Oviṋa omundu onongo mbye tjita
1 Pwika ouini woye mombwiko yehi rozonganda, orondu korusenina ove mo kamunina po ovihohe. 2 Yandja orukondwa rumwe rwouini woye kovandu hambombari poo hambondatu, tjinga au hi na moo tjiwa kutja otjiwonga tjiṋe tji matji tjitwa kombanda yehi.
3 Ovikamba tji vye ura nomeva vi roka ombura kombanda yehi; omuti tji wa wire komukuma wokeyuva kokumuho poo komukuma wokeyuva kokunene, okunga amau rarere. 4 Omundu ngu yevayeva ombepo uriri kamaa kunu nu ingwi ngu tara kovikamba uriri kamaa kondo ovihape. 5 Punga au ha tjiwa ondjira yombepo poo oviundikwa vyomuinyo omupe mezumo romukazendu otjingundi, opunga au hi nokusora okutjiwa oviungura vya Ndjambi ngu tjita oviṋa avihe. 6 Kuna ozondwi zoye moruveze rwomuhuka, nu o suvisa omake woye ongurova okukuna rukwao, orondu ove ko nokutjiwa kutja ondwi ndji ndji mai hapa ooiṋe, oyondji poo oyondjina poo kutja azeyembari maze hapa nawa.
7 Ondjerera oyo ondjorokise, nu okokuwa omeho tji maye tara keyuva. 8 Omundu tja kara nomuinyo ozombura ozengi, nga yorokere zo; nungwari nga zemburuke kutja omayuva woruhoze maye rire omengi. Imbi avihe mbi mavi ya, ovyo omungandjo uriri.
Omaronga komitanda
9 Mutanda, nyandera oumutanda woye, nu u yorokise omutima woye momayuva woumutanda woye. Tjita imbi mbi movanga okutjita, nu u kongorere onḓero yomutima woye. Nungwari zemburuka kutja Ndjambi me ku pangura mena roviṋa mbi avihe.
10 Isa mo ongurunguse momutima woye, nu u humburure omihihamo korutu rwoye, orondu oumutanda nozondjise ozonḓorozu ovyo omungandjo uriri.
© Herero Revision Bible © Bible Society in Namibia, 2021.
