Tempelǃûi-aogu
1 Nēti gu ge Tempelǃûi-aose nî ǃoaba Leviǁîga ge ǀgoraǂgāhe. Koraxi ǃhaoǃnāsa xu Koreb ôab Meselemiab, Asafi surib dib. 2 Meselemiab ge hû ǀgôaga ge ūhâ i. ǁÎgu ge kaiba xu ǂkhammi kōse, Saxariab, Jediaeli, Sebadjab, Jatnieli, 3 Elammi, Johananni tsî Eliehoenaib tsîga.
4 Obed-Edommi ge ǁkhaisa ǀgôaga ge ūhâ i. ǁÎgu ge kaiba xu ǂkhammi kōse, Semajab, Josabadi, Joaxi, Sakari, Netaneli, 5 Ammieli, Isaskari tsî Peuletaib tsîga.
6-7 Obed-Edommi di ǂguro ǀgôab Semajab ge ǃnani ǀgôaga ge ūhâ i. ǁÎgu ge Otnib, Rafaeli, Obedi, Elsabadi, Elihub tsî Semakiab tsîga. Nēgu ge ǁîgu di ǃhaoǃnādi ǃnâ ge kaise ǂhâǂhâsa i aoga, ǁîgu di kai ǁkhāsib ǃaroma; ǀuniga ǀgamkha ge ǀō-aisa ǁkhāsiba ge ūhâ i.
8 Obed-Edommi tsî ǁîb di ôananôagub di aogu, ǀhaob ai ge ǃnanidisiǀgamǀa igu ge hoatsama ge nē ǃoabas ǃoa ǁkhāǁkhāsa i khoega.
9 Meselemiab di ôananôagub ge disiǁkhaisaǀa, ǁkhāǁkhāsa aoga ge ǃkhōǂgā hâ i.
10 Merarib ǃhaoǃnāsa xub ge Hosaba ge hâ i, haka ǀgôaga ge ūhâ iba. Simrib, (ǁîb ge ge ǂguro ǀgôa tama hâ i, xaweb ge ǁgûba ǂgaeǂguisa ge mā bi), 11 Hilkiab, Tebaliab tsî Saxaria hâga. Hosab ǃhaoǃnās digu, Tempelǃûi-ao ge igu ge ǀhaob ai ge disiǃnonaǀa i.
12 Tempelǃûi-aogu ge ǁîgu di ǃhaoǃnāde ǃoa, ǃnandi ǃnâ ge ǀgoraǂgāsa i, tsî gu ge Leviǁîgu ǁkhāgu khami Tempeli tawa gu nî dī ǃoabade ge māhe hâ i. 13 Mâ ǃhaoǃnās hoas, kais kas, ǂkharis kas hoas ge mâ dao-ams tawan ǃûisa nî ūhâ ǃkhaisan nî ǂanga, ǀkhūsa ge ǂnau. 14 Selemjab ge aiǂoas di dao-amsa ge hō, ǁîb ôab Saxariab, gā-ai ǀapemā-ao ge ib ge ǀapas dao-amsa ge hō. 15 Obed-Edommi ge ǃkhawagas dao-amsa ge māhe tsî ǀgôagu âb ge sâuǃnâ-omkha di ǃûisa ge māhe. 16 Supimmi tsî Hosab tsîkha ge huriǂoas dao-ams tsî Saleket-Dao-ams, kai daob tawa hâs tsîra ge māhe. ǀGui ǃûiǁaeb ge nauba xu gere sao. 17 Aiǂoasǀkhāb ai gu ge ǃnani ǃûi-aoga tsēkorobe gere ǃûi, ǀapas ǃnâ hakagu tsî ǃkhawagas ǃnâ hakaga. Haka ǃûi-aogu ge sâuǃnâ-omkha tawa tsēkorobe ǃûisa gere ūhâ, mâ sâuǃnâ-ommi hoab tawa ǀgamkha. 18 Huriǂoasǀkhāb di ǂgāb tawa gu ge haka ǃûi-aoga daob tawa gere ǃûi tsî ǀgamkha ǂgāb tawa. 19 Nēdi ge ge Koraxǁîn tsî Merariǁîn ǃûi-aogu di ǀgoraǂgā i.
Nau ǃoabadi Tempeli didi
20 ǀNîgu ǁîgu di horesa Leviǁîgu digu ge Tempeli di ǁuib tsî Elob gere khaibahe ǀkhaexūn gere sâuǃnâ-omkha ǂama ǃûisa ge ūhâ i. 21 Gersonni ôagu di ǀguib, Ladanni ge ge ǀnî ǀaokhoeǃnandi, ǁîb ôab Jehieli ǀaokhoen tsîna ǃkhōǂgā hâdi di aboxa i. 22 Nau ǀgôakha Ladanni dikha Setammi tsî Joel hâkha ge Tempeli di ǁuib tsî sâuǃnâ-omkha ǂama mûǂamsa ge ūhâ i.
23 Amrammi, Isari, Hebronni tsî Usieli tsîgu di ôananôagub tsîn ge ǁguiǂamde ge māhe hâ i.
24 Sebueli, Moseb ôab Gersommi ǃhaoǃnās dib ge Tempeli di ǁuigu ǂama dana mûǂamaose ge hâ i. 25 ǁÎb ge Gersommi di ǃgâsab Elieseri ǃnâ-u ge Selomiti ǀaokhoe i. Elieseri ge ge Rehabiab di î i, Rehabiab ge ge Jesajab di î i, Jesajab ge ge Jorammi di î i, Jorammi ge ge Sixrib di î i, tsî Sixrib ge ge Selomiti di î i. 26 Selomiti tsî ǁîb surib di aogu tsîn ge gao-aob Davidi, ǀaokhoen danakhoegu, ǃhaoǃnādi ǂgaeǂgui-aogu tsî toroǂamkhoegu tsîn ge Elob ra khaibahe ǀkhaexūn ǂama mûǂamsa ge ūhâ i. 27 ǁÎgu ge torob ǃnâ gu ge ǁkhâuǁnâ xūna xu ū tsî ǁîna Tempeli ǃnân nî sîsenūhese ge khai. 28 Hoaraga ǀkhaexūn kēbo-aob Samueli, Kisi ôab gao-aob Sauli, Neri ôab Abneri tsî Serujab ôab Joab tsîgu ge Tempeli ǃnân nî sîsenūhese mān, ǂama gu ge Selomiti tsî ǁîb ǀaokhoegu tsîga mûǂamsa ge ūhâ i.
Nau Leviǁîgu nî dī ǃoabadi
29 Isari di ôananôaguba xu gu ge Kenanjab tsî ǁîb ôagu tsîga ǃaugab di sîsenga ge ǁgui-aihe hâ i, mûǂamaose tsî Israelǁîn ǁaegu hâ ǃgomsin di ǂhanuǂhanu-aose.
30 Hebronni di ôananôaguba xu gu ge Hasabiab tsî ǁîb di ǀguiǀoadisi tsî hûkaidisi ǂoaǂamsa aogu tsîga, Jordanni huriǂoasǀkhāb Israeli dib ǃnâ, gao-aob ra dībahe ǃoabadi tsî ǃKhūb ra dībahe ǃoabadi tsîn ǂama mûǂamsa ge ūhâ i. 31 Jeriab ge ge Hebronni ôananôagub di ǂgaeǂgui-ao i. Hakadisiǁî kurib gao-aob Davidi ǂgaeǂguis dib ǃnâs ge ôaǃnâsa, Hebronni ôananôagub di ǀaokhoen ǃnâ ge dīhe, tsî gu ge ǂoaǂamsa toroǃkhamaogu ǁnā ǃhaos diga Jasers, Gileadi ǃnâ ǂnôas ǃnâ ge hōhe. 32 Gao-aob Davidi ge ǀgamǀoadisi tsî hûkaidisi ǂoaǂamsa danakhoega, Jeriab ǀaokhoena xu hō tsî ǁîga Jordanni aiǂoasǀkhāb Israeli dib ǃnâ, Rubenni, Gadi tsî ǃkhare ǃhaos Manaseb dis tsîdi ǂama, hoaraga ǃoabadi, gao-aob ra dībahedi tsî Elob ra dībahedi ǂama mûǂamaose ge mâi.
© Khoekhoegowab Elobmîs © Bible Society in Namibia, 2020.
