Esekiel 41 - Herero Revision Bible (HRR)

1 Tjazumba omurumendu ngwi we ndji hitisa metuwo romokati, ndi ri Otjouyapuke. Eye wa saneka oruhito rwetuwo ndi; rwa ri noukoto wozometa ndatu, 2 nouparanga wozometa ndano, nomakuma kominda aviyevari ya ri noutindi wozometa mbari nohinga. Wina wa saneka etuwo romokati orini; ra ri noure wozometa omirongo vivari, nouparanga wozometa omurongo.

3 Tjazumba otja hita metuwo indi romokwarakwara. Eye wa saneka oruhito rwetuwo ndi; rwa ri noukoto wometa imwe, nouparanga wozometa ndatu, nomakuma kominda aviyevari ya ri noutindi wozometa ndatu nohinga. 4 Wina wa saneka etuwo orini, noro ra ri nozometa omurongo koure na kouparanga. Nu arire tja tja nai ku ami: “Etuwo ndi ondi ri Otjouyapukeyapuke.”

Omatuwo nga tungwa keṋe yondjuwo ya Muhona

5 Omurumendu ngwi wa saneka ekuma ndi romoukoto rondjuwo ya Muhona; noro ra ri noutindi wozometa ndatu. Keṋe yekuma ndi, okukondoroka ondjuwo ya Muhona aihe, kwa ri nomatuwo omengi ouṱiṱi, nga ri nouparanga wozometa mbari. 6 Omatuwo nga ya tungirwe motuteto tutatu okutendekasana, nu moruteto aruhe peke mwa ri nomatuwo omirongo vitatu. Ekuma ndi ropendje rondjuwo ya Muhona, poruteto aruhe peke, ra ri epepu pekuma ndi roruteto rwokehi yaindwo, kokutja inga omatuwo ye haame kekuma nokuhinokuṱiziwa i ozongunḓe. 7 Omakuma wondjuwo ya Muhona, tji maye munikire pendje, ye munika aayo ye noutindi umwe okuza kehi nga kombanda. Keṋe yekuma ropendje rondjuwo ya Muhona, okutja komukuma wopendje womatuwo, kwa tungirwe ozondondo mbari ozombaranga, kokutja omundu a sore okuronda okuza koruteto indwi rwokehikehi nokuyanda ku indwi rwopokati nga ku indwi rwokombandambanda. 8-11 Ekuma ropendje romatuwo nga ra ri noutindi wozometa mbari nohinga; pa ri omuvero umwe wokuhita momatuwo nga nga ri komukuma wokeyuva kokunene kwondjuwo ya Muhona, nomukwao wokuhita mu inga nga ri komukuma wokeyuva kokumuho. Ami mba muna kutja pa ri orupare ndwa kondoroka ondjuwo ya Muhona aihe, nu ndwa ri nouparanga wozometa mbari nohinga; orwo rwa ri noutonga wozometa ndatu okuza pehi, nu rwa ṱekire pamwe nomazikiro womatuwo nge ri keṋe yomakuma wondjuwo ya Muhona. Pokati korupare nomatuwo muyamu kara ovapristeri, tji ve ri moviungura, pa ri oruveze oruhara ndwa ri noure wozometa omurongo okutapakaṋa, meṋe yomikuma vyondjuwo ya Muhona.

Ondjuwo komukuma wokongurova

12 Kotjikoro tjokomaandero tjoruveze orutandauke, komukuma wokongurova kwondjuwo ya Muhona, kwa ri nondjuwo youre wozometa omirongo vine nandano, nouparanga wozometa omirongo vitatu nandano; omakuma wayo ya ri noutindi wozometa mbari nohinga okukondoroka.

Otjivaro atjihe peke tjomasanekero wondjuwo ya Muhona

13 Omurumendu wa saneka ondjuwo ya Muhona pendje, noyo ya ri noure wozometa omirongo vitano. Oure wokuza kongotwe yondjuwo ya Muhona okutapakaṋa oruveze indwi orutandauke nga kotjikoro hi tjokomaandero tjondjuwo komukuma wokongurova wina wa ri ozometa omirongo vitano. 14 Omukato wokomurungu wondjuwo ya Muhona puna oruveze orutandauke wina wa ri ozometa omirongo vitano kominda avihe. 15 Eye wa saneka oure waindji ondjuwo yokongurova puna otuhito twayo kominda aviyevari, nowo wina wa ri ozometa omirongo vitano.

Ondjuwo ya Muhona moukoto

Etuwo romahitiro rondjuwo ya Muhona, nOtjouyapuke, nOtjouyapukeyapuke, 16 aehe nga kwa pambwa oututapo womiti okuza korupare nga kotuiho. Otuiho twi aa tu sora okupatwa. 17 Omakuma womoukoto wondjuwo ya Muhona, okuza pehi nga kombanda yomivero, ya kororerwe noviserekarera 18 vyomavare novyovakerubi. Omavare aaye pingasana novakerubi amavi kongorerasana okukondoroka etuwo arihe. Omukerubi auhe wa ri nomirungu vivari; 19 omurungu womundu mbuyau tara kevare komunda umwe, nomurungu wongeyama mbuyau tara kevare tjingero komunda imbwi omukwao. Pa ri nai okukondoroka ekuma arihe, 20 okuza porupare nga kombanda yomivero. 21 Ozongambezero zomuvero wOtjouyapuke za ri nomikuma vine mbi ṱeki pamwe.

Otjipunguhiro tjomuti

Pomahitiro wOtjouyapukeyapuke pa ri otjiṋa tjaa tji munika otja 22 otjipunguhiro tjomuti. Otjo tja ri noutonga wometa imwe nohinga, nometa imwe koure na kouparanga. Ozonya zatjo zokovikoro, notjikurameno tjatjo, nomikuma vyatjo vyoposyo, avihe vya ungurirwe pomuti. Omurumendu wa tja nai ku ami: “Ihi otji tji ri otjiriro tji tji kurama komurungu wa Muhona.”

Omivero

23 Pa ri omuvero pomaandero woruhito nduyaru hiti mOtjouyapuke, nomukwao warwe wina pomaandero woruhito nduyaru hiti mOtjouyapukeyapuke. 24 Omuvero auhe peke wa ri novivangwa vivari mbyaa vi paturukire pokati. 25 Kwa ri omavare novakerubi mba kororerwe movivangwa vyomuvero wOtjouyapuke tjimuna imbi mbya kororerwe momakuma. Nu kwa ri omututu womuti pendje kombanda yomuvero wetuwo romahitiro. 26 Momakuma wetuwo ndi mwa ri otuiho, nomakuma ya harekerwe noviserekarera vyomavare kominda aviyevari.