Jeremia 32 - Herero Revision Bible (HRR)

Jeremia ma randa ehi romakunino

1 Muhona wa hungira ku ami mombura oitjamurongo youhona wa Sidkija, ombara ya Juda; wina ondja ri ombura oitjamurongo na hambondatu youhona wa Nebukadnesar, ombara ya Babilon. 2 Moruveze ndo otjimbumba tjovita tjombara ya Babilon tja rwisa Jerusalem, nami mba paterwa morupanda rwondjuwo youhona yombara ya Juda. 3 Ombara Sidkija we ndji patera mo motjovakamburwa, nu we ndji pere ondjo yokutja ami mba zuvarisa kutja Muhona wa tja nai: “Ami me tjiti kutja ombara ya Babilon i kambure otjihuro hi, 4 nombara Sidkija ke nokutaura, nungwari ma yandjewa momake wombara ya Babilon; eye ma hakaene na yo omurungu nomurungu nave hungire kumwe. 5 Sidkija ma twarewa kObabilon, neye ma kakara ngo nga ami tji mbe kemuvarura. Eye novandu ve nandi va rwisa Ovababilon, kamaave toṋa. Ami, ngu mbi ri Muhona, owami ngu mba hungire.”

6 Jeremia wa tja nai: “Muhona we ndji raera 7 kutja Hanamel, omuzandu wainyangu Salum, meya ku ami okuyekuningira omarandero wehi romakunino mOanatot, wehi romakunino mOanatot, mehi ra Benjamin, ami tjinga ambi ri omuzamumwe wopopezu na ye, nambi nousemba wokuranda ro omuini.” 8 Tjazumba otja Muhona pa hungirire, Hanamel weya ku ami mbo morupanda na ningire okuranda ehi romakunino ndi. Ami otji mba tjiwa kutja Muhona, tjiri, wa hungirire ku ami. 9 Ami mba randa ehi romakunino ndi ku Hanamel, nu mbe mu sanekera otjimariva; oro ra kosa ovimariva ovisilveri omurongo na hambombari. 10 Ami mba tjanga ena randje komazuvasaneno womarandasaneno ne ye pata, ape novandu mbu mave tarere, ne saneke imbi ovimariva kotjisanekero. 11 Mba toora inga omazuvasaneno ayeyevari womarandasaneno, ooinga nga patwa mu mwa ri omazuvasaneno nomihingo vyawo, na inga nga ri kamwaha, 12 ne ye yandja ku Baruk, omuzandu wa Nerija nondekurona ya Makseja. Ami mbe ye yandja ku Baruk ngunda ape na Hanamel novahongonone varwe, mba tjangere ko omana wawo komazuvasaneno womarandasaneno; wina pa ri ovarumendu, mba haamene mbo morupanda. 13 Nami mba tja nai ku Baruk, owo avehe ngunda averi po: 14 “Muhona Omunamasaaehe, Ndjambi wa Israel, we ku rakiza kutja u kambure omazuvasaneno womarandasaneno nga, ooinga nga patwa, na nga ri kamwaha, nu u ye twe motjikuve tjomunoko kutja ye ṱizirwe mo oruveze orure. 15 Muhona Omunamasaaehe, Ndjambi wa Israel, wa tja ozondjuwo nomahi womakunino novikunino vyomivite mavi randwa rukwao mehi ndi.”

Ongumbiro ya Jeremia

16 Ami tji mba za nokuyandja omazuvasaneno nga yevari womarandasaneno ku Baruk, arire tji mba kumbu nai: 17 “Muhona Ndjambi, ove wa ungurire eyuru nehi mouvara na momasa woye omanene; kape notjiṋa tji u ha sora okutjita. 18 Ove u raisa otjari komayovi, nungwari wina u verera ovanatje omauvi wooihe. Oove Ndjambi omunene nomunauvara; oove Muhona Omunamasaaehe. 19 Ove u ripura omeripuriro wounongo nu u ungura ovyomasa; u muna oviṋa avihe ovandu mbi ve tjita, nu u ve sutisa otja kozondjito zawo. 20 Rukuru ove wa tjitire ovihimise novikumise mOengipte, nove wa kara pokuvitjita nga ndinondi mOisrael na mokati koviwaṋa avihe vyarwe, nga nambano tji wa tjiukwa akuhe. 21 Ove wa pitisa otjiwaṋa tjoye mOengipte amo tjiti oviraisiro novihimise mbya tirisa ovanavita na eṱe, nouvara nomasa woye. 22 Ove we tji pa ehi etumbe nehapise ndi otja tji wa kwizikirire ooihe mukururume. 23 Nungwari owo tji ve ya mehi ndi nave ri kambura okurira ouini wawo kave karere nonḓuviro komatwako woye nu kave hupire otja komahongero woye; owo kave tjitire otjiṋa tji we ve rakizire okutjita. Komuhingo mbwi otji we ve etera omaumba aehe nga.

24 “Ovababilon va tunga ozondunduvahi okukovera otjihuro kutja ve tji kambure, nowo mave tji rwisa. Ovita nondjara nomutjise omuzeu mavi wisire otjihuro momake wawo. Ove omuini mo munu kutja avihe, mbi we ndji raera, vya yenenisiwa. 25 Nungwari ove, Muhona Ndjambi, oove ngu we ndji rakiza kutja mbi rande ehi romakunino ndi, ngunda ape novandu mbu mave tarere, nandarire kutja otjihuro hi matji huurwa i Ovababilon.”

26 Muhona wa tja nai ku ami: 27 “Owami Muhona Ndjambi woviutwa avihe. Pe notjiṋa ami tji mbi ha sora okutjita are? 28 Ami me yandja otjihuro hi mouvara wa Nebukadnesar, ombara ya Babilon, notjimbumba tje tjovita; owo mave tji rwisa, ave tji huura 29 nave tji nyosa. Owo mave tji nyosa puna ozondjuwo nḓa otjiwaṋa mu tje ndji pindikisira nokutwimisira Baal ovyomoro omuwa komitutu, na mokutiririra oomukuru varwe ozombunguhiro zomavinu. 30 Okuza kombutiro yomakuruhungi wawo, otjiwaṋa tja Israel notja Juda vye ndji yamburura, novyo vye ndji pindikisa nozondjito zavyo ozombi. 31 Ovandu votjihuro hi ve ndji pindikisa nu ve ndji pa omazenge okuza keyuva ndi tja tungwa nga ku ndinondi. Ami otji mbe rimana okutjinyona 32 mena romaurunde aehe nga tjitwa i ovandu va Juda nova Jerusalem puna ozombara novanane vawo, novapristeri novaprofete vawo mokundjiyamburura. 33 Owo ve ndji pa ongotwe; nu nandarire kutja mba ramanga okuvehonga kave vangere okupuratena nokuvyurwa. 34 Nandarire nao ave twa oviserekarera vyovisenginina vyawo oviyaukise mondjuwo ndja tungirwa omerikotameneno ku ami, nowo ve i ṱunda. 35 Owo va tungira Baal ovipunguhiro momukutu wa Ben-Hinom okupunguhira ko ovanatje vawo ovazandu novakazona komukuru wotjisenginina Molek. Ami hi na pu mbe ve rakiza okutjita nai, nu ihi katja ri momeripuriro wandje kutja ve sokutjita otjiṋa otjiyaukise otja ihi; notji va turisa otjiwaṋa tja Juda ondjo.”

Omakwizikiro womaundjiro

36 Muhona, Ndjambi wa Israel, wa tja nai ku ami: “Jeremia, ovandu mave tja ovita nondjara nomutjise omuzeu mavi wisire otjihuro hi momake wombara ya Babilon. Nambano puratena koviṋa vyarwe mbi me hungire. 37 Ami me kawonga otjiwaṋa komahi aehe ku mbe tji rimbira momazenge na momapindi wandje, nu me tji kotora kotjirongo hi ne tji esa kutja tji ture muno nokuhinatjipo. 38 Nu otjo matji rire otjiwaṋa tjandje, nami me rire Ndjambi watjo. 39 Ami meve pe omuhingo umwe uriri mongarero yawo nu owo mbwi: Okundjitira aruhe, kombwiro yawo noyozondekurona zawo. 40 Ami me tjiti omerikutiropamwe na wo omakarerere. Himee isa okuvetjitira ouwa, me twa mo ondira ku ami momitima vyawo avihe nokutja ave ha poka ku ami. 41 Ami me kara nonyuṋe mokuvetjitira ouwa, nu meve turisa ongarerere mehi ndi; me tjiti nao nomutima nomuinyo wandje auhe.

42 “Otja punga amba eta otjiwonga otjinene hi kotjiwaṋa hi, opunga ame ve pe ouwa auhe, mbu mbe ve kwizikira. 43 Ovandu mave tja ehi ndi ri ri otja okuti onguza mu mu hi nokuhupa omundu poo otjipuka, noro mari yandjewa mouvara wOvababilon. Nungwari omahi womakunino maye randwa rukwao mehi ndi. 44 Ovandu mave ye randa, nomazuvasaneno womarandasaneno maye tjangwa omana naye patwa, ngunda ape novandu mbu mave tarere. Ihi matji tjitirwa mehi ra Benjamin, movirongo mbya kondoroka Jerusalem, movihuro vya Juda, na movihuro, mbi ri momahi wozondunda na movivanda na mehi rokomukuma wokeyuva kokumuho kwa Juda. Me yarura ko otjiwaṋa mehi ratjo, ami, ngu mbi ri Muhona, owami ngu mba hungire.”