Gao-aob Sauli di ǁōb
(1 Samuel 31:1-13)1 Filisteǁîn ge Israelǁîn ǃoagu Gilboaǃhommi ai ge ǃkham. ǂGui Israelǁîgu ge ǁnāpa ge ǃgamhe. 2 Filisteǁîgu ge ǁîga ǃgôaǃgon tsî ǃnona ǀgôagu Sauli digu, Jonatanni, Abinadab tsî Malkisuab tsîga ge ǃgam. 3 ǃKhammi ge Sauli ǃoagu kaise ge ǀgai tsîb ge Saula ǁkhâu-aogu xa ǁkhâuhōhe tsî ǁkhōǁkhōsase ge tsuihe. 4 Ob ge Saula ǁâtanin âb tani-aoba ǃoa ge mî: “Sa gôaba ǂgaeǂui, îts ǃkhāǃan te, î gu tā nē ǀūbe Filisteǁîga hā ǃgam te tsî ǃhō te.” Xaweb ge ǁâtanin tani-aoba kaiseb gere ǃao xui-ao, ǁnāsa dī ǂgao tama ge i. Ob ge Saula ǁîb gôab ǂûba ū tsî ǁîb ai ge ǁnāǁnāsen. 5 ǁÂtanin tani-aob ge Sauli go ǁō ǃkhaisab ge mûo, ǁîb tsîna gôab âb ai ǁnāǁnāsen tsî Sauli ǀkha ǀguipa ge ǁō. 6 ǁNāti gu ge Sauli tsî ǁîb ǃnona ǀgôagu tsî ǁîb omaris hoas tsîna ge ǁō. 7 Jesreelǃgoaǃnāb ǃnâ ge ǁan hâ i Israelǁîn ge toroǃkhamaogu go ǁhâ tsî Sauli tsî ǀgôagu âb tsîn go ǁō ǃkhaisan ge ǁnâuo, ǃādi âna ǁnāxū tsî ge ǃhū. On ge Filisteǁîna hā tsî ǁîdi ǃnâ ge ǁan.
8 Filisteǁîgu ge sao ra tsēs ai gu ge ǁō hâgu di sorode xu gu xūna nî ǁkhâuǁnâse hāo, Sauli tsî ǁîb ôagu di sorode Gilboaǃhommi ai ge hōǁgoe. 9 O gu ge danas âba ǁhāǁnâ, ǁâtanin âba ǁîba xu ǂgaeǁnâ tsî sîsabega ǁîn ǀkha Filisteǁîn ǃhūb hoab ǃnâ gere sîma, nē ǂhôa-e gu ǁîn elogu di omgu ǃnâ tsî ǁîn khoen ǃnâ nî ǂanǂanse. 10 Tsî gu ge ǁâtanin âba ǁîn tempelgu di ǀguib ǃnâ ǁgui tsî danas âba, ǁîn elob Dagonni di tempeli ǃnâ ge ǂgāmâi. 11 Tsî Jabes, Gileadi dis ǁanǂgāsaben ge tare-en ge Filisteǁîna Sauli ǀkha dī ǃkhaisa ǁnâu, 12 o gu ge ǁkhoaǂgaoxa aogu hoaga ǃgû, tsî Sauli tsî ǁîb ôagu di sorodi tsîna sī ū tsî Jabes ǁga ge ǃgû-ū. ǁNāpan ge ǁîga aikehais ǃnaka ǁkhō tsî hû tsēde ǂûtama ge hâ.
13 Sauli ge ǃKhūb ǃoagub ge ǁnâuǀnamoǃnâ xui-ao ge ǁō. ǁÎb ge ǃKhūb di mîmāsa ǃûǂam tsî ǁō hân gagadi ai ge ǀape-ôa, 14 ǃKhūb tawab nî ǀape-ôas ǃās ǃnâ. ǁNā-amagab ge ǃKhūba ǁîba ǃgam tsî gaosisa Isaib ôab Davida ge mā.
© Khoekhoegowab Elobmîs © Bible Society in Namibia, 2020.
