Ozombinika za Paulus
1 Ami me mu raere omuṱena kwetu Febe nguri omuvatere wombongo ya Kenkrea. 2 Mu yakureye mena ra Muhona otja ovakambure punga ave sokutjita, nu mu mu vatere motjiungura ngamwa, indu tji me mu hepa. Orondu eye wa vatera ovandu ovengi na ami wina.
3 Minikeye Priskila na Akuila, ovaungure va puna ami motjiungura tja Kristus Jesus. 4 Owo va yandjera ami ominyo vyawo. Nu kawami porwandje ngu me sokutja okuhepa ku wo, nungwari wina ozombongo azehe zaimba mbe he ri Ovajuda. 5 Wina minikeye ombongo ndji woronganena moyawo.
Minikeye epanga randje esuverwa Epenetus. Eye onguri omundu omutenga morukondwa rwa Asie ngwa kambura mu Jesus Kristus. 6 Minikeye Maria ngwa ungurira eṋe tjinene nomasa. 7 Wina minikeye Andronikus na Junias, Ovajuda ovakwetu, mba ri puna ami motjovakamburwa; owo ve tjiukwa tjinene i ovaapostele, nu omba tenga po pu ami okurira ovakongorere va Kristus.
8 Minikeye Ampliatus, epanga randje esuverwa mu Muhona. 9 Wina minikeye Urbanus, omuungure wapamwe na ami mu Kristus, na Stakis, epanga randje esuverwa. 10 Minikeye Apeles ngwa kara nouṱakame tjinene ku Kristus. Minikeye imba ovonganda ya Aristobulus. 11 Minikeye Herodion, Omujuda omukwetu, na imba ovonganda ya Narsisus, mba rira ovakambure.
12 Wina minikeye Trifena na Trifosa, ozoserekaze nḓe ungurira Muhona tjinene, nepanga randje esuverwa Persis, ingwi oserekaze ngwa ungurira Muhona tjinene nai. 13 Me minike Rufus, omuungure omuwa tjinene motjiungura tja Muhona, na ina nguye ndji ṱunu nawa otja omuatje we. 14 Wina me minike Asinkritus na Flegon na Hermes na Patrobas na Hermas novakambure ovakwao avehe mbe ri puna wo. 15 Me minike Filologus na Julia na Nereus nomuṱena kwe na Olimpas novakambure ovakwao avehe mbe ri puna wo.
16 Minikasaneye noruhupito rwoukriste. Ozombongo azehe za Kristus maze mu minike.
Omaronga omasenina
17 Ami me mu rongo tjinene, vakwetu, kutja mu ritjevere ku imba mbe tjita ohaṋi nu mbe pukisa ovakambure mongamburiro nu mbe pirukira omahongero ngu mwa pewa. Humburukeye kokure na wo! 18 Orondu ovandu otja imba kave karere Kristus oMuhona wetu, nungwari ve ripura nomuhoro wovikurya vyawo porwe. Owo ve wovisa imba ovahatjiza amave ve raere omambo omawa nokuvepopa. 19 Ovandu avehe va zuva kutja eṋe mwa ṱakama mOmbuze Ombwa. Nami mbi nenyando tjinene na eṋe; nu me vanga tjinene kutja mu kare nondjiviro moviṋa oviwa, nungwari amu ha kara nondjiviro mu imbi ovivi. 20 Nu Ndjambi ngu yandja ohange, tjimanga ma ṱukuṱurire Satan kehi yozombaze zeṋu.
Otjari tja Muhona wetu Jesus ngatji kare na eṋe!
21 Nu Timoteus, omuungure wapamwe na ami, me mu minike, nu wina Lusius na Jason na Sosipater, Ovajuda ovakwetu, mave mu minike.
22 Nu ami Tertius, ngu mba tjanga omambo nga Paulus nga hungira, me mu minike mena ra Muhona.
23 Gajus ngwe ndji sekirisa nu ngu sekirisa ombongo aihe wina ma minike; nu Erastus, omuṱakamise wovimariva vyotjihuro, nomukwetu Kuartus wina mave mu minike.
24 Otjari tja Muhona wetu Jesus Kristus ngatji kare na eṋe amuhe! Amen.
Ongumbiro yohiviro
25 Ngatu hivirike Ndjambi! Eye ma sora okumuzikamisa mongamburiro yeṋu komuhingo wOmbuze Ombwa ya Jesus Kristus ndji mbi zuvarisa, notja komuhingo womavandururiro woviundikwa mbya undikirwe okuza kombutiro youye. 26 Nungwari ovyo nambano vya vandururwa momatjangero wovaprofete; nu otja komarakiza wa Ndjambi waaruhe ovyo vya tjiukisiwa koviwaṋa avihe, kokutja oviwaṋa mbi vi kambure mu Ndjambi nu vi kare nonḓuviro ku ye.
27 Ndjambi porwe erike ngu nounongo auhe nga hivirikwe mu Jesus Kristus aruhe nga ko nga aruhe. Amen.
© Herero Revision Bible © Bible Society in Namibia, 2021.
