Ourunde nonḓiro yooNadab na Abihu
1 Ovazandu va Aron, ooNadab na Abihu, auhe wa toora otjikangero tje tjomatwimisiro, ave twa mo omakara ngae yaka nave twa ovyomoro omuwa ku wo; notji va punguhira Muhona ombunguhiro yovikurya eye ndje ha rakizire. 2 Kamanga Muhona wa hinda omuriro, nowo we ve seseta; nu va ṱira momurungu wa Muhona. 3 Nu Moses wa tja ku Aron: “Imbi ombya hungirwa i Muhona, indu tja tjere: ‘Avehe mbe ndji karera nga ve yozike ouyapuke wandje; nami me vandurura ouvara nounene wandje me u raisa komurungu wotjiwaṋa atjihe.’ ” Nungwari Aron wa mwina.
4 Tjazumba Moses wa isana OoMisael na Elisafan, ovazandu va Usiel, ongundwe ya Aron, na tja nai ku wo: “Indjeye popezu, pitiseye oturova twomihoko vyeṋu motjouyapuke, nu mu tu tware pendje yozondanda.” 5 Nowo otji ve ya nave toora oturova mozombanda zatwo nave tu pitisa pendje yozondanda otja Moses pa rakiza.
6 Moses opa tjera kooAron novazandu ve Eleasar na Itamar: “Amu isa ozondjise zeṋu aze hiya kamurwa, nu amu nyondorora ozombanda zeṋu okuraisa kutja mu ri moruhoze, tji mwa tjiti nao mamu ṱu, nomazenge wa Muhona ma eya kombanda yombongo aihe. Nungwari Ovaisrael avehe mave yandjerwa okuririra imba mba ṱu i omuriro Muhona mbwa hindi. 7 Ngaamu zu po pomahitiro wOndanda yOmahakaeneno, tjapo mamu ṱu, eṋe tjinga amwa twirisiwa nomaze omatwirise wa Muhona.” Nowo va tjita otja kembo ra Moses.
Omazikamisiro kovapristeri
8 Muhona wa tja ku Aron: 9 “Ove novazandu voye amu nu ko omavinu poo omeva omapurukise tji mamu hiti mOndanda yOmahakaeneno; tji mwa tjiti nao, mamu ṱu. Inga owo omazikamisiro omakarerere kozondekurona zeṋu azehe. 10 Tweye po ombangu pokati kaimbi ovya Ndjambi, na mbi he ri ovya Ndjambi, ovikohoke novihakohoke. 11 Mamu sokuhonga Ovaisrael omazikamisiro aehe Muhona nge mu tjivisa notjinyo tja Moses.”
12 Nu Moses wa hungira ku Aron novazandu ve, ooEleasar na Itamar, mba sewa po a tja: “Kambureye ombunguhiro yoruhere orunḓunḓura ndja hupa kombunguhiro yovikurya ndja punguhirwa Muhona, nu ungureye ozomboroto nḓe hi nosurise nu mu i rire meṋe yotjipunguhiro; orondu ombunguhiro ndji ondjapukeyapuke. 13 Opu mwa sokuirira poṋa popayapuke, tjinga aya tyerwa ove novazandu voye okuza kozombunguhiro ozoningiririsiwa nḓa punguhirwa Muhona; orondu ami mba rakiziwa nao. 14 Nu indwi orukoro nokurama wina vi rireye poṋa popakohoke, ove novazandu voye novasuko voye pamwe, tjinga avya yerekerwa ove novanatje voye otja orukondwa okuza mozombunguhiro zOvaisrael zohange. 15 Ingwi okurama norukoro ngavi etwe puna ozonḓura zozombunguhiro oningiririsiwa tji maze punguhirwa Muhona. Ovyo mavi rire ovyoye puna ovanatje voye otja orukondwa orukarerere ku eṋe, Muhona punga a rakiza.”
16 Nu Moses wa paha tjinene indji ongombo yombunguhiro yokuisapo ourunde, nungwari oyo tjandje ya ningiririsiwa rukuru. Neye otja pindikira ooEleasar na Itamar tjinene, imba ovazandu va Aron, mba sewa po na tja: 17 “Okutjavi ombunguhiro yokuisapo ourunde tji mu he i rire poṋa popayapuke? Oyo ondjapukeyapuke, nu Muhona we i yandja ku eṋe mu ise ko ourunde wombongo. 18 Tara, ombinḓu yongombo ndji tjinga ai ha eterwe motjouyapuke, itjamu rira onyama yayo poṋa popayapuke otja punga ambe mu rakiza.”
19 Aron arire tja tja ku Moses: “Andakuzu mba ri ombunguhiro yokuisapo ourunde ndinondi, Muhona atja kara nonyuṋe muyo? Ovandu va eta ombunguhiro yokuisapo ourunde ku Muhona ndinondi, nave eta ombunguhiro oningiririsiwa, nungwari oviṋa ovihimise mbi vye ndji wire.” 20 Nu Moses tja zuva ihi wa kara nohange.
© Herero Revision Bible © Bible Society in Namibia, 2021.
