Omavandururiro 10 - Herero Revision Bible (HRR)

Omuengeri nokambo okamangwa

1 Ami mba munine omuengeri warwe omunamasa ama rauka keyuru. Eye wa kondorokerwe i otjikamba, nu kwa ri nouta wombura kombanda yotjiuru tje; nomurungu we wa ri tjimuna eyuva, nomarama we tjimuna ozongunḓe zotururumo twomuriro. 2 Nu meke re wa ri nokambo okamangwa ku ka ri kamwaha. Nombaze ye yokunene we i twire mokuvare, nu indji yokumuho we i zikire kombanda yehi, 3 na ravaere neraka enene nda ri nomungunda tjimuna owongeyama ndji mai tye ovimboro. Neye tja zire nokuravaera, otuṱuṱumo hambombari arire tji twa ziri nomungunda. 4 Nu tjimanga otuṱuṱumo twi hambombari tji twa hungira nombosiro yomungunda, ami mba hara okutjanga. Nungwari mba zuvire eraka nda hungirire okuza keyuru ari tja: “Horeka imbi otuṱuṱumo twi hambombari mbi twa hungire, nu o ha tjanga ko!”

5 Tjazumba omuengeri ngwi ngu mba munine a kurama mokuvare na kombanda yehi, arire tja yere eke re rokunene keyuru, 6 na yana mena ra Ndjambi, ngu nomuinyo aruhe nga ko nga aruhe, nu ngwa utire eyuru na avihe mbi ri mu ro, nehi na avihe mbi ri kombanda yaro, nokuvare na avihe mbi ri mu kwo. Nomuengeri wa yanene a tja: “Kape tji noruveze rukwao okuwomba! 7 Nungwari meyuva ndi omuengeri outjahambombari tja posisa ohiva ye, Ndjambi otji ma yenenisa ouripura we mbwa undikwa otja tja tjivisire kovakarere ve, imba ovaprofete.”

8 Okuzambo eraka ndi ndi mba zuvire amari hungire okuza keyuru ari hungire ku ami rukwao ari tja: “Twende u kakambure okambo nga okamangwa ku ke ri kamwaha meke romuengeri ngwi ngwa kurama mokuvare na kombanda yehi.”

9 Otji mba ya komuengeri ngwi ne kemuningira kutja e ndji pe okambo okamangwa nga. Neye a tja ku ami: “Kambura nu u ke rye! Oko make rire okaruru mezumo roye, nungwari motjinyo tjoye make tjata omuzeze otja ouitji wozonyutji.”

10 Nami e kambura inga okambo okamangwa meke romuengeri ne ri, noko ka tjata omuzeze otja ouitji wozonyutji motjinyo tjandje. Nungwari tji mba za nokukeṋiṋa oko ka karira okaruru mezumo randje. 11 Tjazumba mba raerwa nai: “Ove mo sokuzuvarisa rukwao Ombuze ya Ndjambi otja koviwaṋa na kovanavisenginina na komaraka na kozombara ozengi.”