Ovaheberi 12 - Herero Revision Bible (HRR)

Ngatu siririke omeho mu Jesus

1 Neṱe hapo tu notjimbumba otjinene hi tjovahongonone tji tji ri ongondoroka na eṱe. Otji matu sokutwa pehi omutwaro ngamwa auhe wourunde mbwa kakatera ku eṱe oupupu nai; nu ngatu tupuke nokuhaurwa ihi otjikara tjomararakaneno nge ri komurungu wetu. 2 Ngatu siririke omeho wetu mu Jesus, omuute nomuyenenise wongamburiro yetu. Mena renyando nda ri momurungu we, eye wa zara otjikoroise nokuhinokuṱohoṋi; nu nambano eye wa kakara pehi kokunene kwotjihavero tjouhona tja Ndjambi. 3 Ripureye na ingwi ngwa zarere ovikaro vyovarunde mba mba ri ovanavita na ye. Neṋe otji mu hi nokusokuurwa nokurihahiza.

Muhona u vyura imba mba suvera

4 Nu mokukondja kweṋu nourunde eṋe kamuya piruka nga kokuṱa nokuhupa. 5 Mwa zemba omambo wokupanḓiparisa inga Ndjambi nga hungira ku eṋe otja ovanatje ve:

“Muatje wandje, o tengurura omavyuriro wa Muhona,

nu o mumapara eye tji me ku tena,

6 orondu Muhona u vyura ingwi ngwa suvera,

nu u vera ingwi eye ngwe mu isa po omuatje we.”

7 Zareye inga omavyuriro otja nge ri omberero yaiho, orondu Ndjambi u mu ṱuna otja ovanatje ve! Hapo nai pe nomuatje ngu ha vyurwa i ihe are? 8 Nu tji mu hi nokuvyurwa otja ovanatje ve avehe, okutja eṋe kaweṋe ovanatje ve katjotjiri. 9 Norukwao eṱe twa ri nootate wokombanda yehi mbe tu vyurire, nu twe ve yozikire. Indu katu nokuriwisa kehi ya Tate weyuru tjinene komeho kutja tu kare nomuinyo are? 10 Ootate wokombanda yehi ve tu verere oruveze orusupi punga ava vangere, nungwari Ndjambi u tu vyurira okutupa ouwa, kokutja tu kare norupa mouyapuke we. 11 Tji matu vyurwa, omavyuriro moruveze ndo ye ngara otjiṋa tji matji tu pe oruhoze nu tji tji hi nakutupa enyando. Nungwari kombunda owo maye yandja ku imba mbe kurisiwa i wo otjihape otjiwa tjohange notjousemba.

12 Notji mu sokuyera omake, nga rire ovitata, nu mu zeuparise ozongoro nḓu maze teratera! 13 Twareye ozondjira ozosemba, kokutja ozombaze nḓa remana aze ha pihuka, nungwari ze veruke.

Amu nakaura otjari tja Ndjambi

14 Kondjeye okukara nohange novandu avehe, nu wina mu kondjere ongarero ondjapuke; orondu nokuhinayo kape nomundu ngu ma munu Muhona. 15 Ṱakamiseye kutja ape ha ningi omundu, ngu ma poka kotjari tja Ndjambi. Nu wina ṱakamiseye kutja ape ha ningi omundu ngwa sana notjihape otjiruru tji tji hapa natji eta omaumba omengi nouzuwo watjo. 16 Nu ape ha kara omundu ngu ma tjiti oruvakiro nourunde otja Esau ngwa randisire ourumbi we komariro yemwe. 17 Eṋe mamu tjiwa kutja kombunda, eye tja vangere okupewa ondaya ya ihe, wa imbirahiwa; nu ka munine oruveze kondanaukiro yomutima, nandarire kutja we i pahere nomahoze.

18 Eṋe kamu ere kondundu Sinai ku mwa sere okuṱuna. Kamu ere komuriro omururume na komuzororema nonḓorera na kotjivepo, 19 na kombosiro yohiva na ku indji oyeraka. Otjiwaṋa tja Israel tji tja zuvire indi eraka, tje riyarikaṋa kutja atji ha raerwa embo rukwao. 20 Owo kave yenenene okuzara inga omarakiza nga tjere: “Nu tjinangara otjipuka matji ṱunu kondundu, ngatji ṱe nomawe.” 21 Nu ihi tji tja munikire tja ri otjitirise tjinene nai nga Moses tja tjere: “Ami me tira nu me zezera.”

22 Nungwari eṋe mwe ere kondundu ya Sion na kotjihuro tja Ndjambi omunamuinyo, okutja otjo hi Jerusalem tjeyuru novaengeri vatjo omayovi omengi. 23 Mwe ere kombongarero yenyando yomavena omaveri wa Ndjambi, nu womana nga tjangerwe meyuru. Mwe ere ku Ndjambi, Omupangure wovandu avehe, na kozombepo zovandu ovasemba mba pwisiwa. 24 Mwe ere ku Jesus ngwa eta omerikutiropamwe omape na kombinḓu yomapemeneno, ndji kwizika oviṋa oviwa tjinene komeho pu indji oya Abel.

25 Ṱakamiseye kutja amu ha panḓa okuzuva ku ingwi ngu ma hungire na eṋe. Ovandu mba kondundu ya Sinai mba panḓere okuzuva ku ingwi ngwa zuvarisire embo ra Ndjambi kombanda yehi, kave pengere inga omaverero. Neṱe matu taurire vi tji matu yandja etambo ku ingwi ngu hungira okuza keyuru. 26 Eraka re ra nyinganyingisire indi ehi moruveze ndo, nungwari nambano eye wa kwizika a tja: “Ami rumwe rukwao hi nokunyinganyingisa ehi porwaro, nungwari ma rire indi eyuru wina.” 27 Nomambo nga “rumwe rukwao” maye raisa ongahukiro kutja oviutwa avihe mbya nyinganyingisiwa mavi isiwa po, kokutja oviṋa mbi mbi ha sora okunyinganyingisiwa vi kare.

28 Nu nambano eṱe mbu matu munu ouhona mbu ha nyinganyinga, ngatu tje okuhepa. Ngatu tje okuhepa nu tu rikotamene ku Ndjambi nomutima omupore momuano mbu mau tjata ku ye, 29 orondu Ndjambi wetu eye, tjiri, onguri omuriro omusesete.