1 Korinteǁîn 10 - Khoekhoegowab New Translation 2020 (KKG20)

ǁGôa-eloǃoabas ǃoagu hâ ǃkhâikhoms

1 ǂGao tama ta hâ, ǃgâsado, ǀūǂamse du nî hâ ǃkhaisa, sada aboxagu hoagu ge ǃâus xa ǂgaeǂguihe hâse hoatsama huriba ǃgâu ǃkhaisa. 2 Tsî gu ge hoaga Moseb di saoǃgonaose, ǃâus tsî hurib tsîra ǃnâ ǁāǁnâhe ǃkhaisa. 3 Hoagu ge ǁkhā gagasi ǂû-e ǂû 4 tsî ǁkhā gagasi āxū-e gere ā ǃkhaisa. ǁÎgu ge gagasi ǃhaob, ǁîgu ǀkha gere ǃgûba xu gere ā tsî ǁnā ǃhaob ge a Xristu.* 5 Xawe ǂguin ǁîn din ǀkhab ge Eloba ge ǂkhî tama hâ i, tsîn ge ǃgaroǃhūb ǃnâ ge hîkākāhe.

6 Tsîn ge nēna sada di ǃkhâikhoms ase ge ī, sada ǂkhababa tura tidega, ǁîn gere tura khami. 7 Î du ǁkhāti tā ǀnîn ân khami ǁgôa-eloǃoaba-ao kai. Xoamâihe hâ khami: “ǁAes ge ǂû tsîn nî āse ǂnû tsî ǁgauoǃnâsiba nî ûiǂuise ge khâi.” 8 Î da ǁkhāti tā ǀai, ǀnîn ân ge ǀai khami, tsîn ge ǀgui tsēs ǃnâ ǀgamdisiǃnonaǀaǀoadisina ge ǁō. 9 Î da ǁkhāti Xristuba tā ǃâitsâ, ǀnîn ân ge ǃâitsâ bi tsî ǀaon xa ǃgamhe khami. 10 Î du ǁkhāti tā ǀara, ǀnîn ân gere ǀara khami tsîn ge Hîkākās di ǀHomǃgāb xa ge ǃgamhe.

11 Tsî nēn hoan ge ǁîn ǀkha ge ī, sada ǃaroma hâ aiǁgaus ase tsîn ge xoamâihe hâ sadan nî ǃkhâikhomse. ǀAms a ǀgū ǁaeb ǃnâ da sada ûi hâ xui-ao.

12 ǁNā-amaga, mâ-i hâ, ti ga ǂâi-e, a i ǂanbasen, î-i tā ǁnā. 13 ǀNî ǃâitsâ-i ge sado hāǂam tama hâ, khoesi ǃâitsâ-i ǀgui-i ose, xawe Elob ge a ǂgomǂgomsa tsî sadu nî ǁkhā du as ǂamai ǃâitsâhe ǃkhaisa mā-am tide. Nē ǃâitsâs ǀkhab ge ǁkhāti mâǃkharus di ǀgaiba nî mā du tsî ǁnāti huiba nî mā.

14 ǁNā-amaga, ti ǀnamsabedo, ǁgôa-eloǃoabasa ǃkhoeni. 15 ǁNâuǃāxa khoen ǀkhas khami ta ra ǃhoa, xuige sado aitsama mî ta ra-e ǀgoraǃgâ. 16 ǁNā ǀgabis gangans dis hîa da ra ǀkhaesa kha ǁnâi, Xristub ǀaob ǃnâ amǃnâxa tamasa? Pereb hîa da ra khôaba, Xristub soros ǃnâ amǃnâxa tamasa? 17 ǀGui pereb a amaga da ge sada hoada a ǀgui soro, sada hoada ǀgui pereb ǃnâ ra amǃnâxa xui-ao.

18 Kō Israelǁîna, ǁnān ǁguibade ra ǂûna ǁnâi altars ai ra ǁguibahen ǃnâ amǃnâxa taman hâ? 19 Tare-e ta kha ǁnâi ra mî? ǁGôa-elo-i ra ǁguibahe ǂû-i tamas ka io ǁgôa-elo-e a ǂhâǂhâsa? 20 Hî-î, ǁîn ra ǁguiban ge ǁgâuagu ǃaroma ra ǁguibahe tsî Elob ǃaroma ǁguibahe tama hâ. Tita ge sadu nî ǁgâuagu ǀkha ǂgobesen ǃkhaisa ǂgao tama hâ. 21 ǃKhūb di ǀgabis tsî ǁgâuagu di ǀgabis tsîra xu du ge a ā ǁoa, ǃKhūb di tāb tsî ǁgâuagu di tāb tsîkha ǃnâ du ge a amǃnâxa ǁoa. 22 Tamas ka io, o da kha ǃKhūba taub nîse ra ǁgoaǂui ǂgao? ǁÎb ǃgâ-ai da kha ǀnîsi a ǀgaisa? 23 ǀNî khoen ge ra mî: “Hoa xūna ta ge mā-amhe hâ” xawen ge hoana harebe tama hâ. ǁKhāti du ge “Hoa xūn a mā-amsa” ti ra mî, xawen ge hoana omkhâi tama hâ. 24 A i khoe-i xare-e tā ǁî-i di ǂhunuma ǃgâiba ôa, xawe nau-i di ǃgâiba ôa. 25 ǁGanǁamaxūǃkhaib ai ra ǁamaxūhen hoana ǂû, ǂgaoǂans âdu ǃaroma dîna dîs ose. 26 “ǃHūbaib tsî ǁîb ai hân hoan ge a ǃKhūb di” tis ra xoasa mî xui-ao.

27 Tsî ǂgomoǃnân di ǀgui-i ga ǁkhau du tsî du ga ǃgû ǂgao, o mâi-aiǃâhe du ra xū-i hoa-e ǂû, xū-i xare-e ǂgaoǂans ǃaroma dîǃnâ tamase. 28 Tsî khoe-i ga sadu ǃoa “ǁGôa-elogu ǁguiba-i ge nē-e” ti mî, o ǁîsa go ǂanǂan tsi-i tsî ǂgaoǂans tsîn ǃaroma tā ǂû. 29 Sa ǂhunuma ǂgaoǂans xa ta ǂâibasen tama, xawe nau-i dis xa.

“Tare-i ǃaromab kha ti ǃnorasasiba nau-i di ǂgaoǂans xa nî ǀgoraǃgâhe? 30 Tita ga Eloba ǂû-i ǃaroma gangan, o tare-i xa ta kha ǁî-i ǂama ta ra gangan xū-i ǃaroma nî ǀhapimāhe?” ti i ge ǀnî-e a dî ǁkhā.

31 ǁNā-amaga dī du ran hoana, ǂû du kas, ā du kas hoasa Elob di ǂkhaisib ǃoa dī re. 32 Tā ǂhanib ase Jodeǁîn, Grikeǁîn tamas ka io Elob di kerkheb kas hoasa ība, 33 tita tsîn hoa khoena hoa xūn ǃnâ ǃgâiǃgâibasa ra dītsâ khami. Tita ge ti ǂhunuma harebesa ôa tama hâ, xawe ǂguin disa ǃgâiǃō kaihen nîga ra ôa.