Elkana neṱunḓu re mOsilo
1 Pa ri omurumendu Omuefraim wena Elkana, ngwa turire motjirongo tja Rama mehi rozondundu ra Efraim. Eye wa ri omuzandu wa Jeroham, ihe mukururume wa ri Elihu, ngwa zire momuhoko wa Nahat, omuzandu wa Suf, womuhoko wa Efraim. 2 Elkana wa ri novakazendu vevari, ooHana na Penina. Penina wa ri novanatje, nungwari Hana ka ri novanatje. 3 Ombura aihe Elkana aa zu motjirongo tje okukerikotamena nokukapunguhira Muhona Omunamasaaehe, ozombunguhiro mOsilo. Nu motjirongo hi mwa ri ovazandu vevari va Eli, ooHofni na Pinhas mba ri ovapristeri va Muhona. 4 Aruhe Elkana tjaa punguha ombunguhiro ye, aa yandja onyama tjiva yombunguhiro komukazendu we Penina novanatje ve avehe. 5 Nandarire kutja eye wa suverere Hana tjinene, ee mu pe onyama imwe uriri, Muhona tjinga e mu patere orukwato. 6 Nungwari ingwi omunasupa na ye Penina ee mu toko nokumunyengura mena rokutja Muhona wa pata Hana orukwato. 7 Nu iyape tjitwa nai ombura aihe; aruhe tjaave i kondjuwo ya Muhona Penina aa toko Hana nga tja riri; nu Hana kaa vanga okurya otjiṋa. 8 Nomurumendu we Elkana ee mu pura a tja: “Hana mo ririre tjike? Okutjavi tji u hi nakurya? Wa yumanene tjike? Ami kove hi nanḓengu povanatje ovazandu omurongo are?”
Hana na Eli
9 Eyuva rimwe tji va za nokurya nokunwa mOsilo, Hana wa sekama na kakurama komurungu wa Muhona, omupristeri Eli ngunda a haama kotjihavero tje pomuvero wondjuwo ondjapuke ya Muhona. 10 Hana wa hihamwa momutima na riri tjinene ngunda ama kumbu ku Muhona. 11 Neye wa tjita omakwizikiro nga na tja: “Muhona Omunamasaaehe, tara ku ami, nondjenda, omukarere woye! Tara kouzeu wandje, nu ndji zemburuka! O ndji zembi! Tji we ndji pe omuatje omuzandu, ami me mu yapurire ove oure womuinyo we auhe, neye kamaa horwa ozondjise.”
12 Hana wa kara pokukumba nai ku Muhona orure tjinene, nu Eli aa tarere omiṋa vye. 13 Hana aa kumbu kumwi momutima we, omiṋa vye aavi nyinganyinga, nungwari ombosiro yeraka re kaa i zuvaka. Eli wa tjangovasi Hana wa purukisiwa i omavinu, 14 notja tja nai ku ye: “Mopurukisiwa i omavinu nga ruṋe? Humburuka nomavinu!”
15 Nungwari Hana wa zira a tja: “Kako, muhona, ami hi nwine omavinu! Ami owami omukazendu omunandjenda, nu ee kumbu okurihepura omauzeu wandje komurungu wa Muhona. 16 O vara omukarere woye otja otjiporoporo. Ami ee kumbu orure nai mena rongendo noruhoze.”
17 Eli wa zira nai ku ye: “Twende mohange! Ndjambi wa Israel nge ku zuvire ongumbiro, ndji wa kumbu ku ye.”
18 Nu Hana wa zira a tja: “Arikana, kara notjari nomukarere woye!” Narire tja i. Tjazumba eye wa uta okurya ovikurya, na ha yumana rukwao.
Ongwatero ya Samuel nomayapuriro we
19 Mependukirwa Elkana neṱunḓu re va penduka omuhuka omunene nave rikotamene ku Muhona. Tjazumba arire tji va yaruka konganda kOrama. Elkana wa rara pomukazendu we Hana nu Muhona wa zuvira ongumbiro ya Hana. 20 Hana wa rira otjingundi, noruveze tji rwa yenena, wa panduka omuzandu ne mu ruku Samuel, okutja “Ami mbe mu ningira ku Muhona.”
21 Tjazumba Elkana neṱunḓu re arihe va ya kOsilo rukwao okukapunguhira Muhona ombunguhiro yombura aihe na indji ombunguhiro yomakwizikiro. 22 Nungwari Hana ka ire pamwe. Neye wa tja nai komurumendu we: “Omuzandu tja zu nokuisiwa ko komaihi, otji me mu twara kondjuwo ondjapuke ya Muhona ku ma kakara oure womuinyo we auhe.”
23 Nomurumendu we Elkana wa zira nai ku ye: “Tjita ngamwa atjihe tji tji ri otjiwa kove; kara monganda nga omuatje tja isiwa ko komaihi; Muhona nga tjite kutja u yenenise omakwizikiro woye.” Hana wa kara na nyamisisa okazandu ke, nga tji ka isiwa ko komaihi.
24 Nokazandu tji ka za nokuisiwa ko komaihi, Hana we ke twara kOsilo, na twaerere ondwezu yongombe yozombura ndatu, noruhere orunḓunḓura ozokirograma omurongo, nondjaṱu yomukova ndje ura nomavinu. Hana otja twara omuatje we ngunda e ri okaṱiṱi kondjuwo ya Muhona kOsilo. 25 Nowo tji va za nokuzepa ondwezu ndji, otji va twara okanatje ku Eli. 26 Nu Hana wa katja nai ku ye: “Arikana, muhona, tjiri, ami owami omukazendu ngwi, moruveze ndo, ngu mba kuramene pove mba okukumba ku Muhona. 27 Mba kumbire ku Muhona okuningira okazandu nga; neye we ndji zuvira. 28 Ami otji me mu yapurire Muhona. Nu ngunda e nomuinyo, ma rire owa Muhona.”
Nowo otji ve rikotamena ku Muhona poṋa mbo.
© Herero Revision Bible © Bible Society in Namibia, 2021.
