Esekiel 23 - Herero Revision Bible (HRR)

Ovakazona oomuangu nerumbi ovanauvi

1 Muhona wa hungira ku ami a tja: 2 “Muatje womundu, otjikando tjimwe pa ri ovakazona vevari oomuangu nerumbi vaina imwe. 3 Tji va ri omitanda ngunda ava tura mOengipte, otji va zunḓa oukazona wawo nu ave rire ovakorondu. 4 Erumbi wa rukirwe Ohola, eye ongwa ri Samaria, nu ingwi omuangu wa rukirwe Oholiba, eye ongwa ri Jerusalem. Ami mbe ve kupa aveyevari, nowo ve ndji pandukira ovanatje. 5 Nandarire kutja Ohola wa ri omukazendu wandje eye wa panḓera poukorondu nu wa ri nozonḓuma tjinene kozombarise ze nḓaa ze zu kOasirie. 6 Ozombarise nḓa za ri ovarwe wovita ozombangaṋe nḓaa ze zara ozombanda ozoserarovazu, nu wina za ri ovahongore wokombanda novarumendu ovaingona; azehe za ri ovarumendu omitanda ovawa ovamanise mbaa ve kavire oukambe. 7 Ohola aa tjiti oukorondu puna ovahongore avehe vOvaasirie, nozonḓuma ze mu yambururisa mokurikotamena koomukuru avehe vovisenginina vOvaasur. 8 Eye wa panḓera pokutjita imbi mbya tjiti tja ri omukorondu mOengipte, ma zunḓira oukazona we. Okuza komayuva, nga ri omukazona, ovarumendu ave rara pu ye nokumuvara otja omukorondu. 9 Ami otji mbe mu yandja momake wozombarise ze zOvaasirie nḓa hurire. 10 Ozo ze mu hukura aze mu esa muzu, aze kambura ovanatje ve ovazandu novakazona naze mu zepa nengaruvyo. Ovakazendu koṋa akuhe ave mu yambere oumba mbwa tjitwa ku ye.

11 “Nangarire kutja Oholiba, omuangu wa Ohola, wa muna otjiṋa hi, Oholiba wa riririra ko omunazonḓuma nomukorondu tjinene perumbi re Ohola 12 Eye wina aa nanukire ovarumendu ovaingona novahongore wokombanda vOvaasirie, ovarwe wovita mbaa ve zara ozombanda ozoserarovazu, novahongore mbaa ve kavire oukambe, okutja ovarumendu mba avehe ovawa ovamanise omitanda. 13 Ami mba muna kutja Oholiba we rizunḓa omuini okumana; eye wa tjita ourunde tjimuna imbwi werumbi re.

14-15 “Oholiba wa riririra ko omukorondu tjinene. Eye aa nanukire oviserekarera vyovahongore wokombanda vOvababilon mbya kororerwe mekuma rorumbo nu mbya hwirwe otjivara otjiserandu; ovyo vya ri nomakwamo pomahuri, nozombeta nḓaa ze rekareka koviuru, avihe aavi munika tjimuna ovarwe ozombangaṋe. 16 Kamanga Oholiba tje vi muna wa ṱozonḓuma tjinene, notja hinda ovatumwa kovahongore oveni kehi ra Babilon. 17 Ovababilon ve ya okuyekurara pu ye. Owo va tjita ozondjito zoukorondu ku ye nave mu yamburura tjinene nai nga korusenina eye tja yaukisiwa i wo. 18 Oholiba aa kara muzu morupanda nu ee ritjiukisa ku ngamwa auhe kutja eye omukorondu. Ami mba yaruka okumuyara otja indu tji mba yarere erumbi re. 19 Eye wa riririra ko omukorondu tjinene ama tjiti imbi mbya tjiti indu tja ri omukazona mOengipte. 20 Eye aa nanukire tjinene ovarumendu mba ri nozonḓuma tjinene zokurara povakazendu, nu mba ri notutu twourumendu otunene tjinene tjimuna twousino, nu wina mba ri nozonḓuma tjinene otja inḓa zoukambe outwezu.” 21 Oholiba, ove iyo vanga okutjita ouhakohoke mbwe ku tjita omunandjo moukazona woye mOengipte, indu ovarumendu tjaave nyandisa omavere woye, nove wa zunḓa oukazona woye.

Ombanguriro ya Ndjambi komusuko ingwi omuangu

22 “Nambano, Oholiba, imbi ami, ngu mbi ri Muhona Ndjambi, ombi me hungire kove. Ove wa yara ozombarise ndo, nungwari me tjiti kutja ze pindike na ove, nu me ze eta okuza kominda avihe. 23 Ami me eta Ovababilon nOvakaldea avehe, imba ovarumendu mbu mave zu kOpekod na Soa na Koa, nOvaasirie avehe. Me woronganisa ovarumendu mba avehe omitanda ovawa ovamanise, avehe ovaingona novahongore ovatjiukwa wokombanda mbe kavira oukambe. 24 Owo mave ku rwisire okuza komukuma wokokunene kweyuva, nu mave ya notjimbumba otjinene tjovita nomatemba wovita na inga womitwaro. Owo mave ku kovere okuza kominda avihe, ave notuvao otunene notuṱiṱi nomakori wovita. Ami me ku yandja ku wo, nowo mave ku pangura otja kondyero yawo oveni. 25 Mena rokutja mbi ku ṱira oukoze, ami meve yandjere kutja ve ku tjite otja komazenge wawo. Owo mave kondo eyuru roye nomatwi woye nu ave zepa ovanatje voye. Ii, mave ku yeka ovanatje voye ovazandu novakazona nu ave ve nyosa nomuinyo. 26 Owo mave nyondorora ozombanda zoye okuisa ko, nu ave ku yeka oviwerawere vyoye. 27 Ami otji me yandisa ozonḓuma zoye nozondjito zoye ozondjaukise nḓuyo tjiti aruhe tji wa ri mOengipte. Komoo tara ko koviserekarera vyovahongore rukwao, nu komoo ripura na Engipte rukwao.”

28 Muhona Ndjambi ma tja nai: “Me ku yandja momake wovandu mbu wa tonda nu mbe ku yaukisa. 29 Nu tjinga ave ku tonda mave ku yeka oviṋa avihe, mbi wa ungurira, nu ave ku esa muzu amo munika otja omukorondu. Ozonḓuma zoye noukorondu woye 30 ombye ku etera oviṋa mbi. Ove wa ri omukorondu koviwaṋa, nu we rizunḓa omuini noviserekarera vyovisenginina vyawo. 31 Ove wa wondja mozondambo zerumbi roye, nami otji me ku pe otjinwino tjingetjo tjomberero okunwa.”

32 Muhona Ndjambi ma tja nai:

“Mo nu otjinwino tjerumbi roye,

otjo otjinene nu tji nomurya.

Auhe me ku hembe ne ku nyekerere.

Otjinwino tje ura.

33 Otjo matji ku yumanisa nokukupurukisa;

otjo otjinwino tjomburuma notjomanyoneno,

ihi otjinwino tjerumbi roye Samaria.

34 Ove mo tji nu notji nyenḓurura

ngandu tji tja kaha;

notjo matji nyondorora omavere

woye notutau twatjo.

Ami, ngu mbi ri Muhona Ndjambi, ongu mba hungire nai.”

35 Nambano Muhona Ndjambi ma tja nai: “Mena rokutja we ndji zemba nu we ndji pa etambo, opu mo zu okuhihamisirwa ozonḓuma zoye noukorondu woye.”

Ombanguriro ya Ndjambi kovakazona aveyevari

36 Muhona wa tja nai ku ami: “Muatje womundu, hapo we rirongerere okupangura Ohola na Oholiba are? Ve zemburukisa ozondjito ozondjaukise ndu va tjita. 37 Owo va katuka orukupo nu va tirahi ombinḓu, orukupo va katuka noomukuru vovisenginina, nomatirahiro wombinḓu va tjita kovazandu mbu ve ndji kwatera. Owo va punguhira oomukuru vovisenginina ovanatje vawo ovazandu. 38 Imbi kambi ri oviṋa porwavyo mbi va tjita. Owo va yamburura ondjuwo yandje nave ha ṱakamisa esabata, ndi mba zikamisa. 39 Meyuva tjingero ndo mu va zepa ovanatje vandje okurira ozombunguhiro koomukuru vovisenginina, omu ve ya kondjuwo yandje nu ave i yamburura!

40 “Owo aruhe ave hindi ovatumwa okukaṋanga ovarumendu okuza kokure tjinene, novarumendu mba ve ya. Ovakazona mba vevari oomuangu nerumbi aave rikoho motutu nokurivava nokuzara oviwerawere. 41 Aave haama kovihavero vyomasuviro oviwa ovimanise, nu momurungu wawo ave kara notjiriro kuya ku ura oviṋa oviwa pekepeke, puna ovyomoro omuwa nomaze womiṋinga mbi mbe ve pere. 42 Otjindjowe tjotjimbumba tji tji ri mombyarero aatji zuvaka motjira hi tjovarumendu, mba kaetwa mokuti orunguza. Owo va twa ozongoho pomaoko wovakazona nomakori omamanise koviuru vyawo. 43 Nami mbe rihungirira omuini kutja owo ave tamuna ko omukazendu ngwi motjiṋa tjoukorondu ngwa pungarisiwa i okukatuka orukupo. 44 Owo aave yaruka kovakorondu mba povikando ovingi tjinene. Va yaruka ku Ohola na Oholiba, imba ovakazendu ovayamburuke. 45 Ovarumendu ovasemba mave ve pangura motjiposa tjokukatuka orukupo notjokuzepa ovandu, orondu owo va katuka orukupo, nomake wawo ya zunḓaka nombinḓu.”

46 Muhona Ndjambi ma tja nai: “Hangeye ekuzeze kutja ri ve urumise nokuvepunda oviṋa vyawo. 47 Ombongarero ndji ngai ve zepe nomawe nu i ve kepure nomangaruvyo; ngai zepe ovanatje vawo nu i nyose ozondjuwo zawo. 48 Ami otji me yandisa ouhakohoke woukorondu mehi arihe otja omaronga komukazendu auhe wokutja a ha katuka ko orukupo otja Ohola na Oholiba tjaave tjiti. 49 Neṋe, vasuko amuyevari, ami me mu verere ouhakohoke woukorondu weṋu nouvi weṋu wokurikotamena koomukuru vovisenginina. Notji mamu tjiwa kutja owami ngu mbi ri Muhona Ndjambi.”