Markus 12 - Herero Revision Bible (HRR)

Omasanekero wovayazeme votjikunino tjomivite

1 Jesus wa hungira ku wo momasanekero na tja: “Omundu umwe wa kunine otjikunino tjomivite, a twako orumbo, a ungura mo otjikameno tjomivite, nu a tungu mo oruhungu romatjeverero. Okuzambo e tji yazemisa kovakune narire tja i mouyenda. 2 Nu oruveze rwomanikorero womandjembere tji rwa yenene, eye otja hinda omukarere we kovayazeme okukaeta ovihape imbi ovye. 3 Ovayazeme va kambura ingwi omukarere, nave mu tono, tjazumba ave mu hindi okuyaruka nokuhinotjiṋa. 4 Omuini wotjikunino wa hinda omukarere warwe, ovayazeme ve mu tona ozombara motjiuru nave mu yamburura navi. 5 Norukwao eye wa hinda omukarere warwe, novayazeme ve mu zepa; nu va tjita nao kovakarere varwe wina, tjiva ave tono, nu tjiva ave zepa. 6 Nambano ngwa serwe po wa ri ingwi omuzandu we umwe omusuverwa. Nu korusenina arire tja hindi omuzandu we ngwi kovayazeme ama tja: ‘Tjiri, omuzandu wandje ngwi mave mu tenge.’ 7 Nungwari ovayazeme mbo verihungirira oveni ave tja: ‘Ingwi onguri omuzandu womuini wotjikunino. Indjeye tu mu zepe, eṱa ri rire oretu!’ 8 Nowo ve mu kambura, ave mu zepa, nu ave imbirahi orutu rwe pendje yotjikunino.”

9 Jesus wa purire a tja: “Ingwi omuini wotjikunino tjomandjembere ma tjiti vi? Eye meya, na zepa ovayazeme mbo, tjazumba a yandja otjikunino ho ku varwe. 10 Eṋe, tjiri, kamuya resa omatjangwa nga are?

‘Ewe ndi nda nakaurwa i ovatunge,

onda karira enanḓengu tjinene pomawe aehe.

11 Nu ngwa tjita nao oMuhona,

notjo otjihimise momeho wetu!’ ”

12 Novanane vOvajuda va kondja okukambura Jesus, orondu owo tjinga aave tjiwa kutja omasanekero nga eye we ye hungirira wo. Nungwari owo va tira ihi otjimbumba tjovandu, notji ve mu esa ave i.

Epuriro ohunga notjisuta tjouhona

(Mt 22:15-22Lk 20:20-26)

13 Ovafarisei tjiva novandu tjiva votjira tja Herodes va hindwa ku Jesus okukemupura omapuriro kutja ve mu kamburire po mu imbi mbi ma hungire. 14 Nowo ve ya nu ave tja nai ku ye: “Muhonge, matu tjiwa kutja ove u hungira ouatjiri, nu ko rikende nouripura wovandu, orondu ove ko tara ovandu momirungu, nungwari u honga ondjira ya Ndjambi mouatjiri. Tu raera kutja okusuta otjimariva tjouhona kombara ya Roma pa yandjerwa poo kape yandjererwe? Ngatu sute poo atu sutu?”

15 Nungwari Jesus wa tjiwa ovineya vyawo, notja zira a tja: “Mamu ndji rorere tjike? Eteye ihi otjimariva otjisilveri mbi tji mune.”

16 Nowo ve mu etera tjimwe, neye wa pura a tja: “Omurungu wauṋe, nu indi ena orauṋe ndi ri ku tjo?”

Owo ave ziri ave tja: “Owombara.”

17 Jesus otja tja nai ku wo: “Yandjeye ovyombara kombara, nu imbi ovya Ndjambi yandjeye ku Ndjambi.” Nowo va himisiwa tjinene i Jesus.

Epuriro ohunga nombendukiro movakoke

(Mt 22:23-33Lk 20:27-40)

18 Ovasaduke tjiva mbu yave tja kape nombendukiro yovaṱi ve ere ku Jesus nave tja: 19 “Muhonge, Moses we tu tjangera etwako, ndi mari tja: ‘Omurumendu tja koka, e nomukazendu ngu hi novanatje, omuangu poo erumbi re nga rye omuhepundu kutja owo ve kwate ovanatje mbu mave varwa otja orukwato rwomurumendu ngwi omuṱi.’ 20 Notji pa ri ovarumendu oovangu nomarumbi hambombari; imba ovanene va koka nokuhina ovanatje. 21 Tjazumba ingwi outjavari wa kupa omuhepundu ngwi, neye wina wa koka nokuhina ovanatje. Notjiṋa tjingetjo wina tja tjitwa ku ingwi outjatatu, 22 na ku imba ovakwao vane mba sewa po; avehe pouhambombari wawo ve mu kupa, nu kave karere novanatje. Korusenina ingwi omukazendu omuini wina arire tja koka. 23 Nambano ovaṱi tji va penduka movakoke, ingwi omukazendu ma rire owauṋe mokati kawo, avehe pouhambombari wawo tjinga ave mu kupire?”

24 Jesus we ve zirire a tja: “Eṋe muri posyo, mena rokutja kamu nokutjiwa omatjangwa nomasa wa Ndjambi wina? 25 Orondu ovaṱi tji va penduka movakoke, kamaave kupu, nu kamaave kupwa, nungwari mave kara otja ovaengeri meyuru. 26 Nambano ingwi okutja ovakoke vependuka; kamu na pu mwa resere mEmbo ra Moses morupa ohunga notjihwa tjaa tji yaka are? Mwa tjangwa kutja Ndjambi wa tja ku Moses: ‘Owami Ndjambi wa Abraham na Ndjambi wa Isak na Ndjambi wa Jakob.’ 27 Eye ka Ndjambi wovakoke, nungwari oNdjambi wovanamuinyo. Eṋe mu ri posyo tjinene!”

Etwako enanḓengu pu aehe

(Mt 22:34-40Lk 10:25-28)

28 Pa ri umwe wozonongo zomambo ngwaa puratene owo tji mave pimbasana omambo. Neye tja muna kutja Jesus wa yandja eziriro esemba kOvasaduke, arire tje ya ku ye ne mu pura a tja: “Etwako enanḓengu pomatwako aehe oriṋe?”

29 Jesus we mu zira a tja: “Etwako enanḓengu pomatwako aehe, oro ndi; Zuva, Israel! Muhona Ndjambi wetu eye onguri Ndjambi erike. 30 Nu suvera Muhona Ndjambi woye nomutima woye auhe, nomuinyo woye auhe, nozondunge zoye azehe, nomasa woye aehe! 31 Etwako oritjavari oro ndi: ‘Suvera omukweṋu otja tji we risuvera omuini.’ Kape netwako enanḓengu pu inga yevari nga.”

32 Onongo yomambo arire tji ya tja ku Jesus: “Wa ziri osemba, Muhonge! Ouatjiri otja tji wa hungire kutja Muhona erike porwe eye onguri Ndjambi, kape na warwe posi na ye, 33 nokutja omundu u sokusuvera Ndjambi nomutima we auhe, nomuinyo we auhe, nozondunge ze azehe, nomasa we aehe, nokusuvera omukwao otja tje risuvera omuini. Okuṱakamisa omatwako yevari nga otjo otjiṋa otjinene okukapita okupunguhira Ndjambi ozombunguhiro ozoningiririsiwa nozovinamuinyo.”

34 Nu Jesus tja muna kutja omuhonge wOmatwako wa ziri nozondunge, wa tja nai ku yo: “Ove ko ri kokure nouhona wa Ndjambi.”

Kombunda yanao kapa ri omundu ngwa rora okupura Jesus omapuriro rukwao.

Omutwirisiwa, Omuna wa David?

(Mt 22:41-46Lk 20:41-44)

35 Jesus ngunda ama hongo mondjuwo ya Muhona otja pura epuriro ndi: “Okutjavi ozonongo zomambo tji ve tja Omutwirisiwa eye Omuna wa David? 36 Ingwi David omuini a hungira nai mOmbepo Ondjapuke:

‘Muhona wa tja nai kOmuhona wandje:

Kara pehi kokunene kwandje

nga ami tji mba twa ovanavita na ove kehi yozombaze zoye.’

37 “David omuini tji me mu tja ‘Muhona,’ ma rire vi Omuna we?” Novandu ovengi va puratena ku ye nonyuṋe.

Jesus ma rongo ovandu ohunga nOzonongo zomambo

(Mt 23:1-36Lk 20:45-47)

38 Nu momahongero we Jesus wa tja kovandu: “Ritjevereye kozonongo zomambo! Ozo za suvera okuryanga nozombanda ozonde nokuminikwa nondengero potuveze twomarandisiro, 39 nu ze haama kovihavero vyovatengwandu mozosinagoge, nu ze toorora otuveze twondengero pomikandi. 40 Ozo ze punda ozondjuwo zovahepundu amaze ve wovisa nozongumbiro ozonde. Omberero yazo mai rire onḓeu tjinene!”

Ombunguhiro yomuhepundu

(Lk 21:1-4)

41 Jesus wa haamene popezu notjiwongero tjovimariva, tjandje ma tarere ovandu tji mave umbu ovimariva mu tjo. Ovatumbe ovengi va umba ovimariva ovingi. 42 Otji pe ya omuhepundu umwe omusyona, nu wa umba oumariva uvari wongoporo mbu nonḓengu yepeni rimwe. 43 Jesus otja isana ovahongewa ve na tja: “Tjiri, me mu raere, omuhepundu omusyona ngwi wa umbu ovingi motjiwongero tjovimariva povandu avehe mba umbu. 44 Orondu ovandu avehe va umbu okuza mu imbi mbi va hupisa moutumbe wawo, nungwari ingwi omuhepundu mousyona, wa umbu avihe mbya ri na vyo, okutja ohupiro ye aihe.”