Asariab ǀgores tsî ǃnona ǂkhamkhoegu di ǁnaetsanas 1

Asariab ǀgores

1 ǃNona ǂkham khoegu, Hananjab, Misaeli tsî Asariab hâgu ge ǀaes di ǁhabub ǃnâ ǃgûma tsî ǁnaetsanade Elob ǃgôasib ǃoa gere ǁnae. 2 Ob ge Asariaba ǁūse ǀaes ǁaegu mâ tsî ǃgarise ge ǀgore: 3 “ǃKhūtse, sige aboxagu xa gere ǀgoreǀîhe Elotse, sige ge koa tsî ra ǀgoreǀî tsi. As sa ǀonsa ǀamosib kōse ǃgôasiba māhe re. 4 Sats ge dīts gere xūn hoan ǃnâ a ǂhanu-ai tsî tare-i ǀgui-ets ga mîǁgui xawets ge hugaǀgui a ǂhanu. 5 Sats ge ǂhanuse ge dī, tsūǀkhābats ge sige aboxagu di ǃanu ǃās, Jerusalems ǂama a hā-ūo. Sidats ge sida ǁoren ǃaroma ǁkhara, ots ge ǂhanu tsî ǂhanu-aise ge dī. 6 Sida ge satsa xu ge dabasen tsî sa ǂhanuba ge ǁnâuǀnamoǃnâ tsî da ge mâ ǁore-i hoa-i ǃaroma a ǀhapixa. 7 Sa mîmāde da ga ǁnâuǀnam hâ, ots ge ga ǃgâiǃō kai da hâ. 8 Xawe da ge nēsi ǀgoraǃgâs tsî ǁkharab sida ǂamats ge hā-ūba anu hâ. 9 Sats ge khākhoen, Elob di ǂhanuba ǁnâuǀnam tamana sidan nî dan ǃkhaisa ge mā-am. Nē khoen ge satsa ra mâǃoa tsî da ge ǁîna ǃhui hâ. ǁKhātits ge hoaraga ǃhūbaib ǃnâ ǁîb a ǂkhaba gao-aob sida nî dan ǃkhaisa ge mā-am. 10 Sida satsa ra ǃoaba da hoada ge a ǃharaxūhesa tsî satsa ǂgaiǀîs xawesa ra tao.

11 “Sa ǀons di ǃgôasib ǃaroma tā ǀamose ǁnāxū da re, î tā ǀnaits sida ǀkha ūhâ ǃgaeǀhaosa khôa re. 12 Tā sa ǀkhomma sida xu ǂgae-oa. Sa mîmâis Abrahammi sa ǀnamsab, Isaki sa ǃoaba-aob tsî Jakob, ǃkhōǂuisa Israelǁaes di ǁgûb tsîgu ǀkhats ge dīsa ǃkhōǀgaipe re. 13 ǁÎgats ge ǀhomaib ai hâ ǀgamirodi tamas ka io hurib amǃgâb di ǃhū-i khami ǂgui ôananôaguba ge mîmâiba. 14 Xawe da ge nēsi ǃKhūtse, mâ ǁae-i hoa-i xa ǃgôab ǃnâ a ǀoro, tsî hâ da ka ǃkhai-i hoa-i ai, sida ǁoren xa ǃaroma ǃharaxūb ǃnâ ra ûi. 15 Gao-ao-i kas, kēbo-ao-i kas, ǂgaeǂgui-ao-i kas hoasa da ǃaruǀî ūhâ tama hâ. Tempel-i tamas ka io ǃkhai-i, ǁî-i ǃnâ da satsa khauǁguibadi kas, ǀnî hâ ǁguibadi kas, mādi kas, ǀanǀanǁguibadi kas hoasa nî dība i, sa ǀkhomma da hōse i xare-i ge ǃaruǀî a ǀkhai. 16 Xawe ge ge sa ǃoa ǃhobasen hâ ǂgaogu tsî ǃgamǃgamsen hâ gagas ǀkha hā ra ǀkhoma, îts khauǁguiba-i hîa baigu, ǁgōgu tsî ǀoadisidi ǃnâ hâ kau hâ ǁkhaon ǀkha ra dīhe-i khami sige ūǃoa. 17 Sige ǃhobasensa nētsē, satsa ge ra dība ǁguibas ase ǃkhōǃoa re, î ge hoaraga ǂgaob ǀkha satsa ǁnâuǀnam. Sats ge sa ai ra ǂgomǃgâ-e tātsē ǃan kai tide. 18-19 Nēsi ge ge hoaraga ǂgaob ǀkha ge satsa ǁnâuǀnam, ǀgoreǀî tsî ǀgores ǀkha sa ǃoa nî sīsa ra mîmâi. Tā taosib ǃnâ mâi ge re, î ǃnūǃnâxaba ge tsî ǀkhomxa ge re. 20 ǃKhūtse, sa buruxa dīgu ǀkha huiǂui ge re, îs sa ǀonsa ǃgôasiba māhe.

21 “Sige, sa ǃoaba-aoge ge ra ǀgore, îts sige ra tsûtsûn ai ǃharaxūb tsî taosiba hā-ū, ǁîn a kaise ǀgaisa xuige. Toxopa nē ǀgaiba ǁîna ūxū re, în ǀgaioǃnâ. 22 ǁÎna sats a ǃKhū, sats ǀguits a Elo tsîts kai ǀgaib ǀkha hoaraga ǃhūbaiba ra ǂgaeǂgui ǃkhaisa ǂan kai re.”

ǀHomǃgā-i ge ǀaeǁhabub ǃnâ ǃnona khoegu tawa ra sī

23 Gao-aob di ǃgāgu hîa ge nē ǃnona ǂkham khoega ǁganoms ǃnâ aoǂgāgu ge ǁkhôasases nî ǀaesa khauga, ǁnāpa oli-i, ter-i, naften-i tsî ǀaen tsîna gere ǀaroǃnâ. 24 ǀAes di ǁhabub ge ǀgamdisi metergu xa ǀgapise ǁganoms tawa gere ǂoaxa 25 tsî ǁnāpa ge ǀgūse mâ i Babiloniaǁîn tsîna ge ǂhupiǃan. 26 Xaweb ge ǃKhūb di ǀhomǃgāgu di ǀguiba nē ǃnona ǂkham khoegu ge hâǃnâ i ǀaes ǃnâ ǁgôaxa tsî ǀaes di ǁhabuga ǀgui ǀkhāb ǁga ge ǂhābē, 27 tsîb ge nē ǃkhaiba tsaura, karasa ǂoab xa ra ǃgomǃnâhe khami ge tsâ, tsîb ge nē ǀaeba ǁîga tsâǀkhā tamas ka io tsûtsûs xawesa dī tama ge i.

ǃNona ǂkham khoegu di koatsanas

28 Nē ǃnona ǂkham khoegu ge nē ǁganoms ǃnâ ǃKhūba ra koase ge ǁnaetsoatsoa:

29 “Koa tsi ge ra ǃKhūtse, sige aboxagu di Elotse.

30 As sa ǂkhaisa, ǃanu ǀonsa

ǃgôasib tsî ǃaoǃgâsib ǃnâ ǀamose ūhâhe re.

31 A di sa ǂkhaisib ǃaroma ǁnaetsanade

sa ǃanu ǂkhaisib di Tempeli ǃnâ ǀamose ǁnaehe re.

32 Sa ǀhomsi trons ai xerugu ǂamǃnâ ǂnû

tsî ge ǁŌhân Hâǃkhaib ǃoa ra kōǁgôa.

Ats koahe tsî ǃgôasiba māhe re, ǀamosib kōse.

33 Ats sa gaosib di trons aits ǂnôase koahe re,

î di ǁnaetsanade sa ǂkhaisib ǃoa ǀamose ǁnaehe re.

34 Ats ǀhommi di ǃāǂuisab ǃnâ koahe

tsî koatsanade sa ǂkhaisib ǃoa ǀamose ǁnaebahe re.

ǃNona ǂkham khoegu di ǁnaetsanas

35 “Hoaraga kurusabedo ǃKhūba koa re;