Ndjambi notjiwaṋa tje
Omuimbo wa Asaf.
1 Tjiwaṋa tjandje, puratena komahongero wandje,
nu u zuve nawa komambo ngu me hungire.
2 Ami me kahungira momiano,
nu me mangurura oviundikwa
vyoruveze orukuru,
3 oviṋa mbi twa zuva nu mbi tu i,
nu mbi twa serekarererwa i ootate.
4 Katu nokuvihoreka ko kovanatje vetu,
nungwari matu vi serekarere kozondekurona
imbi oviungura ovinene
vya Muhona nouvara we,
novihimise eye mbya tjita.
5 Eye wa yandja omazikamisiro kotjiwaṋa tja Israel,
nomatwako kozondekurona za Jakob.
Eye wa rakiza kootate mukururume
kutja ve honge omazikamisiro we
kovanatje vawo,
6 kokutja inḓa ozondekurona
zokombunda ze rihonge wo,
nokutja ozo wina ze keyeserekarere
kovanatje vazo.
7 Komuhingo mbwi owo wina
otji mave riyameke ku Ndjambi,
nave ha zembi oviungura vye,
nungwari aruhe otji mave
ṱakamisa omatwako we,
8 nave ha horere kooihe mukururume,
mbari ovirangaranga nu mbe ha ri nonḓuviro,
owo kave riyamekere ku Ndjambi,
nu kavena pu va karerera ovaṱakame mu ye.
9 Ovaefraim mbe ripangaṋa nomauta noviku,
va tupuka meyuva rotjirwa.
10 Owo kavena pu va ṱakamisa omerikutiropamwe
wawo kuna Ndjambi;
nowo va panḓa okukara
nonḓuviro komatwako we.
11 Owo va zemba oviungura vye
novihimise eye mbye ve raisirire.
12 Ndjambi wa tjitire ovihimise
ooihe mukururume amave tarere
morutjandja rwa Soan,
mehi ra Engipte.
13 Eye wa haṋa omeva womuronga
mokati ne ve kondisa;
wa kuramisa omeva tjimuna ovikere.
14 Mutenya eye we ve hongorera notjikamba,
nouṱuku auhe we ve
hongorera nondjerera yomuriro.
15 Eye wa pamuna otuuwa mokuti onguza,
narire tje ve hire omeva omengi
okuza kehi mourekoto.
16 Wa topora ozonḓizira moruuwa,
notja pupisa omeva tjimuna ozonḓonḓu.
17 Nungwari owo va kara pokutjita
ourunde komurungu wa Ndjambi,
nu mokuti onguza va pirukira
ingwi owOkombandambanda.
18 Owo va rorera Ndjambi wina amave
ningire ovikurya meraru rawo.
19 Va hungira Ndjambi ave tja:
“Hapo Ndjambi ma sora okuyandja
ovikurya mokuti onguza are?
20 Ouatjiri kutja eye wa tona oruuwa
nu amu piti omeva,
narire tji rwa pupisa oturonḓu;
nungwari eye ma sora okutupa
omboroto nokuyandja
onyama kotjiwaṋa tje are?”
21 Muhona tje ve zuva,
otja ṱomazenge;
eye wa rwisa otjiwaṋa tje nomuriro,
nomazenge we ya
ririra ko omengi ku wo,
22 owo tjinga ave ha kamburire mu ye,
nave he riyamekere kombatero ye.
23 Nungwari eye wa rakiza
ovikamba kombanda na paturura
omivero vyeyuru;
24 we ve pa ovikokotwa okuza keyuru,
ame ve rokisire otjimana kutja ve rye.
25 Auhe otja rya omboroto yovaengeri;
nu Ndjambi we ve pa onguta onyingi.
26 Eye wa tjita kutja ombepo
yomuhuka i singe,
nu mouvara we arire tja paturura
ombepo yokeyuva kokumuho;
27 wa hindira otjiwaṋa tje ozonḓera,
nḓa ri ozengi tjinene tjimuna
eheke pomukuro wokuvare;
28 we ze wiririsira mokati kozondanda
ongondoroka nomaturiro wawo.
29 Avehe otji va rya nave kuta;
Ndjambi we ve pere imbi mbyaa ve zeri.
30 Nungwari owo kave na pu va
kovisire eraru rawo,
nu ngunda amave ri,
31 Ndjambi otja ṱomazenge na wo na
zepa ovarumendu vawo ovanamasa tjinene,
imba ovazandu omitanda va Israel.
32 Kombanda yoviṋa avihe mbi owo
va panḓera pokutjita ouvi;
nu kava kamburire ko moviungura
vye ovihimise.
33 Eye otja yandisa omayuva wawo
tjimuna osuvaneno,
nozombura zawo momburuma yatjimanga.
34 Aruhe Ndjambi tja zepa tjiva vawo,
imba mba sewa po aave kotoka ku ye;
owo aave ritanaura nokukumba ku ye
nomitima vyawo avihe.
35 Owo va zemburuka kutja Ndjambi
eye oruuwa rwawo,
nokutja Ndjambi wOkombandambanda
eye omukuture wawo.
36 Nungwari omambo wawo aehe ya ri
ovizeze porwavyo;
navihe mbyaa ve hungire vya ri ovineya uriri.
37 Nomitima vyawo kavi zikamene mu ye,
nu kava ri nouṱakame
momerikutiropamwe we.
38 Nungwari Ndjambi wa ri
nounyaṋutima kotjiwaṋa tje.
Eye we tji isira omauvi watjo
nu ke tji yandekere ko.
Potuingi eye we ritjaera komazenge we,
nu wa yarura omapindi we pehi.
39 Eye wa zemburuka kutja owo ovandu uriri,
tjimuna ombepo ndji hinga nai ha kotoka.
40 Owo, tjiri, potuingi ve mu pirukira,
mokuti onguza,
nave mu pe omuhihamwatima.
41 Aruhe owo va kara pokurora Ndjambi,
nu va hihamisa Omuyapuke wa Israel.
42 Owo va zemba omasa we omanene,
na indi eyuva eye nde ve kutura
kovanavita na wo,
43 na indu tja tjita oviraisiro ovinene mOengipte,
noviṋa ovihimise morutjandja rwa Soan.
44 Eye wa tjitukisa omeva
wozonḓonḓu okurira ombinḓu,
kutja Ovaengipte ave ha sora okuyenwa.
45 Wa hinda ehapu romaze mokati kawo
aye ve rumata,
novisume avi ve pe eputi.
46 Eye wa hinda ourombo
okurya ovihape vyawo,
nozombahu okunyona
omahi wawo womakunino.
47 Wa hahaura omivite vyawo
nozombawe zombura,
nu wa ṱukuṱura omikuyumbwa
vyawo nomakende wombepera.
48 Ozongombe zawo eye wa zepa
nozombawe zombura,
nozonyanda zawo wa zepa
norutjeno rwombura.
49 Eye wa hinda otjipyu tjomazenge we,
nomapindi nombamisiro,
mbye ya ku wo otja otjira tjovatjite woumba.
50 Ka tjaerere omazenge we,
nu ka yamene ominyo vyawo konḓiro,
nungwari we ve zepa nomutjise omuzeu.
51 Eye wa zepa omaveri omazandu
momatundu aehe wOvaengipte.
52 Tjazumba eye arire tja pitisa
otjiwaṋa tje tjimuna ozonḓu,
nu e tji hongorere mokuti onguza.
53 Tjiri, eye we tji hongorera nokuhinooma,
notjo kaatji tira;
nungwari ovanavita na tjo va
vandekwa i omuronga.
54 Eye we tji twara kehi re eyapuke,
kozondundu nḓa eye omuini nḓa
kamburire momasa.
55 Wa ramba oviwaṋa ovinavisenginina,
otjiwaṋa tje tji tje ya;
wa haṋena omihoko vya Israel ehi ravyo,
narire tja yandja omaturiro
wavyo kotjiwaṋa tje.
56 Nungwari Ovaisrael va rora
Ndjambi wOkombandambanda
nave mu pirukire;
owo kave ṱakamisire omatwako we.
57 Va poka nave ha ṱakama mu ye
tjimuna ooihe mukururume,
va tanauka tjimuna outa
mbu ha pamene nawa.
58 Ve mu pindikisa nopoṋa
pomerikotameneno wawo kovisenginina,
nu ve mu pa eruru
noomukuru vawo vovisenginina.
59 Ndjambi wa muna otjiṋa hi na ṱomazenge,
neye wa nakaura otjiwaṋa tje Israel.
60 Wa isa omaturiro we mOsilo,
indji ondanda ndja zikire
i rire omaturiro we mokati kovandu.
61 Eye wa yandjera kutja ovanavita na eṱe
ve kambure Otjipwikiro tjOmerikutiropamwe,
tji tji ri otjiraisiro tjomasa nounene we.
62 Wa ṱomazenge notjiwaṋa tje omuini,
narire tje tji tarere
ama tji ṱu i ovanavita na tjo.
63 Ovazandu vatjo omitanda va ṱa movita,
novasuko vatjo omitanda kava ri
novarumendu mbu mave ve kupu.
64 Ovapristeri vatjo va ṱengaruvyo,
novahepundu vawo ave ha riri.
65 Muhona otja penduka aayo
wa ri mozomboṱu;
eye wa ri otja ombanḓe ndja ṱomavinu.
66 Wa tona ovanavita na ye neve yarura ombunda,
notje ve ṱisa ohoṋi aruhe.
67 Nungwari eye wa imbirahi
ozondekurona za Josef,
nu ka toororere omuhoko wa Efraim.
68 Moruveze rwanao eye wa
toorora omuhoko wa Juda,
nOndundu ya Sion ndja suvera tjinene.
69 Eye wa tunga ko ondjuwo ye
tjimuna inga omaturiro we meyuru;
eye we i zikamisa tjimuna indi ehi
orini nda zikire nga aruhe.
70 Wa toorora omukarere we David,
ne mu isa kouṱuta
71 eye kaa risa otupanda twozonyanda zawo,
ne mu ziki okurira ombara ya Israel,
okutja omurise wotjiwaṋa tja Ndjambi.
72 David we tji risa nomutima omuṱakame,
nu e tji hongorere nounongo.
© Herero Revision Bible © Bible Society in Namibia, 2021.
