Ozondekurona za Ahab maze ṱu
1 Ahab wa ri novazandu omirongo hambombari mba turire motjihuro tja Samaria. Jehu wa tjanga orutuu na hindi otupa twarwo kovanane na kovanene votjihuro na kovaṱakamise vovazandu va Ahab; orutuu ndwi rwa tja nai: 2 “Oweṋe mbu mu ri ovaṱakamise vovazandu vombara nu mbu mu nomatemba wovita noukambe novirwise movihuro ovinamasa. Orutuu ndwi tji mwe ru munu, 3 toororeye omuzandu umwe wombara, ingwi ngu ri omuwa nomuṱakame tjinene pu avehe; mu zikeye okurira ombara, nu mu rwireye okumuvatera.”
4 Ovanane va Samaria va uruma nave tja: “Matu sora vi okusekamena Jehu, inḓa ozombara ooJoram na Ahasia ngunda ave ha sorere okumusekamena?” 5 Omukarere ohongora wondjuwo youhona, nomunane omunene wotjihuro, puna ovanane votjihuro novaṱakamise vovazandu va hinda ombuze ndji ku Jehu: “Oweṱe ovakarere voye, nu matu rirongerere okutjita otjiṋa ngamwa atjihe tji mo tu raere. Nungwari katu nokuzika ngamwa auhe okurira ombara; tjita ngamwa pu mo ripura.”
6 Jehu we ve tjangera orutuu orukwao na tja: “Tji mu ri komukuma wandje, nu tji mamu rirongerere okutjita omarakiza wandje, eteye oviuru vyovazandu va Ahab ku ami mOjesreel, muhuka moruveze tjingero ndwi.”
Ovazandu imba omirongo hambombari vombara Ahab ave tjeverwa i ovanane votjihuro tja Samaria mbe ve kurisa. 7 Norutuu rwa Jehu tji rwa vaza, imba ovanane votjihuro tja Samaria otji va zepa ovazandu va Ahab avehe, imba omirongo hambombari, ave twa oviuru vyawo movimbamba nave vi hindi ku Jehu kOjesreel.
8 Nu Jehu tja raerwa kutja oviuru vyovazandu va Ahab vya etwa, otja rakiza kutja vi tendekwe kumwe mozondundu mbari pomuvero wotjihuro, nu vi isiwe mbo nga mependukirwa. 9 Muhuka omunene eye wa ya komuvero wotjihuro na katja nai kovandu, mba ri mbo: “Owami ngu mbe rikuta kumwe novandu varwe okusekamena ombara Joram, ne mu zepa; kaweṋe mbu mu nondjo kotjiṋa hi. Nungwari owaṋi ngwa zepa avehe mba? 10 Ihi matji raisa kutja oviṋa avihe Muhona mbya hungirira ozondekurona za Ahab mavi rire ouatjiri. Muhona wa yenenisa avihe mbya kwizika notjinyo tjomukarere we Elia.” 11 Jehu wa zepa ovazamumwe avehe va Ahab mba turire mOjesreel, novahongore nomapanga novapristeri ve avehe; kapa ri umwe wawo ngwa hupa.
Ovazamumwe vombara Ahasia mave ṱu
12 Jehu wa za mOjesreel na i kOsamaria. Mondjira, poṋa pu pa rukwa Bet-Eked-Roim, okutja Ondanda yOvarise, 13 eye wa hakaena nomuhoko tjiva wa Ahasia, ombara ya Juda, ngwa ṱa, ne ve pura nai: “Oweṋe oowaṋi?”
Owo va zira nave tja: “Oweṱe omuhoko wa Ahasia; matu i kOjesreel okukayandja ondengero kovanatje vombara oserekaze Isebel na ku imba oveṱunḓu rouhona avehe.” 14 Jehu wa rakiza kovandu na tja: “Ve kambureye!” Owo ve ve kambura nave ve zepere pondjombo ya Bet-Eked. Pa ri ovarumendu omirongo vine na vevari avehe kumwe; nu kapa ri umwe wawo ngwa hupa.
Jehu na Jonadab
15 Jehu wa kayenda rukwao, nu mondjira wa hakaena na Jonadab, omuzandu wa Rekab, Jehu we mu minika na tja: “Ami na ove tu ripura tjimwe are? Nu movanga okundjivatera?”
Jonadab wa zira na tja: “Ii, me vanga!”
Jehu wa zira nai: “Nu ndji pa eke roye!” Owo va yandjasana omake, nu Jehu we mu vatera okuronda metemba, 16 ama tja: “Ngatu yende pamwe u kerimunine omuini tji mbe ripunguhira Muhona.” Nowo va hinga pamwe nave i kOsamaria. 17 Tji va kavaza ngo, Jehu wa zepa ovazamumwe vya Ahab avihe, na ha hupisa nandarire umwe. Imbi Muhona ombya raerere Elia kutja mavi tjitwa.
Ovakongorere va Baal mave ṱu
18 Jehu wa woronganisa otjiwaṋa tja Samaria atjihe na tja ku tjo: “Ombara Ahab wa karera omukuru wotjisenginina Baal kaṱiṱi; nungwari ami me mu karere tjinene. 19 Woronganiseye ovaprofete va Baal avehe novemukongorere, novapristeri ve avehe. Ape ningi umwe ngu he ri po orondu ami me punguhire Baal ombunguhiro onene. Nu auhe ngu hi nokukara po ma ṱu.” Inga ya ri omatiku wa Jehu, nga tjitira kutja a zepere po ovakongorere va Baal avehe. 20 Jehu wa rakiza na tja: “Zuvariseye eyuva romerikotameneno kondjozikiro ya Baal!” Nowo va tjita nao. 21 Jehu wa hinda ombuze ndji mehi arihe ra Israel. Ovakongorere va Baal avehe ve ya; kapa ri umwe ngu ha ri po. Avehe va hita mondjuwo onḓere ya Baal, nave i urisa nga tji ya pama. 22 Tjazumba Jehu wa rakiza komupristeri ngwaa tjevere ozombanda ozonḓere kutja e ze yandje kovakongorere va Baal. Neye wa tjita nao. 23 Kombunda yanao Jehu omuini wa hita mondjuwo onḓere ya Baal puna Jonadab, omuzandu wa Rekab, na tja nai kovandu mba ri mbo: “Ṱakamiseye nawa kutja mokati keṋu amu ha kara omukongorere wa Muhona, nungwari nga rire imba ovakongorere va Baal porwe.” 24 Eye na Jonadab ve rirongerera okupunguhira Baal ozombunguhiro zovinamuinyo nozoningiririsiwa. Jehu wa kuramisa ovarumendu omirongo hambondatu pendje yondjuwo onḓere na tja ku wo: “Zepeye ovandu mba avehe; ingwi ngu ma poṋisa umwe wovarumendu mba, omuinyo we mau u mu ingo.”
25 Nu Jehu tja za nokupunguha ozombunguhiro wa tja nai kovatjevere na kovahongore ve: “Kahiteye mu ve zepe avehe! Ape ningi umwe ngu ma poṋa!” Nowo va hita nomangaruvyo nave zepa avehe nave kokozorere oturova pendje. Tjazumba va kahita poṋa popazerezere, 26 ave pitisa ongunḓe onḓere yotjisenginina ndja ri mo nave i nyosa. 27 Notji va ṱukuṱura otjiserekarera tja Baal na indji ondjuwo onḓere nave i isa po okaruwo kokuyenda mokuti, ku ke ri po nga ku ndinondi.
28 Komuhingo mbwi Jehu otja yandeka okukarera Baal mOisrael. 29 Nungwari eye wa horera komauvi wombara Jerobeam, omuzandu wa Nebat, ngwa pukisa Ovaisrael mokukarera ovisenginina vyozondana ozondume zongoldo mbya zika mObetel na mOdan. 30 Muhona wa tja nai ku Jehu: “Ove wa tjita imbi avihe kozondekurona za Ahab ami mbi mba vanga kutja u tjite. Nambano ami me ku kwizikire kutja ozondekurona zoye, nga komuhoko outjaine, maze rire ozombara za Israel.” 31 Nungwari Jehu ka zuvire kOmatwako wa Muhona, Ndjambi wa Israel, nomutima we auhe; moruveze rwanao eye wa kongorera otjihorera tja Jerobeam ngwa pukisire Ovaisrael.
Onḓiro ya Jehu
32 Moruveze ndo Muhona wa uta okuṱiṱiparisa ounene wehi rOvaisrael. Hasael, ombara ya Sirie, wa huura ehi ra Israel arihe, 33 komuhuka wa Jordan nga kotjihuro Aroer komukuma wokeyuva kokumuho meṋe yonḓonḓu Arnon; orukondwa aruhe rwehi ra Gilead nora Basan, mu mwa tura omuhoko wa Gad nowa Ruben nowa Manasse ru ri mehi ndi.
34 Oviṋa vyarwe avihe Jehu mbya tjita, nozondjito ze zouvanḓe vya tjangwa mEkuruhungi rOzombara za Israel. 35 Eye wa koka na pakwa mOsamaria, nomuzandu we Joahohas, we mu pingena okurira ombara. 36 Jehu wa honapara mOsamaria otja ombara ya Israel oure wozombura omirongo vivari na hambondatu.
© Herero Revision Bible © Bible Society in Namibia, 2021.
