Otjirimunikise tjondwezu yonḓu noyongombo
1 Mombura oitjatatu Belsasar tja ri ombara, ami mba muna otjirimunikise otjitjavari. 2 Motjirimunikise hi mokamanga ami mbe rimuna ambi ri motjihuro ohongora Susa mehi ra Elam. Ami mba kuramene ponḓonḓu Ulai, 3 nu imba meṋe yonḓonḓu mba muna po ondwezu yonḓu ndja ri nozonya mbari ozonde, imwe ya ri onde tjinene pongwao nu aya senina okuhapa. 4 Ami mba tarera ondwezu yonḓu ndji amai tuu nozonya yazo komukuma wokongurova na keyuva kokumuho na keyuva kokunene. Kapa ri otjipuka tjaa tji yenene okuitjaera nokutaurira omasa wayo. Oyo aa i tjiti pu mai vanga, nu ai rire otjindandi tjinene.
5 Ngunda amba kumwa kutja ihi matji hee tjike, otji kwa rauka ondwezu yongombo okuza kongurova amai tuurunga omahi aehe nu ndjaa i utuka tjinene nai nga ovikoti vyayo tjaavi ha sora okutuṋa pehi. Oyo ya ri nonya imwe pokati komeho wayo. 6 Ondwezu yongombo ndji ye ya okuhungama ondwezu yonḓu, ndji mba mwine aya kurama meṋe yonḓonḓu, noyo ya utuka kondwezu yonḓu ndji nomasa wayo aehe. 7 Ami mbe i tarera tji mai rwisa ondwezu yonḓu. Ondwezu yongombo ya pindikire tjinene nai nga tji ye riyumba mondwezu yonḓu nai teya ozonya azeyembari zondwezu yonḓu. Ondwezu yonḓu kaya ri nomasa okuipirukira. Oyo ya natwa nai tombwa, nu kapa ri umwe ngwaa sora okuiyama.
8 Ondwezu yongombo ya riririra ko otjindandi, nungwari momasa wayo omanene onya yayo arire tji ya teka. Nu moruveze rwonya ndji mwa pita ozonya ine, nu aihe yazo ya hungamene kwarwe. 9 Monya imwe yainḓa ine mwa hapere onya onḓiṱi, nouvara wayo wa tandavara komukuma wokeyuva kokunene na komuhuka na kEhi Ekwizikwa.
10 Oyo ya hara omasa, nga yenena okurwisa otjimbumba tjeyuru, okutja ozonyose ozeni, nonya ya raurira tjiva zazo pehi nai ze tombo. 11 Oyo ya rwisa nangarire omuhongore wotjimbumba tjeyuru, ai tjaere ozombunguhiro zeyuva arihe nḓe punguhirwa ye nai yamburura ondjuwo ya Muhona. 12 Mu yo ovandu ve tjitira mo ouvi moruveze rwokupunguhira mo ozombunguhiro ozosemba zeyuva arihe, nongamburiro youatjiri ya nakaurwa. Onya ndji ya toṋa moviṋa avihe mbi ya tjita.
13 Nami mba zuva omuengeri umwe ama pura omukwao nai: “Oviṋa otja imbi mbya munika movirimunikise mavi ryama nai nga ruṋe? Ouvi ouyaukise mau pingene ozombunguhiro zeyuva arihe nai nga ruṋe? Otjimbumba tjeyuru nondjuwo ya Muhona mavi tombwa nai nga ruṋe?”
14 Ami mba zuva omuengeri omukwao ama ziri nai: “Mavi kara po oure womayuva 1,150, mu wo ozombunguhiro zongurova nozomuhuka kaze tji nokupunguhwa. Tjazumba ondjuwo ya Muhona mai yarurwa ko.”
Omuengeri Gabriel ma handjaura otjirimunikise
15 Ami mba kondja okuzuva kutja otjirimunikise hi matji hee tjike, nu mokamanga otji pa kurama omundu momurungu wandje ngwaa munika otja omurumendu. 16 Ami mba zuva eraka nda ravaera munda mbwina yonḓonḓu Ulai amari tja nai: “Gabriel, mu handjaurira omaheero waimbi mbya muna!” 17 Gabriel weya a kurama posi yandje, nami mba uruma tjinene nai nga tji mba wa onḓurumika.
Eye wa tja nai ku ami: “Muatje womundu, tjiwa omaheero nga. Otjirimunikise hi matji hee omayuva womaandero wouye.” 18 Gabriel ngunda ama hungire ami mba wira pehi e seuka. Nungwari eye we ndji kambura ne ndji yerurura okukurama kozombaze zandje 19 na tja: “Ami me ku raisire kutja omazenge wa Ndjambi maye tjiti tjike moruveze orusenina, orondu otjirimunikise hi matji hee oruveze rwomaandero.
20 “Ondwezu yonḓu, ndji wa muna nu ndja ri nozonya mbari, mai kuramenepo ouhona wa Medie nowa Persie. 21 Ondwezu yongombo mai kuramenepo ouhona wa Grike, nonya ndji ndja ri pokati komeho wayo oyo ombara ondenga. 22 Ozonya nḓa ine nḓa hapa, onya indji ondenga tji ya teka, maze kuramenepo omauhona yane mu mamu haṋewa otjiwaṋa nu nge hi nokukara nomasa otja ouhona imbwi outenga.
23 “Ondjandero yomauhona ngo tji ye ya, nomauhona tji ya rire omanauvi tjinene kutja ye verwe, mape kara ombara otjirangaranga notjindandi nonavineya. 24 Oyo mai kara nouvara, nungwari e he ri momasa wayo oini. Mai eta omanyoneno omatirise, nu mai toṋa moviṋa avihe mbi mai tjiti. Oyo mai yandeke ovanane ovanamasa notjiwaṋa tja Ndjambi otjini wina. 25 Oyo tjinga ai novineya mai toṋa momatiku wayo. Oyo mai ritongamisa oini, nu mai nyono ovandu ovengi ohei. Mai pirukire nangarire omuhonapare omunenenene pu avehe, nungwari oyo mai hahaurwa nokuhinombatero yomundu. 26 Otjirimunikise hi tjozombunguhiro zongurova nozomuhuka tji wa mangururirwa matji yenenisiwa tjiri. Nungwari tji ṱiza mongumumu nambano, orondu ma rire oruveze orure otjo ngunda atji hiya yenenisiwa.”
27 Ami, Daniel, mba pungara e vere oure womayuva tjiva. Tjazumba otji mba penduka ne yaruka koviungura, mbi mba perwe i ombara, nungwari ami mba kumisirwe i otjirimunikise hi, nu hee tjiwa omaheero watjo.
© Herero Revision Bible © Bible Society in Namibia, 2021.
