Oviyandjewa komatungiro wondjuwo ya Muhona.
1 Ombara David wa raera kombongarero aihe a tja: “Omuzandu wandje Salomo ongwa toororwa i Ndjambi, nungwari eye ingee omutanda, nu keya kara nondjiviro. Oviungura, mbi mavi ungurwa, ovizeu, orondu oyo kandjuwo yovandu uriri, nungwari oyo ondjuwo ya Muhona Ndjambi. 2 Ami mba kondja okuworonganisa oviṋa vyokutunga ondjuwo ya Ndjambi, okutja ongoldo nosilveri, nongoporo novitenda, nomiti, nomawe omahuze nomanangongo, nomawe wokuhondjerwa kumwe, nomawe omengi omakeṋakeṋe. 3 Posi yoviṋa avihe mbi mbi mba eta, mba yandja osilveri nongoldo youini wandje omuini, tjinga ambi nonyuṋe mondjuwo ya Ndjambi. 4 Ami mba yandja ongoldo ongohoke, ndji nondjinda yozokirograma omayovi omirongo muvyu, nosilveri ongohoke yondjinda yozokirograma omayovi omasere yevari nomurongo okuhareka na yo omakuma wondjuwo ya Muhona, 5 nokuungura na yo oviṋa avihe ovaungure ozonongo mbi mave ungura. Nambano owaṋi warwe ngu ma vanga okuyandja oviyandjewa ovingi ku Muhona?”
6 Oviuru vyozonganda, novanane vomihoko, novahongore vovarwe wovita, novatjevere vouini wouhona otji va yandja oviṋa mbi nombango yawo oveni koviungura vyondjuwo ya Muhona, 7 okutja ongoldo yondjinda yozokirograma eyovi rimwe nomirongo vitano, nosilveri yondjinda yozokirograma omasere omayovi yetatu, nongoporo yondjinda yozokirograma omayovi omasere yetano nomirongo vine, novitenda vyondjinda yozokirograma omangete yetatu. 8 Imba, mba ri nomawe omahuze, ve ye yandja komapwikiro wovihuze vyondjuwo ya Muhona, mbyaa vi tjeverwa i Jehiel womuhoko wa Levi, ondekurona ya Gerson. 9 Otjiwaṋa tja kara nombango okuyandja ku Muhona, nowo va yoroka mena rokutja oviṋa ovingi nai vya yandjwa. Ombara David wina wa yoroka tjinene.
David ma hivirike Ndjambi
10 Nu David wa hivirika Muhona momurungu wombongarero aihe, na tja: “Muhona, Ndjambi wa tate mukururume Jakob, ngo hivirikwe aruhe nga aruhe! 11 Oove omunene nomunamasa nomunandjozikiro nomutjiukwa nomunauvara. Oviṋa avihe, mbi ri meyuru na kombanda yehi, ovyoye, nu oove Ombara, noove Omuhona omunene kombanda yaavihe. 12 Outumbe nondengero, avihe mbi vi za move. Ove u honapara kombanda yoviṋa avihe nomasa nouvara woye; nove u yenena okuneneparisa nokuyandja omasa ku ngamwa auhe! 13 Nambano, Ndjambi wetu, matu ku tjere okuhepa, nu matu hivirike ena roye enene.
14 “Nungwari ami notjiwaṋa tjandje, tjiri, katu nokuyenena okukupa otjiṋa, orondu otjiyandjewa atjihe tji za move, neṱe matu ku yaruririre imbi mbi ri ovyoye. 15 Ove mo tjiwa, Muhona, kutja eṱe twa kara pokuryanga otja ovozonganda komurungu woye tjimuna ootate mukururume tji va tjitire. Omayuva wetu ye kapita otja omuzire, nu kamaatu sora okutaura onḓiro. 16 Muhona, Ndjambi wetu, eṱe twa woronganisa ovihuze avihe mbi okutunga na vyo ondjuwo yoye okuyozika ena roye eyapuke, nungwari avihe mbi vya za move, nu ovyoye. 17 Ami me tjiwa, Ndjambi wandje, kutja ove u rora omutima waauhe, nu u nohange novandu ovasemba. Ami mba yandja imbi kove nombango aihe nouṱakame mouatjiri; nami mba muna kutja otjiwaṋa tji tja wongara mba tji kara nondjoroka, tji matji tumbuza oviyandjewa kove nombango yatjo aihe. 18 Muhona, Ndjambi wootate mukururume Abraham na Isak na Jakob, ṱakamisa ombango otja indji momutima wotjiwaṋa tjoye nga aruhe, nu tjita kutja aruhe tji ṱakame move. 19 Pa omuzandu wandje Salomo omutima mbu ha ivaiva kutja a kare nonḓuviro komatwako na komazikamisiro na komaraerero woye aehe, nokutja a tunge ondjuwo, ndji mba rongerera oviṋa mbi.”
20 David wa rakiza kotjiwaṋa a tja: “Tangeye Muhona, Ndjambi weṋu!” Nombongarero aihe ya tanga Muhona, Ndjambi wooihe mukururume, novandu ve ripeta nave yozike Muhona, nombara wina.
21 Mependukirwa ovandu va zepa ovinamuinyo nave vi punguhire Muhona vi rire ozombunguhiro ozoningiririsiwa. Owo va punguha ozondwezu zozongombe eyovi, nozozonḓu eyovi, nozondjona eyovi, nu wina va punguha omavinu; novinamuinyo ovingi vya zeperwa Ovaisrael avehe. 22 Meyuva ndo otji va yoroka amave ri namave nu momurungu wa Muhona.
Nowo va zika Salomo porutjavari okurira ombara. Va twirisa Salomo okurira ombara. Va twirisa Salomo okurira ombara yawo mena ra Muhona, na Sadok okurira omupristeri. 23 Komuhingo mbwi Salomo otja pingena ihe kotjihavero tjouhona tji tja zikwa i Muhona. Eye wa ri ombara epatje, notjiwaṋa atjihe tjOvaisrael tja kara nonḓuviro ku ye. 24 Ovahongore avehe nozombangaṋe azehe nandarire ovanatje ovazandu varwe va David, va kwizika okukara nondatero ku Salomo otja ombara. 25 Muhona wa tjita kutja otjiwaṋa atjihe tji yozike Salomo tjinene, nu we mu pa ouvara pombara ngamwa aihe ndja honaparera Ovaisrael komurungu we.
Ondjandero youhona wa David
26 David, omuzandu wa Isai, wa honaparera Ovaisrael avehe. 27 Eye wa honaparere oure wozombura omirongo vine, okutja mOhebron oure wozombura hambombari, nu mOjerusalem oure wozombura omirongo vitatu nandatu. 28 Eye wa koka notjiwondo otjinene, a ri omutumbe nomuyozikwa; omuzandu we Salomo we mu pingena okurira ombara. 29 Ekuruhungi rombara David okuza kombutiro nga kondjandero ra tjangwa mEmbo rEkuruhungi rovaprofete vetatu mba ooSamuel na Natan na Gad. 30 Oro ri serekarera ouhonapare we auhe, nouvanḓe we, noviṋa avihe mbya tjitirwe ku ye na kOisrael na komauhona aehe nge mu kondorokere.
© Herero Revision Bible © Bible Society in Namibia, 2021.
