1 Kombunda yoruveze rworive momayuva womakondero wovikokotwa, Simson wa kavarura omukazendu we ne mu twarere ongombona. Neye wa tja nai ku ihe yomukazendu we: “Me vanga okuhita metuwo romukazendu wandje.”
Nungwari ihe yomukazendu ke mu yandjerere okuhita. 2 Nu ihe yomukazendu wa tja ku Simson: “Ami, tjiri, mba tjangovasi ko na ko na tja na ye, opu mbe mu yandjera ku umwe womapanga woye ngwe ku ṱikire morukupo kutja a rire omukazendu we. Nungwari ingwi omuangu womukazendu woye omuwa pu ye. Eye ongu ma sokurira omukazendu woye moruveze rwe.”
3 Nu Simson wa tja ku wo: “Otjikando hi ami me rire omuhinandjo tji mba tjiti navi kOvafilisti.” 4 Simson otja ya na kapata ozombandje omasere yetatu. Tjazumba arire tja toora omamunine na kutu omitjira vyozombandje nḓa kovivarivari kumwe, na kutu omamunine nga pokati kavyo. 5 Neye wa kamburisa omamunine nga na hingire ozombandje movikunino vyOvafilisti vyovikokotwa na movikokotwa, mbi hiya kondwa. Komuhingo mbwi otja nyosa omikuta vyovikokotwa, novikokotwa mbi hiya kondwa puna omivite nomiṋinga wina. 6 NOvafilisti va pura ave tja: “Owaṋi ngwa tjiti nai?” Nowo va zira nai: “OSimson, ingwi omukwe wOmutimna, omukwe we ihe tjinga e mu yeka omukazendu ne mu yandja kepanga ra Simson.” Ovafilisti otji ve ya nave nyosa omukazendu ngwi nonganda ya ihe.
7 Simson wa tja nai ku wo: “Tji mamu tjiti nao, ami, tjiri, himee suva, ngunda ambi hiye mu sutisa otjiṋa hi.”
8 Neye we ve rwisa noutwe na zepa ovengi tjinene. Nu wa ya na kakara mondimba ya Etam.
Simson ma havere Ovafilisti
9 NOvafilisti ve ya, ave tono ozondanda mOjuda nave rwisa otjihuro Lehi. 10 NOvajuda va pura ave tja: “Mamu tu rwisire tjike?”
Nowo va zira nai: “Eṱe twe ya okupandeka Simson nokumutjita otja eye tje tu tjita.” 11 Novarumendu Ovajuda omayovi yetatu va ya kondimba ya Etam, nave katja nai ku Simson: “Ove ko nokutjiwa kutja Ovafilisti ve tu honaparera are? Nambano ove wa tjiti tjike ku eṱe?”
Neye wa zira a tja: “Owo punga ava tjita ku ami, ami opunga amba tjita ku wo.”
12 Nowo va tja ku ye: “Eṱe twe ya okukupandeka kutja tu kekuyandje kOvafilisti.”
Simson wa tja: “Ndji yaneneye kutja kaweṋe oveni mbu mamu ndji zepa.”
13 Nowo ve mu zira ave tja: “Ayee, kako; eṱe matu ku pandeke uriri nokukuyandja ku wo. Nungwari, tjiri, eṱe katu nokukuzepa.” Nowo otji ve mu pandeka nozongoze mbari ozombe nave mu pitisa mondimba okumutwara kozondanda zOvafilisti.
14 Nu tje ya kOlehi, Ovafilisti ve mu tjakanena nombimbi. Nungwari ombepo ya Muhona ya harisa Simson omasa, neye wa pora inḓa ozongoze nḓa pandeka omaoko we tjimuna ozosepa nḓa pi momuriro; nomapando otji ya poṋoṋoka pomaoko we. 15 Nu tjazumba otja muna eṱupa roruyeo orutarazu rwokasino, arire tje ri toora na zepa na ro ovarumendu eyovi rimwe. 16 Nu Simson wa imbura a tja:
“Neṱupa roruyeo rwokasino ami mbe ve tona; neṱupa roruyeo rwokasino ami mba zepa ovarumendu eyovi rimwe.” 17 Tja za nokuravaera omambo nga arire tja nakaura indwi oruyeo ndwa ri na ro meke re. Nu poṋa mbo we pe ruka Ramat-Lehi, okutja Ondunda yOruyeo.
18 Simson wa ṱonyota tjinene, notja ravaera ku Muhona a tja: “Ove omuini wa yandja outoṋi mbwi ounene komukarere woye; nambano hi ṱonyota, mbi koke nu mbi kamburwe i Ovafilisti ovanavisenginina are?” 19 Ndjambi wa taura oruuwa mOndunda yOruyeo imo mOlehi, nu mu ro mwa pupa omeva. Simson wa nwa, a hara omasa na kotora omuinyo. Komuhingo mbwi oruharwi ndo ndu ri mOlehi opu rwa rukirwa Oruharwi rwOmuravaere nga ku ndinondi.
20 Simson wa ri omunane mOisrael oure wozombura omirongo vivari moruveze rwouhonapare wOvafilisti.
© Herero Revision Bible © Bible Society in Namibia, 2021.
