1 Ami mba konḓonona oviṋa mbi avihe, nu arire tji mba munu kutja omusemba nonongo noviṋa avihe mbi ve tjita vi ri meke ra Ndjambi. Omundu ka tjiwa kutja okusuvera poo okunyengwa otjo otjikeṋa, nu aviyevari mbi momeho we ovyo omungandjo uriri. 2 Oviṋa avihe vi ṱeki pamwe ku avehe: Otjiwonga tjingetjo tji wira komusemba na komurunde, komukohoke na komuhakohoke, ku ingwi ngu punguha na ku ingwi ngu ha punguha; omusemba u ṱeki pomunauvi, nu ingwi ngu yana u ṱeki pu ingwi ngu tira okuyana. 3 Ouvi mbu ri mu avihe, mbi tjitwa mouye mbwi owo mbwi: Otjiwonga tjimwe tji ya ku avehe, nokutja omitima vyovandu vye ura nouvi, nokutja ouyova u ri momitima vyawo aruhe ngunda ave nomuinyo.
Tjazumba avehe otji mave pundu motjovakoke. 4 Nungwari omundu ngu ri puna ovanamuinyo, eye ingee u nomaundjiro; ombwa ndji nomuinyo oyo onanḓengu pongeyama ndja koka. 5 Ovanamuinyo ve tjiwa kutja mave koka, nungwari ovakoke kave tjiwa otjiṋa, nu kave tji nondjambi, orondu owo va zembwa oparukaze.
6 Orusuvero rwovakoke nonyengo yawo, nomaukoze wawo, avihe mbi vya zenga; nowo kave tji nokukara ko norupa mu avihe, mbi tjitwa kombanda yehi.
7 Nu twende u karye ovikurya vyoye nenyando, nu u kanwe omavinu woye nondjoroka, orondu Ndjambi u nonyuṋe moviungura vyoye okuza korukuru. 8 Zara ozombanda ozombapa aruhe, nu o ha isa okurivava omaze motjiuru. 9 Yorokisa omuinyo woye puna omukazendu ngu wa suvera oure womayuva womuinyo woye womungandjo, Ndjambi nge ku pa kombanda yehi. Yoroka meyuva arihe peke romungandjo ndi, orondu indji ondji ri ondjambi yoye komuinyo na koviungura vyoye, mbi wa ungura nongondjero kombanda yehi. 10 Oviungura ngamwa avihe mbi movanga okuungura, ungura ngunda au nomasa; orondu kaku noviungura nomeripuriro nondjiviro nonongo motjovakoke hapo ove ku mo i.
11 Norukwao ami mba muna otjiṋa hi kombanda yehi kutja ovanatjikara aruhe kambe toṋa momararakaneno, nozombanḓe aruhe kanḓe muna outoṋi movita. Omundu onongo aruhe kangu pewa ovikurya, nomunazondunge aruhe kangu tumba; wina omuhongwa aruhe kangu muna ondjingonekero; nungwari oruveze rwokumuna ouhumandu ru ya ku wo avehe. 12 Omundu ka tjiwa oruveze eye ndwa yengerwa. Otja ozohi punga aze kamburwa mombate youmba, notja ozonḓera punga aze patwa mozongwehe, omundu rumwe opunga ama patwa wina, oruveze rwoumba tji rwe mu wire tjimanga.
Ounongo nouyova
13 Ami wina mba muna otjiṋa mouye mbwi, otjihorera otjiwa tjokutja ounongo u varwa otjatjike: 14 Pa ri otjihuro otjiṱiṱi mu mu ha turire ovandu ovengi. Ombara onamasa otji ye tji rwisa ai tji kovere, nai tungu otutatwa otunamasa okukondorokisa tjo. 15 Nu mu tjo mwa turire omundu omusyona, nungwari eye wa ri onongo tjinene nai nga tja yama otjihuro hi nounongo we. Nungwari kapa ri omundu ngwe rizemburukire nomurumendu omusyona ngwi. 16 Ami aruhe otjiye tja ounongo ombu ri ounanḓengu pomasa; nungwari ounongo womusyona u nyengurwa, nomambo we kaye puratenwa ko. 17 Omambo wovandu ozonongo nge puratenwa nawa, owo onge ri omananḓengu pokuravaera kwomuhonapare mokati kovandu omayova. 18 Ounongo owo ombu ri ounanḓengu povirwise vyovita, nungwari omunauvi umwe u zunḓa oviṋa ovingi oviwa.
© Herero Revision Bible © Bible Society in Namibia, 2021.
