 ǀHomǃgāga da nî ǀgoraǃgâ ǃkhaisa du kha a ǀū? Tsî mâtikō ǃnāsase da ǁnās ǃgâ-ai hoaǃnā-aixa ûib xūna a ǀgoraǃgâ ǁkhā? 4 Tsēkorobe ǂhanusiǂnoagu-ain ǂama du ga ǂnoagu, o kerkheb ǃnâ xū tamase ra ǃgôahe khoena du ǀgoraǃgâ-aose nî mâi. 5 Sado taotaos ase ta ge nēsa ra mîba du. O i kha ǁnâi sadu ǃnâ ǀgui gā-ai-i xare-i, ǂgomsaben ǁaegu ǀgoraǃgâ ǁkhā-e a ǀkhai? 6 Xaweb ge ǀgui ǂgomsabeba naub ǃoagu ǀgoraǃgâǃkhaib ǃnâ ra sī, tsî du ge nēs ǀkha ǂgomoǃnân xa ǀgoraǃgâhesa ra mā-am?
7 ǁNāti ī ǂnoagu-aide ǀūbeǀgoraǃgâ-aon ais ai ūhâbagus ge ǀnai, ǂoaǃnâs ase ī. Khoe-i ga tsū xū-e dī tsio, tare-e ǁnâi a tsū? Tsî khoe-i ga ǀhôagaoǃnâ tsio, tare-e ǁnâi a tsū? 8 ǀNîn âdu ge ǁnāti ge ī i, xawe du ge sadu ǂûdo tsūse dī tsî sadu ǂhunuma ǂgomsabena ra gāxaǃnâ tsî ǀhôagaoǃnâ. 9 ǂAn tama du kha hâ, ǂhanuoǃnân Elob Gaosiba ǀumi tide ǃkhaisa? Tā gāsen re, ǀai-aon kao, ǁgôa-eloǃoaba-aon kao, ǃgamekhôan kao, aorekhoegu ǁgoe-ūgu ragu kao, tarekhoedi ǁgoe-ūgu radi kao, 10 ǃnari-aon kao, xūǃgunuxan kao, ǀhoroseman kao, mîǁgaiǁgai-aon kao, ǀhôagaon kao, ǁîn ge Elob Gaosiba ǀumi tide. 11 Tsî ǁnātin ge ǀnîn âdo ge ī i, xawe du ge ǃKhūb Jesub Xristub* di ǀons tsî sada Elob di Gagab ǃnâ ǁāhe, ǃanuǃanuhe tsî ge ǂhanu-ai kaihe.
Sadu sorode Elob di ǃgôasib ǃoa sîsenū
12 ǀNî khoen ge ra mî: “Hoa xūna ta ge mā-amhe hâ” xawen ge hoana harebe tama hâ. “Hoa xūna ta mā-amhe hâ” xawe i ge ǀgui-i ân tsîna tita gaoǂam tide. 13 “ǂÛn ge ǃnāb ǃaroma hâ tsî ǃnāba ǂûn ǃaroma” xawe Elob ge ǁîn hoana nî hîkākā. Soros ge ǀaib ǃaroma hâ tama hâ, xawe ǃKhūb ǃaroma tsî ǃKhūba soros ǃaroma. 14 Tsî Elob, ǃKhūba ge ǁōba xu ǂkhaiǂkhaib ge ǁkhāti sada ǁîb di ǀgaib ǃnâ-u nî ǂkhaiǂkhai.
15 ǂAn tama du kha ǁnâi hâ sorodi âdu a Xristub di uniǁae ǃkhaisa? ǁNâi ta Xristub di uniǁaede ū tsî ǁîde ǀai-ao-i di uniǁaese nî dī? Tās ǁnāsa ī. 16 ǂAn tama du kha hâ, ǀai-aos ǀkha ra ǃgaeǁaresenni hoab ǁîs ǀkha ǀgui soro ǃkhaisa? “ǁÎra ge nî ǀgui soro” ti ra Xoas ǃnâ mîhe xui-ao. 17 Xawe ǃKhūb ǀkha ra ǃgaeǁaresen-i ge ǁîb ǀkha a ǀgui gaga.
18 ǀAiba ǁhaixū re. Hoaraga ǁoren khoe-i ra dīn ge khoe-i ǃauga hâ, xawe ǀaiba ra dī-i ge ǁî-i soros ǂûs ǃoagu ra ǁore. 19 ǀŪ du kha a, sadu soros a ǃAnu Gagab sadu ǃnâ ǁan hâb di Tempel ǃkhaisa? Sadu ge sadu ǂûdu di tama, xawe a Elob di. 20 ǃGomǀgausase du ǁamahe hâ, xuige Elob di ǃgôasib ǃoa sorodi âdo sîsenū re.
© Khoekhoegowab Elobmîs © Bible Society in Namibia, 2020.
