Jesaja 65 - Herero Revision Bible (HRR)

Omberero ya Ndjambi kovapirukire

1 Muhona wa tja nai: “Ami mbe rirongerera okuzuvira ozongumbiro zotjiwaṋa tjandje, nungwari otjo katji kumbire ko ku ami. Ami mbe ritwa poruhaera kutja owo ve ndji mune, nungwari kave ndji pahere ko. Otjiwaṋa katji kumbire ko ku ami, nangarire kutja ami aruhe mbe rirongerera okuzira nai: ‘Owami ngwi; owami ngwi!’ 2 Ami aruhe mbe rirongerera okuyakura otjiwaṋa tjandje tji tji tjita imbi mbi ri posyo mourangaranga watjo, nu tji tji twara ozondjira zatjo ozombi. 3 Owo ve kara pokundjipindikisa nokuhinohoṋi. Ve punguhira ozombunguhiro zovisenginina movikunino ovizere, nu ve twimisira ovyomoro omuwa kovipunguhiro vyovisenginina. 4 Mouṱuku owo ve yenda komaendo na kotupoko okukapura ozombepo zovaṱi. Owo ve rya onyama yombinda nokupwena omanyuṋe wonyama, ndji punguhirwa ozombunguhiro zoomukuru vovisenginina. 5 Ve tja nai kovandu varwe: ‘Zapweye pu eṱe; amu ṱunu ku eṱe, oweṱe ovayapuke.’ Ami hi vanga ovandu ohamukwao na imba, omazenge wandje ku wo ye ri otja omuriro mbu hi na maau zemi.

6 “Ami mbe rimanene rukuru okuvevera, nombanguriro yawo ya tjangwa nu ami himee ve isire imbi mbi va tjita, nungwari meve sutisire omauvi wawo, 7 nomauvi wooihe mukururume wina. Owo va twimisira ovyomoro omuwa kozondundu zoomukuru vovisenginina nave ndji yambururire kozondunda. Ami otji meve vere otja kozondjito zawo.”

8 Muhona ma tja nai: “Otja omavinu tji ye vazewa mepunda romandjembere novandu ave tja, orinyono ngunda muna omauwa mu ro; opunga ame tjiti nao kovakarere vandje. Ami hi nakuveyandeka ko avehe. Ami me yama imba mbe ndji karera. 9 Ami me sere Ovaisrael ondaya, imba mbe ri ovomuhoko wa Juda, nozondekurona zawo maze pewa ehi randje rozondundu ri rire ouini wazo. Otjiwaṋa tjandje otjitoororwa tji tji ndji karera, matji rumata ehi ndi natji tura mu ro. 10 Owo mave rikotamene ku ami, nu mave ṱike ozonḓu nozongombe zawo komaryo mOrutjandja rwa Saron, komukuma wokongurova, na mOtjana tjOumba, komukuma wokomuhuka.

11 “Nungwari ma rire omuhingo peke ku eṋe mbu mwe ndji imbirahi, mbu mwa isa Sion, ondundu yandje ondjapuke, nu mbu mu karera Gad na Meni, imba oomukuru vovisenginina vouṋingandu noumba. 12 Imbwi mau rire oumba ku eṋe okukoka onḓiro youtwe nokuṱa nengaruvyo, tjinga amu ha zirire ami tji mbe mu isana, namu ha puratenene tji mba hungira. Eṋe mwa tjita ouvi namu ritoororere okutjita imbi ami mu mbi hi nonyuṋe. 13 Nu nambano otji me mu raere kutja imba mbe rikotamena nokukara nonḓuviro ku ami mave kara novingi okurya nokunwa, nungwari eṋe mamu ṱondjara nonyota. Owo mave yoroka, nungwari eṋe mamu ṱisiwa ohoṋi. 14 Owo mave imbura nenyando, nungwari eṋe mamu kara nomihihamawatima amamu riri nombepo yondjenda. 15 Otjiwaṋa tjandje otjitoororwa matji eta osengiro kena reṋu. Ami Muhona Omunamasa me ku zepa! Nungwari ami me yandja ena epe ku imba mbe nonḓuviro ku ami. 16 Auhe mehi ngu ma ningire ondaya, ma ningire okuserwa ondaya i Ndjambi Omuṱakame. Omaumba woruveze ndwa kapita maye zu po, nu maye zembwa.”

Eyuru epe nehi epe

17 Muhona ma tja nai: “Ami me meme eyuru epe nehi epe. Ovitjitwa vyoruveze ndwa kapita mavi zembwa nu kavi nakuzemburukwa ko rukwao. 18 Nyandeye nu mu yoroke nga aruhe mu imbi mbi me utu. Jerusalem otjipe tji me tungu matji urisiwa nenyando, novature vatjo mave yoroka. 19 Ami omuini me nyandere Jerusalem novature vatjo tjinene. Kamu tji nokukara omaririro nondjuriro mu tjo. 20 Ounatje kau tji nakukoka ngunda au ri ounyame, novandu avehe mave hupu orure tjinene otja pu mave sora. Imba mbu mave hupu ozombura esere mave varwa otja omitanda. Okukoka komurungu wanao ma rire otjiraisiro tjokutja ami mbe ve vera. 21 Ovandu mave tungu ozondjuwo nave tura mo oveni; mave kunu omivite nave ri ovihape vyavyo. 22 Owo kave nokutungira omundu warwe ondjuwo kutja a ture mo; kave nokukunina omundu warwe omuvite kutja a rye ku wo. Ovandu votjiwaṋa tjandje mave hupu orure otja omiti. Owo oveni mave ri imbi mbi va ungura nomake wawo oveni. 23 Oviungura, mbi mave ungura, mavi munu ondoṋeno; novantje vawo kave nokumuna onḓiro yatjimanga. Owo otjiwaṋa tjandje, nu ami meve sere ondaya nozondekurona zawo wina oruveze aruhe ndu maru ya. 24 Nangarire ngunda ave hiya mana okukumba, ami tjandje mbe ve zuvire ozongumbiro zawo; nangarire ngunda ave hiya ningira otjiṋa, ami tjandje mbe ve pe. 25 Ozombungu nozondjona maze ri pamwe; ozongeyama maze ri ovihozu otja ozongombe, nozonyoka kaze tji nokurira ozonaumba rukwao. KOsion, ondundu yandje ondjapuke, kaku nokukara otjiṋa otjihihamise notjinatjipo.”