Ozondjito zourunde za Jerusalem
1 Muhona wa hungira ku ami a tja: 2 “Muatje womundu, we rirongerere okupangura otjihuro tji tje ura novazepe are? Tji handjaurira oviṋa avihe oviyaukise, mbi tja tjita. 3 Raera otjihuro imbi ami, ngu mbi ri Muhona Ndjambi, mbi me hungire ame tja: Mena raindu tji wa zepa ovandu voye omuini nu awe rizunḓa omuini mokurikotamena koviserekarera vyovisenginina, eyuva roye otji re ya. 4 Ove u nondjo yomazepero ngo, nu we rizunḓa noviserekarera vyovisenginina, mbi wa ungura; neyuva roye otji re ya, oruveze rwoye rwa manuka! Opu mba isira oviwaṋa okukunyekerera nomahi aehe okukuhemba. 5 Omahi nge ri popezu na inga nge ri kokure maye ku hembe, ondangu yoye tjinga aya zunḓaka, nove au ri otjihuro mu mu nezunganeno enene. 6 Ovanene vOvaisrael avehe ve riyameka komasa wawo oveni, nu ve zepa ovandu. 7 Kape na umwe motjihuro ngu yozika ooihe na ina. Ove u tjita outwe kovandu wozonganda, nu u ṋiṋikiza ovahepundu nozosewa. 8 Ko nondengero noviṋa vyandje oviyapuke nu ko ṱakamisa esabata. 9 Ovandu voye tjiva ve korera ovakwao ovizeze kokutja ve ve zepaise. Tjiva vawo ve rya ozombunguhiro nḓe punguhirwa oviserekarera vyovisenginina kozondunda. Tjiva aruhe ve kovisa ozonḓuma zawo. 10 Tjiva ve rara povakazendu vooihe. Tjiva ve kondjisa ovakazendu kutja ve rare po ngunda averi momayuva wawo woukazendu. 11 Tjiva ve katuka otukupo, novakwao ve pukisa ovakazona ovakwe vawo poo ovaṱena kwawo. 12 Ovandu voye tjiva ve zepera okusutwa. Tjiva ve ningira ovihohe komayazemeno ngu ve yandja kOvaisrael ovakwao, notji ve tumbisiwa i vyo. Nungwari owo ve ndji zemba.” Muhona Ndjambi ongwa hungire nai.
13 “Ami me yumbu ongomi yandje mena rovihohe vyoye ovihasemba mbi we ripahera, na mena romazepero nga tjitirwa morumbo rwoye. 14 Mo tjangovasi ove mo kara nouvanḓe nomasa nga yenena okuyera eke roye, ami tji mbe ku sekamene are? Ami, ngu mbi ri Muhona, owami ngu mba hungire, nu me yenenisa embo randje. 15 Ami me rimbi ovature voye mehi arihe na moviwaṋa avihe, nu me yandisa ozondjito zoye ozondjaukise. 16 Noviwaṋa vyarwe otji mavi ku yamburura, nungwari ove mo tjiwa kutja owami ngu mbi ri Muhona.”
Ezuko rokuzuzura ra Ndjambi
17 Muhona wa tja nai ku ami: 18 “Muatje womundu, Ovaisrael hi nohepero na wo. Owo ve ri otja ovipezeze vyovitenda, okutja ongoporo notjitenda notina nohanga, mbya hupa osilveri tji ya za nokuzuzurwa mezuko. 19 Nambano ami, ngu mbi ri Muhona Ndjambi, meve raere kutja owo ovehinohepero otja ovipezeze mbi. Ami opu me woronganisire avehe mOjerusalem, 20 tjimuna osilveri nongoporo notjitenda nohanga notina tji vi tuwa mezuko. Omazenge nomapindi wandje maye ve zuzura tjimuna omuriro tji u zuzura otjitenda. 21 Ii, ami meve woronganisire mOjerusalem ne yakisa omuriro womazenge wandje ne ve zuzura. 22 Owo mave zuzurirwa mOjerusalem otja osilveri tji i zuzurwa mezuko; nowo otji mave tjiwa kutja ami, ngu mbi ri Muhona, owami ngu mba tirira omazenge wandje kombanda yawo.”
Ourunde wovanane va Israel
23 Muhona wa hungira ku ami rukwao a tja: 24 “Muatje womundu, raera Ovaisrael kutja ehi rawo keyapuke komurungu wandje, punao ka ri na okurokwa meyuva ami ndi me ku vere momazenge wandje. 25 Ovanane ve ri otja ozongeyama nḓe tya ovimboro kovipuka mbi za zepa. Owo ve zepa ovandu ave toora outumbe novihuze avihe mbi mave sora okutwara, nu mokutjita nai ape sewa ovahepundu ovengi. 26 Ovapristeri ve katuka omatwako wandje nu kave nondengero na ihi tji tji ri otjiyapuke. Owo kave pangura pokati koviṋa oviyapuke na imbi mbi he ri oviyapuke. Kave hongo ombangu pokati koviṋa ovikohoke novihakohoke, nu ve pengura esabata. Komuhingo mbwi Ovaisrael kave ndji yozike. 27 Ovahongore vouhona ve ri otja ozombungu nde nyondorora ovipuka mbi za zepa; ve zepa ovandu kutja ve tumbe. 28 Ovaprofete ve horeka omauvi nga tjimuna ovandu mbe serura ekuma nomunoko omuvapa. Owo ve muna ovirimunikise vyoposyo, nu ve uka posyo. Ve tja ve hungira ombuze ya Muhona Ndjambi, nungwari ami, ngu mbi ri Muhona, hi na pu mba hungira na wo. 29 Ovatumbe ve tikura nu ve punda. Owo ve tatumisa ovasyona novahepe nu ave ṋiṋikiza ovozonganda. 30 Ami mba paha omundu ngwa sora okutunga orumbo, ngu ma kurama poṋa apehe orumbo pu rwa wa, nu ngu ma yama ehi omazenge wandje tji ye ri pokunyona ro, nungwari ami hi mwine omundu. 31 Ami opu mba etera omazenge wandje kombanda yawo, notja omuriro ami meve yandekere imbi mbi va tjita.” Muhona Ndjambi ongwa hungire nai.
© Herero Revision Bible © Bible Society in Namibia, 2021.
