Numeri 14 - Herero Revision Bible (HRR)

Omaunaunino wotjiwaṋa

1 Ovaisrael avehe va rara amave riri ouṱuku auhe neraka enene. 2 Owo va unaunina Moses na Aron nave tja nai ku wo: “Atja rira kokuwa andakuzu twa ṱira mehi ra Engipte poo imwi mokuti onguza! 3 Muhona me tu twarere tjike kehi ndo? Eṱe matu ṱu movita, novakazendu novanatje vetu mave huurwa. Katja rira kokuwa ku eṱe okuyaruka kOengipte are?” 4 Nowo verihungirira oveni ave tja: “Ngatu ritoororere omunane tu yaruke kOengipte.”

5 Moses na Aron otji va wa onḓurumika momurungu wombongarero aihe yOvaisrael. 6 Nu Josua, omuzandu wa Nun, na Kaleb, omuzandu wa Jefune, vevari vaimba mba kahorere ehi, va nyondorora ozombanda zawo moruhoze, 7 nave tja nai kotjiwaṋa: “Ehi ndi ndi twa tuurunga okukahora, oro ewa emanise. 8 Muhona tje nonyuṋe mu eṱe, eye me tu twara ngo, ne ketupa ehi ndo ewa netumbe. 9 Amu pirukire Muhona, nu amu tira ovandu mbe tura mehi ndo. Eṱe matu ve ri oupupu tjimuna okahumburwa. Muhona u ri puna eṱe, eye wa nyona oomukuru vovisenginina mbaa ve ve yama; amu ve tira.” 10 Ombongarero aihe ya tanda okuvezepa nomawe, nungwari kamanga ongeṋangeṋeno ya Muhona ya munika pOndanda yOmahakaeneno kOvaisrael avehe.

Moses ma kumbire otjiwaṋa

11 Nu Muhona wa tja nai ku Moses: “Otjiwaṋa hi matji ndji nyengura nga ruṋe? Owo mave panḓa okuriyameka ku ami nga ruṋe, nandi mba tjita oviraisiro ovihimise novingi nai mokati kawo? 12 Ami meve vere nomutjise omuzepe ne ve nyono, nungwari me ku tjiti u rire omuute wotjiwaṋa tji matji rire otjinene notjinamasa pu ihi.”

13 Nungwari Moses wa tja ku Muhona: “Muhona, ove wa pitisa otjiwaṋa hi mOengipte nomasa woye. Ovaengipte tji va zuu imbi mbi wa tjita kotjiwaṋa tjoye, 14 nu mave serekarere koviwaṋa mbya tura mehi ndi. Oviwaṋa mbi vya zuva rukuru kutja ove, Muhona, u ri mokati ketu, nokutja u rimunikisa ku eṱe omurungu nomurungu otjikamba tjoye tji matji kurama kombanda yetu, nokutja u tu hongorera motjikamba mutenya, na motjikamba tjomuriro ouṱuku. 15 Nambano ove tji mo zepa otjiwaṋa tjoye atjihe, imbi oviwaṋa mbya zuva ondangu yoye, mavi tja nai: 16 ‘Muhona tjinga e ha sorere okuhitisa otjiwaṋa tje mehi nde tji kwizikira, ope tji zepera mokuti onguza.’ 17 Nambano, Muhona, ami me ningire nai: Tu raisira omasa woye nu u yenenise imbi mbi wa kwizika, indu ove tji wa tjere nai: 18 ‘Muhona u nomuretima nounyaṋutima ouingi, u isira ouhasemba nozongatukiro, nu vari kaisa omunandjo nokuhinakumuvera, nu u varura ozondjo zooihe movanatje kozondekurona ozetjatatu nga kozetjaine.’ 19 Arikana, isira ourunde wotjiwaṋa hi kounene wotjari tjoye otja tji we tji isira okuza komapitiro watjo mOengipte.”

20 Muhona opa zirira nai: “Ami me tji isire otja punga awa ningire. 21 Nungwari, ami me kwizike kutja tjiri otja komuinyo wandje, na kounene wandje mbu urisa ehi arihe, 22 kape na umwe wovandu mba, ngu ma hupu okuhita mehi ndi. Owo va muna ounene wandje noviraisiro ovihimise mbi mba tjitira mOengipte na mokuti onguza, nungwari ve ndji rora potuingi, nave ha puratene keraka randje. 23 Owo kamaave hiti mehi ndi, ndi mba kwizikira ooihe mukururume. Kape na umwe wa imba mbe ndji nyengura ngu ma hiti mehi ndi. 24 Nungwari mena rokutja omukarere wandje Kaleb u nombepo yarwe, nu u nonḓuviro ku ami, otji me mu vasisa kehi nda kahorere; eye nozondekurona ze mave rumata ehi ndi ri rire ouini wawo, 25 ehi romikutu mu mu tura Ovaamalek nOvakanaan. Muhuka yarukeye nu twendeye mokuti onguza okuhungama Omuronga wOtuu.”

Muhona ma vere otjiwaṋa mena romaunaunino

26 Kombunda yanao Muhona wa hungira ku Moses na Aron a tja: 27 “Otjiwaṋa otjirunde hi matji kara pokundjiunaunina nga ruṋe? Omaunaunino nga ami ye ndji urisa. 28 Nambano, ve pa eziriro ndi: ‘Tjiri, otja komuinyo wandje, ami me tjiti otja pu mwa ningire. Ami, ngu mbi ri Muhona, me tja nai: 29 Mamu koka, noturova tweṋu matu rimbara mokuti onguza mwi. Mena rokutja mwa unaunina ami, kape na umwe wotjiwondo tjozombura omirongo vivari nokomurungu wanao, ngu ma hiti mehi ndi. 30 Tjiri, ami me yana eṋe kamu nakuhita mehi ami ndi mbe mu kwizikira okutura mu ro posi ya Kaleb, omuzandu wa Jefune, na Josua, omuzandu wa Nun. 31 Eṋe mwa tja nai: “ovanatje vetu mave huurwa,” nungwari ami meve vasisa kehi, ndi mwa tonda, noro mari rire omaturiro wawo. 32 Eṋe mamu ṱire mokuti onguza mwi. 33 Ovanatje veṋu mave rire ovarise mokuti onguza oure wozombura omirongo vine, amave munu ouzeu mena rouhaṱakama weṋu ku ami, nga auhe weṋu tja kokere mokuti onguza. 34 Eṋe mamu tjindi omberero yourunde weṋu oure wozombura omirongo vine, okutja ombura imwe keyuva arihe romayuva nga omirongo vine ngu mwa kara amamu hora ehi ndi. Eṋe mamu katjiwa kutja mape kara vi, ami tji mbe mu pe etambo.’ 35 Ami ngu mbi ri Muhona, mba tja nai: Tjiri, ami me tjiti nai ku eṋe, otjiwaṋa otjirunde, mbu mwe ndji pirukira. Imwi mokuti onguza omu mamu ṱire.”

36 Imba ovarumendu Moses mba hinda okukahora ehi, nu mba serekarera ombuze ombi ndja tjita kutja otjiwaṋa tji unaune, 37 va ṱomutjise tjimanga komurungu wa Muhona. 38 Pu inḓa ozohoze omurongo na mbari pa hupa Josua na Kaleb porwe.

Ongondjero ondenga okuhuura ehi

(Deu 1:41-46)

39 Moses tja raera kOvaisrael imbi Muhona mbya hungira, owo va kara noruhoze tjinene 40 Nu menyunguhuka rependukirwa va sekama okukaronda kozondundu, nave ka tja nai: “Oweṱe mba, nambano matu rirongere okuyenda koṋa Muhona ke tu raera, tjinga atwa tjita ourunde.”

41 Nungwari Moses wa tja: “Okutjavi tji mu hi nonḓuviro ku Muhona? Kamaamu yenene! 42 Amu karonda, Muhona tjinga e he ri mokati keṋu; tjapo ovanavita na eṋe mave mu kovere. 43 Tji mwa kahakaena nOvaamalek nOvakanaan, mamu kaṱa motjirwa; Muhona ke nokukara puna eṋe, tjinga amwa poka ku ye.”

44 Nungwari momeritongamisiro wawo va panḓera pokukaronda kondundu, nandarire kutja ihi Otjipwikiro tjOmerikutiropamwe wa Muhona kave tji pitisire mozondanda, na Moses wina. 45 Nu imba Ovaamalek nOvakanaan, mba turire mozondundu nḓa, ve ve rwisa nave ve havere nave ve ramba nga kOhorma.