Deuteronomium 16 - Herero Revision Bible (HRR)

Opaska

1 “Ṱakamisa omueze Abib, nu tjita Opaska kondjozikiro ya Muhona, Ndjambi woye; orondu momueze Abib, Muhona, Ndjambi woye, otje ku pitisa ouṱuku mOengipte. 2 Zepera Muhona, Ndjambi woye, ozonyanda nozongombe ze rire ombunguhiro yOpaska, poṋa Muhona puma vanga okukumbirwa. 3 Ove ko nakuyenena okurya omboroto, ndji nosurise; oure womayuva hambombari ryaa omboroto, ndji hi nosurise, omboroto yomohakahana; tjinga awa pita mOengipte mohakahana kutja u rizemburuke na indi eyuva romapitiro woye mOengipte, ngunda au nomuinyo. 4 Oure womayuva hambombari ape munika osurise pove, mehi roye arihe, nu konyama, ndji mo punguha ongurova yeyuva etenga, ape hupu okaṋa nga komuhuka weyuva rarwe.

5 “O zepere otjinamuinyo tjOpaska mu ngamwa otjirongo, Muhona, Ndjambi woye, tji me ku pe. 6 Nungwari poṋa Muhona, Ndjambi woye, puma vanga okukumbirwa, nga rire pu wa zepere otjinamuinyo tjOpaska komuihi, indwi oruveze ndu wa pita mOengipte. 7 Onyama tereka nu u i rire poṋa pemwe mbo pomerikotameneno; nu omuhuka weyuva rarwe penduka, u yaruke koyoye. 8 Oure womayuva hamboumwe ryaa omboroto, ndji hi nosurise; nu meyuva oritjahambombari mape tjitwa ombongarero onene kondjozikiro ya Muhona, Ndjambi woye; nu ko nakuungura ko otjiungura mu ro.

Omukandi wOmakondero wOvikokotwa

(Eks 34:22Lev 23:15-21)

9 “Vara ovivike hambombari okuza koruveze ndwi, ndu mo utu okukonda ovikokotwa. 10 Nu nyandereye Omukandi wOmakondero kondjozikiro ya Muhona, Ndjambi woye, amo punguha ombunguhiro yoye omuini, Muhona, Ndjambi woye, punga e ku sera ondaya. 11 Yorokera momurungu wa Muhona, Ndjambi woye, puna ovanatje novakarere voye, nOmulevi ngu tura movirongo vyoye, nowozonganda nosewa nomuhepundu, imba avehe mbe tura pove. Imbi avihe vi tjitira poṋa Muhona, Ndjambi woye, pu me ritoororere okukumbirwa. 12 Rizemburuka kutja ove wa ri omukarere mOengipte, nu ṱakamisa omazikamisiro nga nouṱakame.

Omukandi wOviranda vyOmaso

(Lev 23:33-43)

13 “Nu tjita Omukandi wOviranda vyOmaso oure womayuva hambombari, tji wa zu nokuwonga ovikokotwa nomandjembere woye aehe, nomaze womiṋinga. 14 Yoroka mEyuva roye ndi enene puna ovanatje novakarere voye avehe, nOmulevi nowozonganda, nosewa nomuhepundu, imba avehe mbe tura pove. 15 Oure womayuva hambombari tjitira Muhona, Ndjambi woye, Eyuva enene ndi poṋa Muhona pu me ritoororere okukumbirwa; nu yorokera Muhona, Ndjambi woye, tjinga e ku sera ondaya komakondero woye aehe na koviungura vyoye avihe.

16 “Povikando vitatu mombura, ngamwa ovavena avehe ngave munike komurungu wa Muhona, Ndjambi woye, poṋa Muhona pe ritoororera, mEyuva rOpaska, na pOmukandi wOmakondero, na pOmukandi wOviranda vyOmaso. Omuvena auhe nga eterere otjiyandjewa, 17 otja pomasanekero wondaya Muhona, Ndjambi woye, ndje ku pa.

Ovapangure

18 “Momuhoko auhe toorora mo ovapangure novatjevere motjihuro ngamwa atjihe Muhona, Ndjambi woye, tji me ku pe. Ovandu mba ngave pangure otjiwaṋa nokuhinongarera. 19 O rundurura ousemba mombanguriro; o tjiti ongarera mombanguriro; wina o kambura otjiyandjewa tjombopero, orondu otjiyandjewa hi matji twiya omeho womunazondunge, natji rundurura ousemba waingwi ngu ri osemba. 20 Ousemba, imbwi ousemba porwe, nga rire mbu wa kongorere kutja u kare nomuinyo, nu u kare mehi Muhona, Ndjambi woye, ndi me ku pe ri rire ouini woye.

Ozondataiziro pomerikotameneno

21 “Ko nakurizikira otjihenḓe otjizere tjomuti ngamwa auhe meṋe yotjipunguhiro tja Muhona, Ndjambi woye, tji mo ritungire. 22 Wina ko nakurizikira ombindi Muhona, Ndjambi woye, ndja tonda.”