David ma havere Ovaamoni nOvasirie
(2Sam 10:1-19)1 Kombunda yoruveze rworive Nahas, ombara yOvaamoni, wa koka; nomuzandu we Hanun ongwa rira ombara. 2 David wa tja: “Ami me sokuraisa oupanga ouṱakame ku Hunun otja ihe Nahas tja tjitire ku ami.” David otja hinda ovatumwa okukemuhuhumiṋa.
Nowo tji va kavaza mehi rOvaamoni nave kahuhumiṋa ombara Hanun, 3 ovahongore vOvaamoni otji va tja nai kombara: “Mo ripura kutja David wa hinda ovarumendu mba okuyekukuhuhumiṋa mena rondengero ye ku iho are? Kako! Eye we ve hindi otja mbe ri ozohoze okuyekuhora ehi, kokutja a huure ro!”
4 Hanun wa kambura ovahindwa va David e ve kurura otuyezu na kondo ozombanda zawo nga pomatako; tjazumba e ve hindi okuyaruka. 5 Owo va ṱohoṋi tjinene okuyaruka konganda. David tja zuva imbi mbya tjitwa, otja hinda ombuze ku wo kutja ve kare mOjeriko nokutja ave ha kotoka nga otuyezu twawo tji twa hapa rukwao.
6 Ombara Hanun nOvaamoni tji va muna kutja owo omba hahisire David, otji va hinda osilveri yondjinda yozokirograma omayovi yane kOmesopotamie rOkombanda na kOmaaka na Soba, imbi ovirongo vya Sirie, okukayazema na yo otjimbumba tjovita. 7 Inga omatemba wovita omayovi omirongo vitatu na yevari ngu va yazema, na ihi otjimbumba tjovita tjombara ya Maaka vye ya; nowo va tona ozondanda popezu na Medeba. Imba Ovaamoni wina ve ya okuza kovihuro vyawo avihe nave rirongerere okurwa.
8 David tja zuva imbi mbya tjitwa, otja hinda Joab na ihi otjimbumba atjihe tjovita puna ozombanḓe. 9 Ovaamoni va womboroka nave kakurama pomahitiro wa Raba, ihi otjihuro tjawo ohongora, nozombara nḓe ere okuvatera, za kakurama mokuti.
10 Joab wa muna kutja ovira vyovanavita mavi mu rwisire okuza komurungu na kongotwe, neye wa toorora ovarwe wovita ozombanḓe mOvaisrael ne ve kuramisa okuhungama Ovasirie. 11 Nu ihi otjihupe tjovarwe wovita wa twa kehi yomananeno womuangu we Abisai; nu Abisai we ve kuramisa okuhungama Ovaamoni. 12 Joab wa tja ku Abisai: “Tji wa munu Ovasirie kutja mave ndji havere, indjo u ndji vatere; nOvaamoni tji mave ku havere ami meya okukuvatera. 13 Kara nomasa nu yanḓipara! Ngatu rwire otjiwaṋa tjetu novihuro vya Ndjambi wetu. Nu ombango ya Muhona ngai tjitwe.”
14 Joab novandu ve va ryama okurwa, nOvasirie va tupuka. 15 Ovaamoni tji va muna kutja Ovasirie va tupuka, owo wina otji va tupuka amave tira Abisai nave yaruka motjihuro. Tjazumba Joab wa yaruka kOjerusalem.
16 Ovasirie tji va muna kutja va haverwa i Ovaisrael, arire tji va kaeta ovira vyovita kovirongo vyawo komukuma wokomuhuka wonḓonḓu Eufrat nave vi twa kehi yomananeno wa Sobak, omuhongore wotjimbumba tja Hadad-Eser tjovita. 17 David tja zuva ombuze ndji otja woronganisa ovira vyOvaisrael vyovita, a kondo onḓonḓu Jordan ne vi kuramisa okuhungama Ovasirie. Otjirwa tja uta 18 nOvaisrael va taurira motjimbumba tjOvasirie tjovita. David notjimbumba tje tjovita va zepa ovarumendu omayovi hambombari ovahinge vomatemba wOvasirie wovita, novarwe ve pehi omayovi omirongo vine. Owo wina va zepa Sobak, omuhongore wOvasirie. 19 Ozombara, nḓa ri kehi youhona wa Hadad-Eser, tji za muna kutja za haverwa i Ovaisrael, otji za tjita ohange kuna David naze kara kehi youhona we. Ovasirie kave na pu va kakara nombango okuvatera Ovaamoni rukwao.
© Herero Revision Bible © Bible Society in Namibia, 2021.
