ǃGaeǀhaos ǂGaesa doe-ūs ǃaroma hâ ǂhomisendi
1 Davidi ge omde Davidi ǃĀs ǃnâ ge ombasen. ǁKhātib ge ǁîba ǃGaeǀhaos ǂGaes Elob disa ǃkhai-e ǂhomiba tsî Tentomma ge ǂnaumâiba. 2 ǁNās khaoǃgâb ge Davida ge mî: “Leviǁîgu ǀguigu ge ǃGaeǀhaos ǂGaesa nî tani, ǃKhūb ge ǁîga, ǁîsa gu nî tanise tsî ǁîb ǃoabas ǃnâ gu ǀamose nî hâse ǁhûiǂuibasen xui-ao.”
3 ǁNātib ge Davida hoaraga Israelǁîna Jerusalems ǃnâ ge ǂgaiǀhao, îb ǃGaeǀhaos ǂGaesa ǁîsab ge ǂhomiba ǃkhais tawa sī-ū. 4 ǁNās khaoǃgâb ge Aronǁîgu tsî Leviǁîgu tsîga ge ǂgaiǀhao. 5 Leviǁîn ǃhaos, Kohatǁîn disa xub ge Uriela ǀguikaidisi tsî ǀgamdisi khoegu, ǁîb ǃhaos digu, ǂgaeǂguib ragu ǀkha ge hā; 6 Merariǁîna xu Asajaba, ǀgamkaidisi tsî ǀgamdisigu, ǂgaeǂguib ragu ǀkha; 7 Gersonǁîna xu Joela, ǀguikaidisi tsî ǃnonadisigu, ǂgaeǂguib ragu ǀkha; 8 Elisafanǁîna xu Semajaba, ǀgamkaidisigu, ǂgaeǂguib ragu ǀkha; 9 Hebronǁîna xu Eliela, ǁkhaisadisigu, ǂgaeǂguib ragu ǀkha; 10 tsî Usielǁîna xu Aminadaba, ǀguikaidisi tsî disiǀgamǀagu, ǂgaeǂguib ragu ǀkha.
11 Davidi ge pristerkha, Sadoki tsî Abiatar hâkha tsî ǃnani Leviǁîgu, Urieli, Asajab, Joeli, Semajab, Elieli tsî Aminadab tsîga ǂgai, 12 tsî ǁîgu ǃoa ge mî: “Sago ge a Leviǁîn di ǂgaeǂgui-ao. Sago tsî sago di ǃgâsa Leviǁîgu tsîgo ǃanuǃanusen, î go ǃGaeǀhaos ǂGaes, ǃKhūb, Israeli di Elob disa, ǁîsa ta ge ǂhomiba ǃkhais ǁga ǃgû-ū. 13 ǂGuro ǃnāsa go ge ǁîsa hā tani tama i, ǃkhais ǃaromab ge ǃKhūb sada Eloba ge ǁkharada, ǁîba da ge dī da nî khami ǀgoreǀî tama i amaga.”
14 O gu ge pristergu tsî Leviǁîgu tsîga ge ǃanuǃanusen, ǃGaeǀhaos ǂGaes, ǃKhūb Israeli di Elob disa gu hā nî ūse. 15 Leviǁîgu ge ǁîsa ǁîgu di ǃhōgu ai, haigu ai ge tani, ǃKhūb ge Moseb ǃnâ-u mîmā hâ i khami.
16 Davidi ge Leviǁîn ǂgaeǂgui-aoga ge mîmā, î gu ǁkhoaxase nî ǁnae tsî harpdi tsî simbalde ǀkhō ǂamkhoega ǁgaumâi. 17-21 ǁNae-aoga xun ge sao ra khoega, simbalde gu nî ǀkhōse ge ǁhûi: Joeli ôab Hemanni, Berekiab ôab Asafi, Kusajab ôab Etanni Merariǁîn dib tsîga. ǁÎga gu nî maxōǀkhāse gu ge sao ra Leviǁîga, harpde gu nî ǀkhōse ge ǁhûihe: Saxariab, Jasieli, Semiramoti, Jehieli, Unib, Eliab, Maasejab tsî Benajab tsîga.
Harpde gu nî ǀkhōse gu ge sao ra Leviǁîga ge ǁhûihe: Matitiab, Elifeleti, Miknejab, Asasiab, tsî tempelǃûi-aokha Obed-Edommi tsî Jeieli tsîga.
22 ǁNaeǁkhāsabeb ge i xui-aob ge Kenanjaba Leviǁîǁnae-aogu di mûǂamaose ge mâihe. 23-24 Berekiab tsî Elkanab tsîkha ge ǀhûpe Obed-Edommi tsî Jehiab tsîkha ǀkha ǃGaeǀhaos ǂGaesa nî ǃûise ge ǁhûihe. Pristergu, Sebanjab, Josafati, Netaneli, Amasaib, Saxariab, Benajab tsî Elieseri tsîgu ge ǃGaeǀhaos ǂGaes aiǃâ gu xâiǁnâde garu nî xâise ge ǁhûihe.
ǃGaeǀhaos ǂGaesa Jerusalems ǃoa doe-ūs
(2 Samuel 6:12-22)25 O gu ge Davidi, Israeli di ǂgaeǂui-aogu tsî toroǂnubidi ǂgaeǂgui-aogu tsîga, ǃGaeǀhaos ǂGaesa gu kai dâb ǀkha sī nî ūse, Obed-Edommi di oms ǁga ge ǃgû. 26 ǁÎgu ge hû ǁgōgu tsî hû baigu tsîna ge ǁguiba, Elob, Leviǁîgu ǃGaeǀhaos ǂGaesa ra taniga nî huise. 27 Davidi ge tsaura lapib ǀkha ǂomsa saraba ge ana hâ i. ǁNae-aogu, ǁîgu mûǂamaob Kenanjab tsî ǃGaeǀhaos ǂGaesa gere tani Leviǁîgu tsîn ge ǁkhāti ǁnāti ǀgui ge ana hâ i. Davidi ge ǁkhāti efodi tsîna ge ana hâ i. 28 ǁNātin ge hoaraga Israelǁîna ǃGaeǀhaos ǂGaesa Jerusalems ǁga ge ǁnū, dâxa ǁnaeb, xâiǁnâdi, simbaldi tsî harpdi tsîn di ǀōb ǀkha.ǁNâgu, xâiǁnâs ase gere sîsenūhegu
29 ǃGaeǀhaos ǂGaes ǃās ǃnâ ra ǂgâxa-ūhe, hîas ge Sauli ôas Mikalsa mûǂuidaosa-u ǂui tsî gao-aob Davida, ǃgâiaǂgaob xa ǂnā tsî ra urise mû, tsî ǁîba ge ǃharaxū.
© Khoekhoegowab Elobmîs © Bible Society in Namibia, 2020.
