1 Kroniks 11 - Khoekhoegowab New Translation 2020 (KKG20)

Davidi ge ra Israeli tsî Judab tsîkha di gao-ao kai

1 Hoaraga Israelǁîn ge Davidi ǁga Hebrons ǃoa ǃgû tsî ǁîb ǃoa ge mî: “Sida hoada ge a sa ǂhunuma khoe. 2 Sats ge ǁkhāti, Sauli ge sida gao-ao i ǁaeb ais tsîna Israelǁîna torob ǃnâ gere ǂgaeǂgui. ǃKhūb sa Elob ge satsa, ǁîb ǁaes Israels ǃûi-ao kai tsîts ǁîna nî ǂgaeǂgui ǃkhaisa ge mîba.” 3 Nēti gu ge Israeli ǂgaeǂgui-aogu hoaga Davidi tawa Hebrons ǃnâ ge ǀhao. Ob ge Davida ǁîgu ǀkha ǃgaeǀhao-e ge dī. ǁÎgu ge ǁîba ge ǀnauǂgā tsîb ge ǁîba ge Israeli di gao-ao kai, ǃKhūb ge ǀnai, Samueli ǃnâ-u mîmâi hâ i khami.

4 Gao-aob Davidi tsî hoaraga Israelǁîn tsîn ge Jerusalems ǃoagu sī ge ǃkham. ǁNā ǁaeb ais ge ǁîsa Jebus ti ge ǂansa i, tsî Jebusǁîn, ǁnā ǃhūb di ǁanǂgāsabe ge in ge noxopa ǁnāpa ge ǁan hâ i. 5 Jebusǁîn ge Davida ge mîba, tātsēb ǃās ǃnâ ǂgâ tidesa, xaweb ge Davida ǁîn di omǂnamisa ǃās, Sionsa ge ū tsîs ge ǁîsa nēsi Davidi ǃĀs ti a ǂansa. 6 Davidi ge ge mî: “ǂGuro khoeb, Jebusǁî-e ga ǃgammi ge nî toroǂnubis di ǂgaeǂgui-ao kai.” Ob ge Serujas ôab, Joaba ǃkhamma ge ǃkhōdana tsîb ge ǁîba ge ǂgaeǂgui-ao kai. 7 Davidi ge omǂgāsa ǃkhais ǃnâ sī a ǁan, amagas ge ǁîsa Davidi ǃĀs ti ge ǀonǂgaihe 8 ǁÎb ge ǁhankhâisa ǃkhaib, ǃhommi di aiǂoasǀkhāb ai hâba xu tsoatsoa tsî ǃāsa ǁkhawa ge ǂnubikhâi, tsî Joab ge ǃgau ge ǃkhaiba ǃaruǀî ge ǂnubi. 9 Davidi ge ǃaruǀîǀgui ge ǀgai, ǃKhūb Hoaǀgaixab ge ǁîb ǀkha hâ i amaga.

Kaise ǂansa toroǃkhamaogu Davidi digu

(2 Samuel 23:8-39)

10 Nēb ge kaise ge ǂansa i toroǃkhamaogu Davidi digu di ǃgôakhâiba. Nau Israelǁîn hoan ǀkha ǀhao hâse gu ge ǁîga Davida ge hui, gao-ao kaib nîse, ǃKhūb ge Israela mîmâiba hâ i khami.

11 ǂGurob ge Jasobeammi, Hakmonǁîn dib, ǃnonagu di ǂgaeǂgui-ao ge iba. ǁÎb ge ǁhâigôab âb ǀkha ǃnonakaidisi khoegu ǃoagu ǃkham tsî ǁîgu hoaga ǀgui ǃkhammi ǃnâ ge ǃgam. 12 ǁÎba ra saose ge nē ǃnonagu ǃnâ hâ ib ge Ahohiǁîb, Dodob ôab Eleasara. 13 ǁÎb ge Davida Pas-Damims tawa Filisteǁîn ǃoagu gere ǃkhamhui. ǃHoroǃhanab ǃnâb ǁîba mâ, hîa gu ge Israelǁîga ǃkhoeni, 14 xawe gu ge ǁî ǃnonaga, ǃhanab ǁaegub ǃnâ mâ tsî Filisteǁîga ge ǃkhamǃoa. ǃKhūb ge ǁîga kai dansa ge mā.

15 ǀGuitsē gu ge ǃnonagu, ǂgaeǂgui ra ǃnonadisi toroǃkhamaogu diga Davidi ǁga, Adulamǁhoab ǀgūse hâ ǃgareǀuib ǁga ge ǃgû. Filisteǁîgu ge ǁnā ǁaeb ai Refaimǃgoaǃnāb ǃnâ hâǃkhaiba ge ǂnaumâi hâ i. 16 ǁNā ǁaeb ǃnâb ge Davida ǃhommi ai, ǁhoab ǃnâ ge hâ i tsî ǀnî Filisteǁîn ge Betlehemsa ge ūbasen hâ i. 17 Ob ge Davida kaise ǁkhore tsî ge mî: “Tari-e ǁgam-e, ā ta nîga Betlehems di dao-ams tawa hâ tsauba xu sī nî ūba te?” 18 O gu ge nē ǃnona, ǂansa toroǃkhamaoga, Filisteǁîgu di hâǃkhaib ǃnâ-u ǃkharu tsî ǁgam-e Betlehems di dao-ams tawa hâ tsauba xu sī xuri tsî Davida ge hā-ūba. Xaweb ge Davida ǁî-e ā ǂgao tama i, tsî ǁguibas ase ǃKhūba ǂnâǂuiba 19 tsî ge mî: “Elotse, as ǁnāsa tā ī, ǁî-e ta nî āsa. Nē khoegu, ûib âga ǃaorosasib ǃnâ mâi tsî go ǃgûgu di ǀaoba ās ǁkhās khamis ge nē ǃkhaisa i.” ǁNā-amagab ge ǁî-e ā ǂgao tama ge i. Nē ǃkhaisa gu ge ǁnā ǃnona, ǂansa toroǃkhamaoga ge dī.

20 Joab di ǃgâsab Abisaib ge ge kaise ǂansa ǃnonadisigu di ǂgaeǂgui-ao i. ǁÎb ge ǁhâigôab âb ǀkha ǃnonakaidisi khoegu ǃoagu ǃkham tsî ǁîga ge ǃgam; tsîb ge ǃnonadisigu ǃnâ kaise ge ǂansa i. 21 Nē ǃnonadisigu ǃnâb ge kaise ǂansa i, tsî a ǁîgu ǂgaeǂgui-ao kai, xaweb ge nau ǃnonagu a ǂansas kōse ge ǂansa tama hâ i.

22 Jojadab ôab Benajab, ǃās Kabseels dib ge ǂgui ǁkhoaǂgaoxa dīga gere dī, ǂansa toro-ao ge iba. ǁÎb ge ǀgam, ǀgaisa Moabǁîkha ge ǃgam. ǁKhātib ge tsamaroxa tsēs ai tsaub ǃnâ ǁgôa tsî xamma ge ǃgam. 23 ǁÎb ge ǁkhāti kaimâ hâ Egipteǁîb, ǀgam meterkha ǃkharu hâse ge gaxu ib, tsî kaise kai ǁhâigôaba ge ǃomǁae ūhâ iba ge ǃgam. Benajab ge ǁîba haib ǀkha ǃgûǃoa, ǁhâigôaba ǃommi âba xu tsubuǂui tsî ǁîb di ǁhâigôab ǂûb ǀkha ge ǃgam bi. 24 Nēnab ge Jojadab ôab, Benajaba ge dī tsîb ge nē ǃnonadisigu ǃnâ kaise ge ǂansa i. 25 ǁÎb ge nē ǃnonadisigu ǃnâ ge mâǂoa hâ i, xaweb ge nau ǃnonagu kōse ge ǂansa tama hâ i. Davidi ge ǁîba ra ǃûi khoegu di mûǂamaose ge mâi bi.

26-47 Nēgu ge nau ǁkhoaǂgaoxa toroǃkhamaoga:

Joab di ǃgâsab Asaeli;

Elhananni, Dodob Betlehems dib ôab;

Samoti, Harods dib; Helesi, Pelets dib;

Irab, Ikesi Tekoas dib ôab; Abieseri, Anatots dib;

Sibekaib, Husas dib; Ilaib, Ahohis dib;

Maharaib, Netofas dib; Baanab ôab, Heledi, Netofas dib;

Itaib, Ribaib ôab Gibeas Benjaminni dis dib; Benajab, Piratons dib;

Huraib, Gaas ǀgūse ǁgoe ǃgoaǃnāb dib; Abieli, Arbas dib;

Asmaveti, Bahurims dib; Eljaxbab, Salbons dib;

Hasemmi ôagu Gisons digu; Jonatanni, Sageb ôab, Harars dib;

Ahihammi, Sakari ôab, Harars dib; Elifali, Uri ôab;

Heferi, Mekeras dib; Ahijab, Pelons dib;

Hesrob, Karmels dib; Naraib, Esbaib ôab;

Joeli, Natanni ǃgâsab; Mibhari, Hagrib ôab;

Seleki, Amonǁîb; Naharaib, Serujas ôab Joab ǁâtanin tani-aob, Beerots dib;

Irab tsî Jitrib tsîkha; Gareb, Jatirs dib;

Uriab, Hetǁîb; Sabadi, Axlaib ôab;

Adinab, Sisab ôab, Rubenni ǃhaos di ǂgaeǂgui-aoba,

ǁîb di ǃnonadisi toroǃkhamaogu ǀkha;

Hananni, Maakab ôab; Josafati, Mitniǁîb;

Usiab, Asteras dib; Samab tsî Jeieli, Hotammi ôakha, Aroers dikha;

Jediaeli tsî Johab, Simrib ôakha, Tis dikha;

Elieli, Mahavis dib; Jeribaib tsî Josaviab, Elnammi ôakha; Itmab, Moabǁîb;

Elieli, Obedi tsî Jasieli, Sobas digu tsîga.