Orusuvero rwa Ndjambi
Epsalme ra David.
1 Tanga Muhona, muinyo wandje,
atjihe tji tji ri moukoto wandje
ngatji tange ena re eyapuke!
2 Tanga Muhona, muinyo wandje,
nu o zembi oviungura vye avihe oviwa!
3 Eye ongu ma isire omauvi wandje aehe,
nu ongu ma verukisa
omitjise vyandje avihe.
4 Eye ongu me ndji yama konḓiro,
nu ongu me ndji zareke oruzenga
rworusuvero notjari.
5 Nongu me ndji kovisa noviṋa ovingi oviwa,
nu ongu me ndji pe omasa
woumutanda otja owonguvi.
6 Muhona u tjita ousemba
nombanguriro youatjiri ku avehe
mbe tatumisiwa.
7 Eye wa tjivisa ouripura we ku Moses,
noviungura vye ovihimise kOvaisrael.
8 Muhona u nomutima omuwa notjari,
u nomuretima norusuvero orukarerere.
9 Eye kamaa kara pokutuverera
omauvi wetu,
nu kamaa panḓere pomazenge we aruhe.
10 Ke nakutuvera otja komauvi wetu,
nu ke nakutusutisira ozongatukiro zetu.
11 Otja eyuru punga ara kaseka kombanda yehi,
orusuvero rwe opunga aru ri
orunene ku imba mbe mu yozika.
12 Otja komukuma wokomuhuka punga
au ri kokure na imbwi wokongurova,
opunga ama humburura ozongatukiro
zetu kokure na eṱe.
13 Otja ihe punga e ṱotjari novanatje ve,
Muhona opunga e ṱotjari
na imba mbe mu yozika.
14 Eye u tjiwa kutja eṱe twa ungurwa pu tjike,
nu u zemburuka kutja oweṱe oruuma.
15 Omayuva womuinyo womundu
ye ri otja ehozu,
ye nyomoka otja ongara yokuti;
16 ombepo tji ya hingi kombanda yayo,
oyo tjandje kai tji po,
kape na ngu me i munu rukwao.
17 Nungwari orusuvero rwa Muhona
orwo orukarerere ku imba mbe mu yozika;
nouṱakame we u karerera
okuza komuhoko nga komuhoko
18 ku imba mbe ṱakamisa omerikutiropamwe we
nu mbe yenenisa omaraerero we nouṱakame.
19 Muhona wa zika otjihavero tje
tjouhona meyuru nu eye u honapara
kombanda yaavihe novandu avehe.
20 Tangeye Muhona, oweṋe vaengeri
ovanamasa, mbu mu kara nonḓuviro
komarakiza we, nu mbu mu puratena
ku imbi eye mbi ma hungire.
21 Tangeye Muhona,
oweṋe vimbumba vyeyuru amuhe,
mbu mu mu karera nokuyenenisa ombango ye!
22 Tangeye Muhona,
oweṋe viutwa vye amuhe,
koṋa akuhe ku ku nouhona we.
Tanga Muhona, muinyo wandje!
© Herero Revision Bible © Bible Society in Namibia, 2021.
