Esekiel 44 - Herero Revision Bible (HRR)

Okuhita nokupitira momuvero wokomuhuka

1 Omurumendu ngwi we ndji twara komuvero wopendje komukuma wokomuhuka kwondjuwo ya Muhona. Omuvero mbwi wa paterwe, 2 nu Muhona wa tja nai ku ami: “Omuvero mbwi mau kara awa patwa nu kamaau patururwa ko. Kape nomundu ngu ma yandjerwa okuhita nokupitira mu wo, orondu ami, ngu mbi ri Ndjambi wa Israel, mba hitira mu wo. Owo mau kara awa patwa. 3 Nungwari omunane ohivirikwa porwe ongu ma hitire mo okukarya ovikurya oviyapuke momurungu wandje. Eye ma hiti nokupitira momuvero wetuwo enene mbu ri komaandero womoukoto.”

Omazikamisiro wokuyandjera okuhita mondjuwo ya Muhona

4 Omurumendu we ndji tuurungisira momuvero wokeyuva kokunene ne ndji twara komurungu wondjuwo ya Muhona. Ami tji mba tara, mba muna kutja ondjuwo ya Muhona ye ura nongeṋangeṋeno ya Muhona ndji mai keṋakeṋa; nami mba wa onḓurumika, 5 nu Muhona a tja nai ku ami: “Muatje womundu, ṱakamisa oviṋa avihe, mbi mo munu na mbi mo zuu. Ami me ku raere omazikamisiro nomatwako aehe otja kondjuwo. Tjevera nawa kutja omundu uṋe ngu ma pu pokuyandjerwa okuhita nokupita mondjuwo, nokutja omundu uṋe ngu hi nakupwa.

6 “Raera ihi otjiwaṋa otjipirukire tja Israel kutja ami, ngu mbi ri Muhona Ndjambi, hi nokuuhara ame tarere oviṋa oviyaukise mbi tja tjita. 7 Otjo tja yamburura ondjuwo yandje mokuyandjera ovandu wozonganda mbe hi nonḓuviro ku ami kutja ve hite mondjuwo yandje, ozombunguhiro zozonḓura nozombinḓu ngunda amaze punguhirwa ami. Komuhingo mbwi otjiwaṋa tjandje otji tja teya omerikutiropamwe wandje mena rozondjito ozondjaukise azehe nḓu tja tjita. 8 Otjo katji ndji karerere mondjuwo yandje, nungwari moruveze rwanao otjo tja twa po ovandu wozonganda okundjikarera.

9 “Ami, ngu mbi ri Muhona Ndjambi, opu me tjere nai, kape nomundu wozonganda omuhasukara na ngu hi nonḓuviro ku ami ngu ma hiti mondjuwo yandje, nangarire omundu wozonganda ngwa tura mokati kOvaisrael.”

Ovalevi va tjaerwa koupristeri

10 Muhona wa tja nai ku ami: “Ami me vere Ovalevi mba mbe ndji esa nave kakarera oomukuru vovisenginina, indu Ovaisrael tji va poka ku ami. 11 Owo mave yenene okundji karera mondjuwo yandje amave tjevere omivero vyayo namave ungura oviungura vyondjuwo. Owo mave yenene okuzepa ovinamuinyo otjiwaṋa mbi matji etere ozombunguhiro ozoningiririsiwa nozovinamuinyo, nowo otji mave karere otjiwaṋa. 12 Nungwari owo tjinga ava tjitira otjiwaṋa tja Israel omerikotameneno koomukuru vovisenginina, nu komuhingo mbwi tjinga ava pukisa otjiwaṋa, ami, ngu mbi ri Muhona Ndjambi, otji me yana, tjiri, kutja owo va sokuverwa. 13 Kave nokundjikarera otja ovapristeri poo okuya popezu noviṋa avihe mbya yapurirwa ami poo okuhita mOtjouyapukeyapuke. Indji oyo omberero yoviṋa oviyaukise mbi va tjita. 14 Ami meve pe oviungura ngamwa avihe vyokomake mbya sokutjitwa mondjuwo ndjo.”

Ovapristeri

15 Muhona Ndjambi wa tja nai: “Ovapristeri imba vomuhoko wa Levi mbe ri ozondekurona za Sadok owo va panḓera pokundjikarera nouṱakame ondjuwo yandje, indu otjiwaṋa atjihe tja Israel tji tja poka ku ami. Owo aveyerike ombe karera ami nu ombe ya komurungu wandje okundjipunguhira ozonḓura nombinḓu yozombunguhiro. 16 Owo aveyerike ombu mave hiti mondjuwo yandje, nu ombu mave karere potjipunguhiro tjandje nokutjita omerikotameneno mondjuwo. 17 Tji mave hiti momuvero worupanda rwomoukoto rwondjuwo yandje, mave zara ozombanda zotupera otuheze. Ave zara ko ozombanda nḓa ungurwa pomainya wozonḓu, tji ve ri moviungura morupanda rwomoukoto poo mondjuwo yandje. 18 Kutja ave ha rukutura, ngave zare ozombanda zerapi nozomburukweva zerapi, nungwari ave zara ko omakwamo. 19 Ngunda ave hiya ya korupanda rwopendje ku ku notjiwaṋa, rutenga mave sokuhukura ozombanda nḓu va zarere moviungura vyondjuwo, nu ve ze ese momatuwo omayapuke. Tjazumba ngave zare ozombanda zarwe, kokutja ozombanda zawo nḓa ozondjapuke aze ha tjiti otjipo kotjiwaṋa.

20 “Ovapristeri ave rihora ko oviuru vyawo, nu ave hapisa ko ozondjise zawo okurira ozonde nungwari ngaze riwe ko kokutja aze he kuru okurira ozengi. 21 Ovapristeri kave nokusokunwa omavinu womandjembere ngunda ave hiya hita morupanda rwomoukoto. 22 Kape nomupristeri ngu ma sokukupa omuhepundu poo omukazendu ngwa haṋika morukupo; eye ma sokukupa omukazona Omuisrael uriri poo omuhepundu womupristeri omukwao.

23 “Ovapristeri ngave honge otjiwaṋa tjandje ombangu pokati koviṋa oviyapuke na imbi mbi he ri oviyapuke, na indji yopokati koviṋa ovikohoke novihakohoke. 24 Tji pa sekama ozombata, ovapristeri mave pangura otjiposa otja komatwako wandje. Owo mave tjiti omikandi otja komatwako na komazikamisiro wandje, nu mave sokuyapura Omasabata wandje.

25 “Omupristeri ke nokusokurizunḓa mokuṱuna korurova, posiya indu tji ru ri rwaumwe wovanene ve poo rwomuatje we poo rwomuangu poo rwomuṱena omukombe. 26 Eye tja zu nokukohoroka rukwao ma sokuundja oure womayuva hambombari; 27 Nu ma yenene okuhita morupanda rwomoukoto rwondjuwo yandje nokupunguha ombunguhiro yokuisapo ourunde we, kokutja a sore okundjikarera mondjuwo rukwao. Ami, ngu mbi ri Muhona Ndjambi, owami ngu mba hungire.

28 “Ovapristeri ve noupristeri otja otjirumatwa tjawo tjaimbi mbi mba yandja ku Israel kutja tji yandjewe okuza komuhoko nga komuhoko. Owo kave nokukara nouini mOisrael; owami erike ngu mbi ri ouini wawo. 29 Ozombunguhiro zovikurya nozomauvi nozozondjo ondu maze rire ovikurya vyovapristeri; nowo mave pewa oviṋa avihe mOisrael mbya yapurirwa ami. 30 Ovapristeri mave pewa ovihape imbi oviwaviwa avihe vyovitengakuhora, noviṋa ngamwa avihe vyarwe wina, mbi mavi punguhirwa ami. Aruhe ovandu tji mave tereke ozomboroto mave sokuyandja omboroto ondenga kovapristeri, kokutja ondaya yandje i kare mozondjuwo zawo. 31 Ovapristeri kave nokusokurya onḓera poo otjipuka tji tje rikokere poo tji tja ṱu i ovipuka ovikwao.”