Eksodus 7 - Herero Revision Bible (HRR)

1 Nu Muhona wa tja ku Moses: “Tara, ami me ku tjiti aayo ove oove ngu u ri Ndjambi ku Farao, nerumbi roye Aron ma rire omuprofete woye. 2 Ove mo hungire kerumbi roye Aron avihe, mbi me rakiza kove; nu eye nga hungire ku Farao kutja a ise Ovaisrael ve tjinde mehi re. 3 Nu ami me kukutisa omutima wa Farao ne takavarisa oviraisiro novihimise vyandje mehi ra Engipte. 4 Nungwari Farao ke nakupuratena ku eṋe; nu ami me vere Engipte, nu imbi ovimbumba vyandje, okutja otjiwaṋa tjandje tjOvaisrael, me tji pitisa mehi ra Engipte ame vere Ovaengipte nomaverero omanene. 5 Ovaengipte otji mave tjiwa kutja owami, ngu mbi ri Muhona, tji mba yere eke randje okuvehihamisa nokupitisa Ovaisrael mokati kawo.” 6 OoMoses na Aron va tjita otja Muhona pe ve rakiza. 7 Moses wa ri nozombura omirongo hambondatu, nu Aron wa ri nozombura omirongo hambondatu nandatu tji va hungira na Farao.

Okati ka Aron

8 Nu Muhona wa hungira kooMoses na Aron a tja: 9 “Ombara tji mai vanga otjiraisiro otjihimise, raera Aron a toore okati ke nu e ke yumbe pehi momurungu wOmbara, noko make tjituka onyoka.” 10 OoMoses na Aron arire tji va i ku Farao, nave katjita otja Muhona pe ve raera. Aron wa yumba okati ke pehi momurungu wa Farao novakarere ve, nake tjituka onyoka. 11 Nu Farao wina otja isana ozonongo nozondjai. Nu inḓa ozondjai zOvaengipte za tjita nao wina noundjai wazo. 12 Auhe wa yumba okati ke pehi, nouti wa tjituka ozonyoka. Nungwari okati ka Aron ka ṋiṋa outi wawo. 13 Omutima wa Farao wa kukutira ko na ha puratene ku wo otja Muhona pa hungira.

Oviwonga mbya hihamisa Engipte

Omeva maye tjituka ombinḓu

14 Muhona arire tja tja ku Moses: “Omutima wa Farao wa kukutire ko; eye ma panḓa kutja otjiwaṋa atji ha tjindi. 15 Twende omuhuka omunene ku ye tji ma piti okuyenda konḓonḓu Nil. Nu ove kakurame komukuro wonḓonḓu okukemutjakanena, toora okati ku ka tjitukire onyoka, meke roye, 16 nu u katje nai ku ye: Muhona, Ndjambi wOvaheberi, we ndji hindi kove kutja u i ese otjiwaṋa tje kutja tji tjinde, kokutja tji ke rikotamene ku ye mokuti onguza. Nungwari tara, ove nga nai ko puratenene ko. 17 Muhona ma tja nai: Pu ihi ove mo tjiwa kutja owami, ngu mbi ri Muhona. Tara, me tono omeva nge ri mOnil nokati nga ku mbi na ko meke, nowo maye tjituka ombinḓu. 18 Nozohi nḓe ri mOnil maze koka, nu indji onḓonḓu ma i ṋuka nga Ovaengipte tji ve hi nokusora okunwa omeva mu yo.”

19 Norukwao Muhona wa hungira ku Moses a tja: “Raera Aron kutja a toore okati ke, nu a roporore eke re kombanda yomeva aehe wOvaengipte, na kombanda yozonḓonḓu na komikungu na komarindi na kozondama kutja ye rire ombinḓu. Nu mamu kara ombinḓu mehi arihe ra Engipte, na movitjuma vyomiti novyomawe wina.”

20 OoMoses na Aron va tjita otja Muhona pe ve rakiza. Aron wa yera okati na tono omeva, nga ri monḓonḓu Nil, momurungu wa Farao nowovakarere ve. Nomeva aehe, nga ri monḓonḓu, ya tjituka ombinḓu. 21 Nozohi azehe za koka, nonḓonḓu ya wora, nga Ovaengipte tjaave ha sora okunwa omeva mu yo. Nu mwa ri ombinḓu mehi arihe ra Engipte. 22 Nungwari ozondjai zOvaengipte za tjita tjingetjo noundjai wazo, nomutima wa Farao wa kukutira ko, neye ka puratenene ku wo otja Muhona punga a heya. 23 Nu Farao wa tanauka na hiti mondjuwo ye, nu ka ningire ko na tja. 24 Nungwari Ovaengipte avehe va sa onḓonḓu Nil amave sosura omeva okunwa, orondu tjinga aave ha sora okunwa omeva wonḓonḓu.

25 Pa kapita omayuva hambombari, Muhona tja za nokutona onḓonḓu Nil.