Amasja ma rire ombara mOjuda
(2Ozo 14:2-6)1 Amasja wa rira ombara tja ri nozombura omirongo vivari nandano; neye wa honapara mOjerusalem oure wozombura omirongo vivari na muvyu. Ina wa ri Joadan, ngwa zire kOjerusalem. 2 Amasja wa tjita imbi mbyaa vi tjata ku Muhona, nungwari kee vi tjiti nomutima auhe. 3 Kamanga tja za nokuzikama mouhona, otja zepa ovahongore avehe, mba zepere ihe. 4 Eye ka zepere ovanatje vawo, nungwari wa tjita imbi Muhona mbya rakizire mOmatwako wa Moses, indu tja tjere: “Ooihe ngaave ṱire ouvi wovanatje, novanatje ngaave ṱire ouvi wooihe; omundu auhe nga ṱire ouvi we omuini.”
Ovita kuna Ovaedom
(2Ozo 14:7)5 Amasja wa woronganisa ovarumendu vomuhoko wa Juda nowa Benjamin movira vyovita otja kozonganda mu va ri, na ziki ovahongore vovira vyovarumendu eyovi, novyovarumendu esere. Movira mbi mwa ri ovarumendu avehe, mba ri nozombura omirongo vivari nokomurungu, avehe kumwe 300,000. Owo va ri ovarwe ovatoororwa mbe rirongerera otjirwa nawa, nu mba ri ozonongo mokurwa nomanga notuvao. 6 Mokuweza kovira mbi eye wa yazema ovarwe wovita 100,000 kOvaisrael kovimariva ovisilveri yondjinda mangara ozokirograma 3 400. 7 Nungwari omuprofete worive wa ya kombara na katja nai ku yo: “O twaerere ovarwe mba Ovaisrael wovita. Muhona ke ri puna ovarumendu mba mba zire kehi ra Efraim. 8 Ngahino mo ripura kutja mave ku tjiti omunamasa motjirwa, nungwari Ndjambi ma tjiti kutja ovanavita na ove ve ku havere, orondu eye u nomasa okuyandja outoṋi poo omahaverero.”
9 Amasja wa pura omuprofete a tja: “Mape tjitwa vi nosilveri ndjo aihe ndji mba suta rukuru ku wo?”
Omuprofete wa zira a tja: “Muhona ongu ma sora okukuyarurira ovingi komurungu waimbyo!” 10 Amasja otja hinda imbi ovira vyovita mbya yazemwa, ne vi raere kutja vi yaruke kozoyawo. Komuhingo mbwi otji vya yaruka, avya pindika tjinene kuna Ovajuda.
11 Amasja wa yanḓipara rukwao, na hongorere otjimbumba tje tjovita mOtjana tjOmongwa. Notjo tja rwa nawa poṋa mbo natji zepa ovarwe vOvaedom wovita 10,000. 12 Otjimbumba tjOvajuda tjovita wina tja kambura ovahuurwa 10,000, atji ve twara kondomba yetjo potjihuro Sela natji ve undurire pehi kutja ve nyanyaurwe i otuuwa tu twa ri kehi.
13 Ovarwe vOvaisrael wovita Amasja mbe he ve sire kutja ve yende puna ye kotjirwa, va rwisa ovihuro vyOvajuda pokati ka Samaria na Bet-Horon, ave zepa ovarumendu 3,000 nave kambura ovihuurwa ovingi tjinene.
14 Amasja tja kotoka, tja za nokuhavera Ovaedom, wa eterera oviserekarera vyoomukuru vawo vovisenginina, e vi kuramisa, e rikotamene ku vyo ne vi twimisire ovyomoro omuwa. 15 Otjiṋa hi tja pindikisa Muhona, neye otja hinda omuprofete ku Amasja: “Okutjavi tji we rikotamena koomukuru varwe mbaa ve ha sora okuyama ovandu vawo oveni momake woye?”
16 Omuprofete ngunda ama hungire, Amasja wa tja nai ku ye: “Okuza ku ruṋe tji twe ku tjita omuyandjandunge wombara? Mwina, tjapo ngee ku zepaisa!”
Omuprofete wa mwina tja za nokutja nai: “Ami me tjiwa kutja Ndjambi we rimana okukuyandeka mena rokutja ove wa tjita oviṋa mbi avihe no nyengwa ondunge yandje.”
Ovita kuna Ovaisrael
(2Ozo 14:8-20)17 Kombunda ya Amasja, ombara ya Juda, tjaza nokuhakaena kuna ovayandjandunge ve, wa hinda ombuze ku Joas, ombara ya Israel, ngwa ri omuzandu wa Joahas nondekurona ya Jehu, yokukemutoka kutja ve rwe. 18 Joas wa yarura eziriro ndi ku Amasja: “Otjikando tjimwe, otjihwa tjomakuiya tji tja ri kozondundu za Libanon, tja hinda ombuze ndji korupapa atji tja: ‘Ndji pao omusuko woye, a kupwe i omuzandu wandje.’ Nungwari pa kapita ovipuka vyokuti mbo navi tombo otjihwa hi. 19 Nambano ove, Amasja, mo rihivi kutja wa havera Ovaedom; nungwari ami me ku rongo u kare poyoye. Okutjavi tji mo kondjisa oumba mbu mau eta oviwonga porwavyo kove na kotjiwaṋa tjoye?”
20 Nungwari Amasja ka puratenene ko. Indji ya ri ombango ya Ndjambi kutja Amasja a haverwe, orondu we rikotamenene koomukuru vovisenginina vOvaedom. 21 Joas, ombara ya Israel, otja uta otjirwa kuna Amasja, ombara ya Juda. Owo va rwira mObet-Semes mOjuda. 22 Ovajuda va haverwa nave taurire kozoyawo. 23 Joas wa kambura Amasja ne mu twara kOjerusalem. Joas wa haṋa orumbo rwa Jerusalem okuza kOmuvero wa Efraim nga kOmuvero wOkotjikoro, oure wozometa mangara omasere yevari. 24 Eye wa twaerera ongoldo nosilveri aihe yondjuwo ya Ndjambi, noviungurise vyayo mbyaa vi tjeverwa i ozondekurona za Obed-Edom, novihuze vyondjuwo youhona kOsamaria otja ovihuurwa. Wina wa twaerera ovahuurwa vomoruveze.
25 Amasja, ombara ya Juda, wa hupa ozombura omurongo nandano kombunda yonḓiro ya Joahas, ombara ya Israel. 26 Oviṋa avihe vyarwe Amasja mbya tjita, okuza kombutiro nga kondjandero youhona we, vya tjangwa mEkuruhungi rOzombara za Juda noza Israel. 27 Okuza koruveze Amasja ndwa poka ku Muhona, pa kara ovandu mbe rikuta kumwe mOjerusalem okumuzepa. Korusenina eye wa henena kotjihuro Lakis, nungwari ovanavita na ye ve mu tezera nave kemuzepera ngo. 28 Orurova rwe rwa tuwa kokakambe naru yarurwa kOjerusalem; neye wa kapakwa momaendo wouhona mOtjihuro tja David.
© Herero Revision Bible © Bible Society in Namibia, 2021.
