1 Omuprofete ngwa zire kOjuda wa ya kObetel otja komarakiza wa Muhona; eye weya mbo Jerobeam ngunda a kurama potjipunguhiro okupunguha. 2 Omuprofete ngwi wa ravaerera otjipunguhiro otja komarakiza wa Muhona na tja: “Tjipunguhiro, tjipunguhiro, Muhona ma tja nai: ‘Omuatje ngu ma rukwa Josija, ma pandukirwa eṱunḓu ra David. Eye ma zepere ovapristeri kombanda yoye, mbe karera povipunguhiro vyovisenginina, nu mbe punguhira kove, neye ma ningiririsire omaṱupa wovandu kombanda yoye.’ ” 3 Moruveze tjingero ndo eye wa zuvarisa kutja mape ya otjiraisiro, na tja: “Otjiraisiro tjokutja Muhona ongwa hungire nai, otjo hi: Otjipunguhiro hi matji pamuka mokati, nomutwe watjo mau ṱika.”
4 Nombara Jerobeam tja zuva omambo omuprofete ngwi nga ravaerere otjipunguhiro, otje mu urika na tja: “Kambureye omurumendu ngo!” Kamanga okuoko kwombara arire tji kwa kerembe, nga tjiyai ha sora okukukotora. 5 Notjipunguhiro tja pamuka mokati, nomutwe wa tikira pehi otja omuprofete pa zuvarisa mena ra Muhona. 6 Ombara Jerobeam opa hungirira komuprofete na tja: “Arikana, ndji kumbira ku Muhona, Ndjambi woye, nu u ningire kutja eye a verukise okuoko kwandje!”
Nomuprofete wa kumba ku Muhona, nokuoko kwombara kwa veruka. 7 Tjazumba ombara otji ya tja nai komuprofete: “Indjo koyandje puna ami, u karye otjiṋa. Ami me ku pe ondjambi ku ihi tji wa tjiti ku ami.”
8 Nomuprofete wa zira a tja: “Nandarire kutja mo ndji pe ohinga youtumbe woye, ami himee i puna ove okukarya nokukanwa ngamwa otjiṋa puna ove. 9 Orondu Muhona tje ndji rakiza kutja e ha ri poo e ha nu otjiṋa, nokutja e ha yaruka nondjira tjingeyo indji ndji mba eta.” 10 Komuhingo mbwi omuprofete otje ha yarukire nondjira tjingeyo ndji ndje ya na yo kObetel, nungwari wa twara ondjira yarwe.
Omuprofete omukururume wa Betel
11 Moruveze ndo mwa turire omuprofete omukururume mObetel. Ovazandu ve ve ya nave mu raere imbi omuprofete wa Juda mbya tjitire mObetel meyuva ndo, nomambo eye nga hungirire kombara Jerobeam. 12 Nomuprofete ngwi omukururume we ve pura na tja: “Eye hapo wa i nondjira ine?” Owo ve mu urikira ondjira; 13 neye otje ve raera kutja ve mu kuturire okasino ke. Owo va tjita nao, neye wa kavira. 14 Eye wa kavira nondjira ndjo ama tezere omuprofete wa Juda ne kemuvaza a haama kehi yomumbonde. Eye we mu pura na tja: “Oove ngu u ri omuprofete wa Juda?”
Nomurumendu wa zira a tja: “Ii, owami!”
15 Nu ingwi omuprofete omukururume wa tja ku ye: “Indjo koyandje puna ami u karye okahumburwa.”
16 Nungwari omuprofete wa Juda wa zira a tja: “Hi nokusora okuyenda koyoye puna ove poo okuitavera komaṋangero woye; nu ami hi nokurya nokunwa otjiṋa puna ove mba, 17 orondu Muhona we ndji rakiza kutja e ha ri ne ha nu otjiṋa, nokutja e ha yaruka nondjira tjingeyo ndji ndji mba eta.”
18 Ingwi omuprofete omukururume wa Betel wa tja ku ye: “Ami wina owami omuprofete tjimuna ove, nu otja komarakiza wa Muhona omuengeri we ndji raera kutja hi ku tware koyandje u karye nu u kanwe puna ami.” Nungwari ingwi omuprofete omukururume aa kora ovizeze.
19 Nomuprofete wa Juda opa ira puna omuprofete ingwi omukururume koye na karya puna ye. 20 Ngunda ava haama potjiriro, embo ra Muhona re ya komuprofete omukururume, 21 neye wa ravaera komuprofete ingwi wa Juda na tja: “Muhona ma tja nai: ‘Mena rokutja ko karere nonḓuviro ku ye, nu ko tjitire imbi eye mbye ku rakiza, 22 nu wa yaruka no karira omariro moṋa, eye me ku rakiza kutja o ha karira mo, indino ove otji mo ṱu, norurova rwoye karu nokupakwa meyendo reṱunḓu roye.’ ”
23 Nowo tji va mana okurya, omuprofete ingwi omukururume otja kutirira ingwi omuprofete wa Juda okasino, 24 neye wa kavira. Mondjira eye wa hakaena nongeyama nai mu zepa. Orurova rwe rwa saravara mondjira, nokasino nongeyama vya kurama posi yarwo. 25 Ovarumendu tjiva va kapita mbo nave munu orurova mondjira nongeyama ndja kurama popezu. Owo va kahita mObetel nave kahepura imbi mbi va muna.
26 Omuprofete ingwi omukururume tja zuva otjiṋa hi, arire tja tja: “Eye ngwi omuprofete ngu ha zuvire komambo wa Muhona. Nu Muhona opa hindira ongeyama okukemuzepa otja Muhona pa heya.” 27 Neye wa tja nai kovazandu ve: “Ndji kutirireye okasino kandje.” Nowo va tjita nao, 28 eye wa kavira na kavaza orurova rwomuprofete arwa saravara mondjira, okasino nongeyama ngunda avya kurama mbo. Ongeyama kai rire orurova nu kai nyondororere okasino. 29 Omuprofete ngwi omukururume wa toora orurova ne ru twa kokasino, ne ru yarura kObetel okukerutjitira omutambo nokukerupaka. 30 Eye we ru paka meyendo reṱunḓu re omuini; neye novazandu ve ve mu rira nave tja: “Owee, mukwetu wandje, mukwetu wandje!” 31 Kombunda yombakero omuprofete ngwi omukururume wa tja nai kovazandu ve: “Tji mba koka, ndji pakeye meyendo ndi, nu ndji tweye posi ye. 32 Omambo, nga hungirira otjipunguhiro mObetel nopoṋa apehe pomerikotameneno movirongo vya Samaria maye yenenisiwa, tjiri, otja komarakiza wa Muhona.”
33 Jerobeam, ombara ya Israel, inga ke na pa za ko kozondjira ze ozombi, nungwari wa kara pokutoorora ovapristeri momaṱunḓu wovandu mbe ha pwire okukarera povipunguhiro mbya tunga. Eye wa yapura omundu auhe ngwaa vanga okurira omupristeri. 34 Ouvi mbwi momukuma we wa eta omawiro nonyonokero kouhona we.
© Herero Revision Bible © Bible Society in Namibia, 2021.
