Nehemia 8 - Herero Revision Bible (HRR)

Esra ma resere otjiwaṋa Embo rOmatwako

1 Momueze outjahambombari Ovaisrael avehe tjandje va tura movirongo vyawo. Meyuva etenga romueze mbo avehe va woronganena mOjerusalem morupare komurungu wOmuvero wOmeva. Owo va ningira Esra, onongo yomatwako kutja a kaete Embo rOmatwako Muhona nga yandjere ku Israel notjinyo tja Moses. 2 Esra, omupristeri, otja eta indi Embo rOmatwako poṋa pu pa woronganena otjiwaṋa, okutja ovarumendu novakazendu novanatje mbe kura, nu mba yenena okuzuva nawa. 3 Eye we ve resera indi Embo rOmatwako imbo morupare pOmuvero wOmeva okuza komuhuka omunene nga mutenya; navehe va puratena nawa tjinene.

4 Esra wa kuramene kotjikurameno tjomuti tji tja tungirirwa otjiungura hi. Ovarumendu mba kuramene posi ye kokunene kwe va ri Matitja na Sema na Anaja na Urija na Hilkija na Maaseja; nu imba mba kuramene posi ye kokumuho kwe va ri Pedaja na Misael na Malkija na Hasum na Hasbadana na Sakaria na Mesulam.

5 Esra wa kurama kotjikurameno a tongama kombanda yovandu, avehe tjandje mave tara ku ye. Mokamanga eye tja paturura Embo rOmatwako avehe otji va sekama. 6 Nu Esra wa tja nai: “Tangeye Muhona, Ndjambi omunene!”

Novandu avehe va yera omaoko meyuru nave ziri ave tja: “Amen! Amen!” Owo va wa kozongoro amave rikotamene, tjandje omirungu vyawo mavi tara mehi.

7 Nu arire tji va sekama nave kurama motuveze twawo, nOvalevi mbe ve handjaurira omatwako, owo mba: OoJesua na Bani na Serebja na Jamin na Akub na Sabetai na Hodija na Maaseja na Kelita na Asarja na Josabad na Hanan na Pelaja. 8 Owo va toroka omatwako wa Ndjambi mOtjiaramei, nave ye handjaura kutja otjiwaṋa tji zuve nawa.

9 Notjiwaṋa tji tja zuva Omatwako tja hihamwa omitima natji riri. Nehemia, ngwa ri ongooneya, na Esra, omupristeri nonongo yOmatwako, nOvalevi mbaa ve handjaura Omatwako, otji va raera nai kotjiwaṋa: “Eyuva ndi oro eyapuke ku Muhona, Ndjambi weṋu; amu ṱoruhoze, nu amu riri. 10 Nambano yarukeye kozoyeṋu mu katjite omukandi. Kahaṋasaneye ovikurya nomavinu weṋu na imba mbe hi na mbya yenene, tjinga ndinondi eri eyuva eyapuke ku Muhona, Ndjambi wetu; amu kurungisiwa namuṱoruhoze. Ondjoroka Muhona ndji me mu pe mai mu pe omasa.”

11 Ovalevi va ryanga okuhuhumiṋa ovandu nave ve raere kutja ave ha kurungisiwa nokuṱoruhoze meyuva eyapuke otja indi. 12 Novandu avehe va yaruka kozoyawo, ave karya nokunwa nondjoroka, nave kahaṋasana novakwao imbi mbi va ri na vyo, tjinga ava zuva nawa imbi mbi va resere rwe.

Omukandi wOviranda vyOmaso

13 Mependukirwa raindo oviuru vyozonganda puna ovapristeri nOvalevi va ya ku Esra, onongo yOmatwako, kutja ve kerihonge omahongero womatwako. 14 Owo va muna kutja Omatwako Muhona nga yandja notjinyo tja Moses ya rakiza kutja Ovaisrael ve kare moviranda vyomaso moruveze rOmukandi wOviranda vyOmaso. 15 Otji va hinda omaraerero akuhe mOjerusalem na movihuro na movirongo ovikwao, ngu maye tja nai: “Twendeye kozondunda mu kaete otutavi twovindombo notwomiṋinga notwomimbango notwomavare notwomiti vyarwe, tu ungure oviranda otja komaraerero nga tjangwa mEmbo rOmatwako.”

16 Otjiwaṋa otji tja kaeta otutavi natji tungu oviranda komitutu vyozondjuwo morupanda rwondjuwo ya Muhona, na motupare twopOmuvero wOmeva na pOmuvero wa Efraim. 17 Ovandu avehe mba kotokere okuza kouhuura va tunga oviranda nave tura mu vyo. Ihi tja ri otjikando otjitenga okutjitwa nao okuza komayuva wa Josua, omuzandu wa Nun; novandu avehe va nyanda nave yoroka. 18 Okuza keyuva ndi etenga romukandi nga ku indi esenina owo va resa orukondwa rumwe rwEmbo rOmatwako wa Ndjambi, eyuva arihe peke. Va nyanda oure womayuva hambombari, nu eyuva oritjahambondatu ra ri eyuva rombongarero potjouyapuke otja tji pa tjangwa mEmbo rOmatwako.