Omuzuvarise 12 - Herero Revision Bible (HRR)

1 Zemburuka Omuute woye momayuva woumutanda woye, omayuva nozombura ozombi ngunda aze hiye ya, inḓa nḓu motja kaze nokutjata ku ami, 2 neyuva nondjerera, nomueze nozonyose ngunda avi hiya zorera, novikamba vyombura ngunda avi hiya za ko. 3 Meyuva ndo omaoko woye nge ku yama maye zezera, nomarama woye nge nomasa nambano maye ngundipara; omayo woye maye rika tjinene nga tji ye hi nokusora okuṱaṱuna ovikurya vyoye, nomeho woye maye rire omaṱumbe tjinene nga tji ye hi nokusora okumuna nawa. 4 Omatwi woye maye woropara nga tji ye hi nokuzuva orurokoho momuvanda; ove komoo yenene okuzuva ombako tji mai kweye poo ovihumba tji mavi nyanda, nangarire okuimbura kwonḓera maku ku pendura mozomboṱu. 5 Ove mo tira okuronda kotuveze twokombanda, nomakawondjero woye maye rire oumba kove. Ozondjise zoye maze rire ozombapa, ove komoo yenene okurinana omuini komurungu, nozonḓero azehe nḓu u na zo maze yanda.

Eṱe matu i komaturiro wetu omasenina worusuvo, nu tjazumba ape kara omaririro momivanda. 6 Ouketanga ousilveri mau poka, nemunine engoldo mari u nari teka; ongoze ndji nana omeva mondjombo mai poka, notjitjuma tjomeva atji nyanyauka. 7 Otutu twetu matu yaruka koruuma rwehi, nomasuvaneno womuinyo maye yaruka ku Ndjambi ngwe tu pa wo.

8 Avihe mbi omungandjo, omungandjo, Omuzuvarise ma tja nai, avihe mbi ovyo omungandjo uriri.

Omakutiro womambo aehe

9 Posi yokurira onongo, Omuzuvarise wina wa honga ondjiviro ye kovandu ame ripura nama konḓonona nama weza ko omiano omingi. 10 Omuzuvarise wa kondja okumuna omambo omananyuṋe, nokutjanga osemba omambo wouatjiri. 11 Omambo wozonongo ye ri otja ovitwere notja ozomboha nda tonwa okuhita oukoto; Owo ya yandjwa i Ndjambi, ingwi Omurise wetu atuhe.

12 Nu posi yaimbi, muatje wandje, me ku rongo nai: Okutjanga omambo omengi kaku nomaandero, nokurihonga okuingi ku urisa orutu.

13 Otjiṋa otjinanḓengu pu avihe mbya zuvaka, otjo hi: Kara nondira ku Ndjambi, nu u ṱakamise omatwako we; orondu ihi otjiṋa tji tji sokutjitwa i omundu auhe. 14 Ndjambi ma isana oviṋa avihe kombanguriro, nangarire imbi avihe mbya undikwa, kutja oviwa poo kutja ovivi.