Markus 4 - Herero Revision Bible (HRR)

Omasanekero womukune

1 Jesus wa utire okuhonga ovandu rukwao meṋe yOmuronga wa Galilea. Otjimbumba tjovandu tji tja woronganena pu ye tja ri otjingi tjinene nai nga eye tja ṱokukaronda mokayaha ku ka ri momeva na kahaama mu ko, nu ihi otjimbumba tjovandu tja kuramene pomukuro womuronga. 2 Eye we ve honga oviṋa ovingi momasanekero na tja ku wo:

3 “Purateneye! Eyuva rimwe omukune wa ya okukakuna. 4 Neye ngunda ama kunu ozondwi motjikunino, tjiva za wira meṋe yondjira, nozonḓera ze ya naze ze ri. 5 Tjiva za wira mehi romawe, pu pe ha ri nehi enyingi, nozo za pita tjimanga, ehi tjinga ari ha hitire oukoto. 6 Nu eyuva tji ra pita, ra nyosa ozondwi nḓa nḓa pita, nozo tjinga aze ha nangananisire nawa omize vyazo mehi, za hakahana okukukuta. 7 Ozongwao za wira mokati kozohongwe; nozohongwe za hapa naze ṋee inḓa ozondwi, nozondwi kaze twire ko ovihape. 8 Nungwari ozondwi tjiva za wira mehi ewa, nozo za hapa, aze nyomoka naze twako ovihape; tjiva za twako omirongo vitatu, tjiva aze twako omirongo hamboumwe, nozongwao zarwe aze twako esere.”

9 Jesus wa mana nomambo nga: “Ngu nomatwi okuzuva nga zuve!”

Omaheero womasanekero

(Mt 13:10-17Lk 8:9-10)

10 Jesus tja kakara erike, ovahongewa ve omurongo na vevari na tjiva vaimba mbe mu zuvire ve ere ku ye, nave mu ningire kutja e ve handjaurire omasanekero ngo. 11 Jesus wa zira a tja: “Eṋe mwa pewa okutjiwa oviundikwa vyouhona wa Ndjambi. Nungwari imba varwe wopendje, mave raerwa avihe momasanekero,

12 Kokutja ‘owo nandi va tara nave tara,

ave ha munu;

nu nandi va puratene nave puratene,

ave ha zuu.

Orondu, ngaave tanaukire ku Ndjambi,

ne ve isire ourunde wawo.’”

Jesus ma handjaura omasanekero womukune

(Mt 13:18-23Lk 8:11-15)

13 Jesus we ve pura a tja: “Omasanekero nga kamu nakuyezuva nawa are? Nu tji pe ri nao, nambano omasanekero aehe omakwao maamu ye zuu vi nai? 14 Omukune ma kunu embo ra Ndjambi. 15 Ovandu tjiva ve ri otja ozondwi nḓa wira meṋe yondjira, nu tjimanga owo tji va zuu indi embo, Satan eya ne ve yeka embo ndi. 16 Ovandu tjiva ve ri otja ozondwi nḓa wira mehi romawe; nu tjimanga owo tji va zuu indi embo, ave yakura ro nenyando. 17 Nungwari embo ndi kari hara omize mu wo, notji ve zikama mu ro okaruveze okasupi. Ombamisiro nomatatumisiro tji vye ya mena raindi embo, otji ve poka ku ro tjimanga. 18 Rukwao ovandu varwe ve ri otja ozondwi nḓa kunwa mokati kozohongwe. Owo ombe ri imba mbe zuva embo, 19 nungwari omerikendero wouye mbwi, notjiwova tjoutumbe, nomananukiro woviṋa vyarwe avihe vi ya mu wo navi ṋee indi embo, noro ari ha twamo ovihape mu wo. 20 Nungwari ovandu varwe ve ri otja ozondwi nḓa nḓa wira mehi ewa. Owo ve zuva indi embo, ave yakura ro nave kara novihape: Tjiva a rire omirongo vitatu, tjiva a rire omirongo hamboumwe, nu tjiva a rire esere.”

Emunine ndi ri kehi yotjitjuma

(Lk 8:16-18)

21 Jesus wa hungira komurungu a tja: “Hapo pena omundu ngu ma twa emunine kehi yotjitjuma poo kehi yombete, nu kakombanda yotjikurameno tjomamunine are? 22 Orondu otjiṋa ngamwa atjihe tji tja horekwa maatji horoka, nu ngamwa atjihe tji tja vandekwa maatji vandururwa. 23 Ngu nomatwi okuzuva nga zuve!”

24 Eye wina wa tja ku wo: “Ṱakamiseye nawa imbi mbi mamu zuu! Eṋe mamu sanekwa notjisaneke ihi eṋe tjinga a mamu saneke na tjo ovakweṋu; nungwari ma tji rire otjizeu okukapita. 25 Omundu ngu notjiṋa eye ma wezirwako komeho; nu ingwi ngu hi notjiṋa ma yekwa nangarire inga okaṱiṱi ke na ko.”

Omasanekero wondwi ndji mai hapa

26 Jesus wa hungira rukwao a tja: “Ouhona wa Ndjambi u ri nai. Omundu ma kunu ozondwi mehi re romakunino. 27 Ouṱuku eye ma rara, nomutenya a penduka, ozondwi tjandje nai maze piti naze hapa eye ngunda e hi nokutjiwa kutja avihe vya kayenda vi. 28 Ehi orini ondi hapisa ozondwi, nozo aze eta ovikurya; rutenga a rire omukono, tjazumba a rire omangura mozondjaṱu, nu korusenina a rire ovikokotwa mbya papa nawa mozondjaṱu. 29 Novikokotwa tji vya horo, omundu otji ma hakahana okuvikonda notjikonde tje, orondu tjandje oruveze rwomakondero rwa yenene.”

Omasanekero wondwi yomuti omumosteri

(Mt 13:31-32, Mt 34Lk 13:18-19)

30 Jesus wa pura a tja: “Ouhona wa Ndjambi matu u sasaneke na tjike? Nu matu u handjaura notjisanekero tjiṋe? 31 Owo u ri tjimuna ondwi yomuti omumosteri. Ondwi ndji tji ya kunwa mehi, oyo ondji ri onḓiṱinḓiṱi pozondwi azehe kombanda yehi. 32 Nungwari kombunda oyo tji ya hapa, i kura a i rire onenenene povikunwa avihe. Oyo i tandavarisa otutavi otunene nga ozonḓera zeyuru tji maze tungu ko oviruwo vyazo momuzire wayo.”

33 Jesus aa zuvarisa ombuze ye kovandu ama serekarere omasanekero omakwao otja inga, owo punga aave sora okuzuva. 34 Eye ka hungirire ku wo nokuhinomasanekero, nungwari eye tja kakara erike puna ovahongewa ve, ee ve handjaurire oviṋa avihe.

Jesus ma porimanisa otjivepo

(Mt 8:23-27Lk 8:22-25)

35 Mongurova yeyuva tjingero ndo, Jesus wa tja nai kovahongewa ve: “Ngatu konde munda mbwina womuronga.” 36 Owo va isa otjimbumba tjovandu, ave karonda mokayaha nga Jesus ma tengere okukahaama; nu otji va twaerera Jesus puna wo. Wina pa ri ouyaha oukwao poṋa mbo. 37 Tjimanga otji kwa hinga otjivepo otjinamasa, nozongazona za uta okuhita mokayaha nga oko tji ka ri pokuura nomeva. 38 Jesus wa ri kongotwe mokayaha a rara na haverisa otjiuru tje kotjihaverwa. Ovahongewa ve mu pendura ave tja: “Muhonge, ko na ko na tja kutja matu ṱu are?”

39 Jesus otja penduka, a vere otjivepo na tja kozongazona: “Mwina! Porimana!” Otjivepo otji tja yaruka pehi, nu aku mwina kumwi. 40 Nu Jesus a tja nai kovahongewa ve: “Mwa mumaparere tjike? Ngamba kamuya kara nongamburiro are?”

41 Nungwari owo va tira tjinene nave purasana amave tja: “Hapo omundu ngwi owaṋi, ngu zuvirwa i otjivepo nozongazona?”