Embo emangwa nOndjona
1 Nami mba munine embo emangwa meke rokunene ra ingwi ngwa haamene kotjihavero tjouhona; oro ra tjangerwe moukoto nopendje, nu ra paterwe noviyambo hambombari. 2 Nu mba munine omuengeri omunamasa ngwa zuvarisa neraka enene a tja: “Owaṋi ngwa pwa pokuisa ko oviyambo mbi nokupaturura indi embo emangwa?” 3 Nungwari kape ningire omundu meyuru poo kombanda yehi poo kehi yehi ngwa sorere okupaturura indi embo emangwa nokutara mu ro. 4 Ami mba rira tjinene, tjinga ape ha munikire omundu ngwa pwire pokupaturura embo emangwa ndi nokutara mu ro. 5 Nungwari umwe wovanene arire tja tja ku ami: “O riri! Tara! Ongeyama ndja zire momuhoko wa Juda, Ondekurona onene ya David, ya toṋa, nOyo mai sora okuisa ko oviyambo hambombari imbi nokupaturura indi embo.”
6 Tjazumba arire tji mba munu Ondjona ndja kuramene komurungu wotjihavero tjouhona mokati nu ndja kondorokerwe i oviutwa ovinamuinyo vine novanene. Ondjona ndji iyai munika aayo ya ṱu. Oyo ya ri nozonya hambombari nomeho hambombari. Nu inga omeho hambombari owo Ozombepo hambombari za Ndjambi, nḓa hindwa mouye auhe. 7 Nu Ondjona ya kakambura embo emangwa meke rokunene ra ingwi ngwa haamene kotjihavero tjouhona. 8 NOyo ngunda amai kambura indi embo emangwa, ovinamuinyo mbi vine novanene mba omirongo vivari na vane arire tji ve riwisa pehi komurungu wayo. Nomunene auhe wa ri notjiharpe noviyaha vyongoldo mbye urisirwe novyomoro omuwa; novyo ozongumbiro zotjiwaṋa tja Ndjambi. 9 Novanene va imburire eimburiro epe ave tja:
“Ove wa pwa pokukambura indi embo emangwa
nokuisa ko oviyambo vyaro.
Orondu ove wa ṱire, nu nombinḓu yoye otji wa randera Ndjambi
ovandu momihoko avihe na momaraka aehe na moviwaṋa avihe na movandu avehe.
10 Ove we ve tjita ovahonapare vapamwe na ye mouhona we, novapristeri mbu mave karere Ndjambi.
Nowo mave honapara kombanda yehi.”
11 Nami mba tara, e munu ne zuu ovaengeri omayovi omengi nomangete omengi! Owo va kuramene ongondoroka notjihavero tjouhona novinamuinyo vine novanene, 12 amave imbura neraka enene amave tja: “Indji Ondjona ndja ṱire, ya pwa ouvara noutumbe, nounongo, nomasa nondengero, nondjozikiro, nondangero!” 13 Nami mba zuva oviutwa avihe meyuru na kombanda yehi na kehi yehi na mokuvare, ii, oviutwa ovinamuinyo avihe mouye, novyo vya imburire avi tja:
“Ingwi ngwa haama kotjihavero tjouhona nOndjona
wa pwa ondangero, nondengero nondjozikiro, nomasa
aruhe nga ko nga aruhe!”
14 Novinamuinyo mbi vine vya zira avi tja: “Amen!” Novanene arire tji ve riwisire pehi nave rikotamene ku Ndjambi.
© Herero Revision Bible © Bible Society in Namibia, 2021.
