Ovaisrael mave kondo Omuronga wOtuu
1 Muhona otja hungira ku Moses a tja: 2 “Raera kOvaisrael kutja ve tanauke nu ve tunge ozondanda komurungu wa Pi-Hahirot, pokati kOomigdol nOmuronga wOtuu, ouhunga na Baal-Sefon, meṋe vOmuronga. 3 Farao me ripura kutja Ovaisrael va tambauka nu ve ri mokati kokuti onguza. 4 Nu ami me kukutisa omutima we kutja e ve tezere, nami me taara Farao notjimbumba tje atjihe tjovita kutja mbi rimunise ondjozikiro. NOvaengipte otji mave tjiwa kutja owami ngu mbi ri Muhona.” NOvaisrael va tjita otja punga ava raerwa.
5 Indji ombara ya Engipte tji ya kakorerwa kutja otjiwaṋa tja taura, omeripuriro wa Farao nowovakarere ve arire tji ya runduruka, nave tja: “Twa tjitira tjike nai, tji twa isa Ovaisrael okutjinda kutja ave he tu ungurire rukwao.” 6 Eye opa kutirira etemba re rovita na toora ovarwe ve puna ye, 7 na toora omatemba omatoororwa wovita omasere hamboumwe, nomatemba aehe wovita wa Engipte, novarumendu ovarwe ovasembasemba metemba arihe. 8 Nu Muhona wa kukutisa omutima wa Farao, ombara ya Engipte, kutja a tezere Ovaisrael. Nungwari imba Ovaisrael va tjeverwa i eke enamasa ra Muhona. 9 NOvaengipte noukambe auhe wa Farao wovita, novakavire novarwe ve, ve ve tezera nave kevevaza mozondanda nḓa ri meṋe yOmuronga wOtuu popezu na Pi-Hahirot, komurungu wa Baal-Sefon.
10 Nu Farao tjeya popezu, Ovaisrael va muna Ovaengipte amave ve tezere; nowo va uruma tjinene nave ku ombatero ku Muhona. 11 Nowo va tja ku Moses: “MOengipte kamwa ri omaendo, tji we tu toora kutja tu ye okukokera mokuti onguza are? Ove we tu tjitira tjike nai, tji we tu pitisa mOengipte? 12 Katji twe ku raera mOengipte are kutja tu esa tu karere Ovaengipte? Orondu okokuwa ku eṱe okukarera Ovaengipte, komurungu wokukokera mokuti onguza.”
13 Nungwari Moses wa zira otjiwaṋa a tja: “Amu tira! Zikameye, nu undjeye kondjamo ya Muhona, ndji me mu tjitire ndino! Imba Ovaengipte mbu mamu munu ndino kamaamu kevemuna rukwao. 14 Muhona me mu rwire, neṋe hirimaneye uriri.”
15 Muhona otja pura nai ku Moses: “Mo kwire tjike ku ami. Raera Ovaisrael ve kayende komurungu. 16 Yera okati koye nu u roporore eke roye kombanda yomuronga, u pamburuke pokati kutja Ovaisrael ve konde omuronga pu pa kaha. 17 Nu tara, ami me kukutisa omitima vyOvaengipte kutja ve ve tezere. Nami me munu ondjozikiro mokutaara ombara, notjimbumba tje tjovita, nomatemba we wovita novakavire ve. 18 Ovaengipte otji mave tjiwa kutja owami ngu mbi ri Muhona, tji mba raisa omasa wandje ku Farao na komatemba we wovita na kovakavire ve.”
19 Nomuengeri wa Ndjambi ngwa hongorera otjimbumba tjOvaisrael wa zire po na yaruka kongotwe yawo, ame ve kongorere. Notjikamba otjinene wina tji tje ve hongorera tja kakurama kombunda yawo. 20 Notjo tje ya pokati kotjimbumba tjOvaengipte notjOvaisrael natji kara nonḓorera komukuma wOvaengipte natji yere komukuma wOvaisrael; novimbumba aviyevari kaavi sora okuvazasana ouṱuku auhe.
21 Moses wa roporora eke re kombanda yomuronga. Nu Muhona wa undura omuronga mbwi nombepo onamasa yokomuhuka ouṱuku auhe, na kahisa omuronga, nomeva ya haṋika pevari. 22 Nu imba Ovaisrael va konda omuronga pu pa kaha; nomeva ya kurama komikuma aviyevari tjimuna ovikere. 23 NOvaengipte ve ve ramba nave ve kongorere nga momuronga, noukambe auhe wa Farao nomatemba we wovita novakavire ve. 24 Nu omuhuka omunene Muhona wa tara kotjimbumba tjOvaengipte okuza momuriro na motjikamba ne tji purukisa. 25 Nu eye wa kuramisa imbi oviryo vyomatemba wovita, naye kayenda nouzeu. NOvaengipte arire tji va tja: “Ngatu taure tu ze po pOvaisrael, orondu Muhona ma rwire wo kuna eṱe.”
26 Tjazumba Muhona wa tja ku Moses: “Roporora eke roye kombanda yomuronga kutja omeva ye raukire kombanda yOvaengipte na kombanda yomatemba wawo wovita na kovakavire vawo.” 27 Nu Moses wa roporora eke re kombanda yomuronga, nu tji pa tja, omeva ya kotoka poṋa pu ya ri. NOvaengipte tji va vanga okutupuka va hakaena na inga omeva. Komuhingo mbwi Muhona otje ve undurira momuronga. 28 Nomeva ya kotoka naye vandeke omatemba wovita novakavire, notjimbumba atjihe tja Farao tji tje ve kongorera nga momuronga. Kape na umwe wawo ngwa hupa. 29 Nungwari imba Ovaisrael va tuurunga mokati komuronga mehi nda kaha. Nu inga omeva ya kurama tjimuna ovikere kokunene na kokumuho kwawo.
30 Muhona otja yama Ovaisrael meyuva ndo momake wOvaengipte. Nu Ovaisrael va muna Ovaengipte komikuro vyomuronga ava koka. 31 Nu wina Ovaisrael va muna otjiungura otjinamasa Muhona tja tjita kOvaengipte. Otjiwaṋa arire tji tja kara nondira ku Muhona natji kambura mu ye na mu Moses, omukarere we.
© Herero Revision Bible © Bible Society in Namibia, 2021.
