1 Davidi ge kaiseb ge sī kairao, ǁîb ôab Salomoba Israeli ǂama ge gao-aodī.
Leviǁîgu di ǃoabas
2 Gao-aob Davidi ge Israeli di ǂgaeǂgui-aogu tsî pristergu tsî Leviǁîgu tsîgu hoaga ge ǀhaoǀhao. 3 ǁÎb ge ǃnonadisi kurigu tsî ǁnās xa ǃnāsa kuriga ūhâ Leviǁîgu hoaga ge ǃgôakhâi. ǁÎgu ge ǀhaob ai ge ǃnonadisiǁkhaisaǀaǀoadisi i. 4 ǁÎga xu gu ge ǀgamdisihakaǀaǀoadisiga Tempeli di sîsenna nî mûǂamse ge ǁgaumâihe, ǃnaniǀoadisiga ǂamkhoe tsî ǀgoraǃgâ-aose, 5 hakaǀoadisiga dao-amdi ǃûi-aose tsî hakaǀoadisiga ǃKhūba gu ǀkhōxūn, gao-aob ge ǁnās ǃaroma mān ǀkha nî koase.
6 Davidi ge Leviǁîga ǃnona ǃnandi ǃnâ ge ǀgoraǂgā, Levib ôagu Gersonni, Kohati tsî Merari hâga ǃoa.
7 Gersonni ge ǀgam ǀgôakha, Ladanni tsî Simeib tsîkha ge ūhâ i. 8 Ladanni ge ǃnona ǀgôagu, Jehieli, Setammi tsî Joeli tsîga ge ūhâ i. 9 ǁÎgu ge ge Ladanni ôananôagub ǃhaoǃnādi di dana i. (Simeib ge ǃnona ǀgôagu, Selomoti, Hasieli tsî Haranni tsîga ge ūhâ i.) 10-11 Simeib ge haka ǀgôaga ge ūhâ i, kaiba xu ǂkhammi kōse, Jahati, Sinab, Jeusi tsî Beriab tsîga. Jeusi tsî Beriab tsîkha ge ǂgui ǀgôaga ge ūhâ tama hâ i, ǁnās ǃaromab ge ǁîkha ôananôaguba, ǀgui ǃhaoǃnās ase ǀgui gere ǃgôahe.
12 Kohati ge haka ǀgôagu, Amrammi, Isari, Hebronni tsî Usieli tsîga ge ūhâ i. 13 Amrammi ge ge Aronni tsî Moseb tsîkha di î i. (Aronni tsî ǁîb di surib digu ge ge ǁhûiǂuihe, ǀamose gu ǃanu xūn ǂama mûǂamsa nî ūhâ, tsî ǃKhūba ǀanǀanǁguibade dība, ǁîba ǃoaba tsî khoena ǁîb ǀons ǃnâ nî ǀkhaese. 14 Xawe Moseb, Elob aob di ôakha ge Leviǁîn ǃhaos ǃnâ ge ǃkhōǂgāhe.) 15 Moseb ge ǀgam ǀgôakha, Gersommi tsî Elieseri tsîkha ge ūhâ i. 16 Gersommi di ôagu ǃnâb ge Sebuela ge dana i. 17 Elieseri ge ǀgui ǀgôab, Rehabiab ǀguiba ge ūhâ i, xawe Rehabiab ge ǂgui ǀgôaga ge ūhâ i.
18 Kohati di ǀgamǁî ǀgôab Isari di ôab Selomiti ge ge ǁîn ǃhaoǃnās di dana i. 19 Kohati di ǃnonaǁî ǀgôab Hebronni ge haka ǀgôaga ge ūhâ i. ǁÎgu ge Jeriab, Amariab, Jahasieli tsî Jekameammi tsîga. 20 Kohati di hakaǁî ǀgôab Usieli ge ǀgam ǀgôakha, Mikab tsî Isiab tsîkha ge ūhâ i.
21 Merarib ge ǀgam ǀgôakha, Malib tsî Musi hâkha ge ūhâ i. Malib ge ǀgam ǀgôakha, Eleasari tsî Kisi tsîkha ge ūhâ i, 22 xawe Eleasari ge aore ǀgôaga ge ūhâ tama hâ i, tsî tareǀgôadi ǀguide ge ūhâ i tsîdi ge ǁîde, ǁîdi îb di ǃgâsab Kisi ôagu ǀkha ge ǃgame. 23 Merarib di ǀgamǁî ǀgôab Musib ge ǃnona ǀgôagu, Malib, Ederi tsî Jeremoti tsîga ge ūhâ i.
24 Nēgu ge Levib di ôaga, ǁîgu di ǃhaoǃnādi tsî ǀaokhoen ǃoa, ǀondi âgu ǀkha a xoamâisa. Mâb ǁîb ôagu dib, ǀgamdisi kurixa tsî ǁnās xa ǃnāsa kuriga ūhâb hoab ge ǃoabasa ǃKhūb di Tempeli ǃnâ gere dī.
25 Davidi ge ge mî: “ǃKhūb, Israeli di Elob ge ǁîb di ǁaesa sâba go mā, tsîb ge ǁîb ǂûba ǀamose Jerusalems ǃnâ nî ǁan. 26 Tsîs ge ǃKhūb di Tentommi tsî nau xūn ǃoabas tawa ra sîsenūhen tsîna gu Leviǁîga nî tani ǃkhaisa ǃaruǀî ǂhâbasa tide.” 27 Davidi di ǀuni mîmās ai gu ge hoaraga Leviǁîga, ǀgamdisi kurixa gu gereo, ǃoabas ǃaroma gere xoakhâihe, 28 î gu sao ra ǃoabade dī: Aronni ǃhaos di pristerga gu ge Tempelǃoabadi tawa nî hui, ai-omdi tsî ǁîdi ǃnā-omdi tsîde gu ge nî kōǃgâ, tsî gu ge ǃanuxūn Tempelǃoabadi din hoana ǃanuse nî ūhâ. 29 ǁÎgu ge ǃereamsa nî tani, Elob ra ǁguibahe peregu, ǁguibahe ra mel-i, khūkhū-e ūhâ tama pere-i, ǁganhe ra ǁguibadi, oli-i ǀkha ra habahe mel-i, tsî Tempeli tawa ra sī-ūhe ǁguibade ǀnō tsî ǀguiros ǂama. 30 ǁKhāti gu nî ǃKhūba mâ ǁgoas tsî ǃuis hoasa koa tsî karese, 31 tsî ǁkhāti khauǁguibadeb ǃKhūba ra dībahe ǃkhaidi, Sabbattsēdi, ǀAsa ǁKhâb Kaitsēdi tsî nau ǁâudīgu hoagu tawa. Mâtikō ǃgôab di Leviǁîgu, mâ ǃnās hoasa nē ǃoabasa nî dī ǃkhais ge ge xoaǁguisa i. Leviǁîgu ge nē ǃoabas, ǀgoreǀîs disa gu hoaǁae ǃKhūba nî dībase ge ǁgaumâisa i. 32 ǁÎgu ge ǁkhāti ǃKhūb di Tentommi tsî Tempeli tsîkha ǂama ǃereamsa nî tani, tsîgu ge ǁîgu ǃgâsagu, Aronni ǃhaos di pristerga, Tempelǃoabadi tawa nî mâxōǀkhā.
© Khoekhoegowab Elobmîs © Bible Society in Namibia, 2020.
